Gõycho Mando Prince - Elvis Goes
Dor ek Gõykar soimbinch ek kolokar koso zolmota, oxe toren hea borovpak survat dili zalear, khorench; tiatr ani songit mollar hem Gõykaramni sid’dh korun dakhoilam mhunn sangpak, tum fattim ravchonam. Dor ek Gõychea ganvant zomant ail’lo kolakar, nhoi Gõyant vo Bharotant, punn ontoraxtrik mollar porian apli kolen pollzolleat ani pollzotat. Gõychea dor ek ganvant khubuch torechi kola, zoxe porim songit/dans/khell/tiatr, loknach/gitam, bhajan/kirtan, film/chitr-kola adi-adi., veg-veglea kolakoranchea angan bhorun asa ti ganvche kolakar fuloit ravtat ani oxe toren aplea ganvank ani Gõy Rajeyak nanv mellun ghetat. Ani osle torecho soglleancho vollkicho Kepem ganvcho ek borovpi, kantaram ghoddpi, xikxok ani songittacho vhodd onbhov aslolo kolakar ani ‘Kempemchim Kirnnam’-cho voddill Evaristo Cirilo Goes alias Elvis Goes zaun asa. Elvisacho zolm Cusmane-Kepem ganvant Mayeache 29ver,1969 vorsa Shri Pedro Paul ani Shrimati Escolastica Goes kuttumbant zalo. Pope John XXIII High Scholl-ant ) tannem mullavem (X-vi) meren xikop kelem ani uprant Chowgule Kolejint Maths vixoyant fuddlem xikxonn ghevn BSc-chi podvi mellun ghetli. Lhanponnich thavn taka songitachi, tiatrachi, loknach ani gitanchi avodd asli. Tachea angant he gunn bhorpachem kharan mhonnlear songit ani tiatr mollavoilem tanchem kuttumb. Tacho xapai, Minguel Francis Goes ten’nacho ek vhodd khell xikovpi ani Bhat Minguel hea add nanvan taka ani tanchea kuttumbak ollkotale. Elvisacho bapui Pedro Paul ek koddegant partist ani kantorist aslo. Ten’nachea Minguel Rod-a oslea famad ani yer digdorspeam sangata to nhesla. Oxem toren rongtantuch asloli kola, Elvisan; apnnalea ikmotin ani huxarkayen fuddem veli. Lanponnim than, ganvchea igorjent tannem gayon-monddolacho polim vangddi ani magir mhukheli mhunn vavr kelo-ani korit asa . 1987 vorsa, Goa Cultural & Social Centre he sonvsthen Moddgonv xarant ghoddun haddlolea Akhil Goy Konknni Gavpache Spordhent, sabar fanki kolakarnak fattim ghalun, Elvisan poilo inam' jikhun ghetlo ani tea uprant to kenanch fattim vollun polevnk nam. Zoxem zhorichem udok vhaun veta tech toren tachea rogt-xiramni Gõycho poromporik Manddo-Dekhnni-Dulpodd hem Gõychem sonskruttik daiz bhitor sorun tannem ‘Kepechim Kirnnam' he sonvsthecho vavr anik nettan fuddem vhelo. Kolejintle lecturers, tticher, dhondekar, lekhok, kovi hancho aspav asun ani kuttumbanchea vangddam sohokaran, 1995 vorsa, hea lokh-nach ani gitanchea pongoddachim sutram aplea hatan' ghetlim. Ani az, girest daiz sonsskruttik molavelean Gõy Rajayachem nanv sonvsarachea mapar fankaroilem.Goa Cultural & Social Centre-an ghoddun haddlolea Manddo Utsovant taka The Mando Prince of Goa ho mukhuttui sabar pavtti favo zala. Elvis-an aplea pongddak Kala Akademichea vorsavollichea Carol Singing Contest-ant segid tin vorsam (1998, 1999, ani 2000 inam' melloileat. Manddo zaun asa mukhel khaxele gunn (forte) Kepemchea pongddache. ‘Kepemchim Kirnnam’ Thiruvanthapuram hanga ghoddun haddlolea ‘National Youth Festival’ Raxttrik mollar Elvis-an svota ghoddil'lo (best original song) Kalliz Pinzta ho Manddo ghaun 2003 vorsant Goy Rajyeak poilo inam mellvn dilo. Goychea Mandde Utsovache 3 vorsam (1997, 1998 ani 2000) poilem inam jikhun bhov manacho ‘Mrs. Ligia Goes Manddo Award’ favo zalo. Mungllur, Manddd Sobhann he sonvsthen ghoddun haddlolea ‘World’s Longest Singing Marathon by Multiple Singers’ hatunt ‘Kepemchim Kirnnam’-an vantto ghevn her pongddam borobor, aplem nanv bhangarache okxoramni Guinness Book World Records-an boroun dovorlem. Songitak dil’lea vhodd yogddanam ani karya khatir tacho sabar toren sotkar kela. Gõy Rajya torven ‘Yuva Srujan Puroskar (Youth Achiever Award) favo zala. Mukhel Montri Digambhar Kamat hanchea hatantleant Elvis,Yuva Srujan Puroskar ghetana Borovpi, kantaram ghoddpi, xikxok ani songitacho onnbhov aslolo Elvisacho ‘Kempechim Kirnnam’ pongodd Indian Coucil for Cultural Relations (ICCR), Misnistry of External Affairs, Govt. of India-achea asrea khal Bharotache ani bhailea desant mothvachea sonskruttichea dobajeamni vantto ghetla. Desachea chear-ui kon'xeamni Kepemchea Kirnnam-ni Goychea lok-kolecho pormoll ani porzoll xinvraila, zoxe porim Paramparya Festival, Quilon-Kerela, Manddo Utsov-Mungllur, All Indian Sammelan Calicut-Kerela, toxench Quilon, Puri Beach Festival, Goan Cultural Festival, New Delhi ani Goan Cultural Centre-Kuwait, Republic of Seychelles, Vientianne-Laos ani Phnom Phenn-Cambodia hea desamchi bhonvddi korun karriokram keleat. Halinch tanchea vannteak ek vhodd bhag favo zalem: Goycho lok-nach ani gitam sador korpak bhov-manachea (prestigious) Opera House – Cairo ani Opera House - Alexendria, hanga ani tech bhaxen Embassy of the Russian Federation-Addis Ababa, Nazareth, Bahir Dar, Khartoun ani yer Afrikachea vhodd mukhel xaramni. Gõyche sonskruttik girest daizachem mothv zannam aslolea Kuwait-chea Gõykarank ek anondit gozal mhonnlear, Manddo Prince Elvis Goes ani tacho pongodd ‘Kepemchim Kirnnam’ Novembrache 20ver GWS hannim ghoddoun haddil’lea ‘Kuwait-Goa Day’ somorobhant Manddo-Dulpodd-Dekhnni, Lok-nach/gitam ghevn vantto ghetole. Bhatmidar: LAPITT http://aitaracheokaskuleo.blogspot.com/
