Hello! Konn Mela? Goddealir nodor ghalit, vaztalo fon ghetlo. Sokallchim 8:20 minutam zalelim. “Konn mela?”, havem hello mhonnchem adinch tacho vichar. Morpacho konn aslo? Konn mela tachi khobor korchea bodla, mhagelea nidantuch, mhozo vichar. “Kuwait-Goa Day vochunk nam tum?” Tagelea poilea vicharan konnank tori mornn ailem oxem mhaka disun mhojea kallzant bhirantinchem pager marlolem. Tacho dusro vichar aikun atam mat mhojea kallzan, ragocho kottkott’to ailo. “Tuka kitem dislem? Hanv morunk zai aslo?” “Toxem nhi re papia! Sorombhak hajir zatole konn punn ek fanki monis usolltat mhunn, gelea disamni internet borench gazlem. Te khatir, khuim tori vaitt-borem ghoddlam ti tukach khobor astoli, oxem dislolean, vichar korin dislem.” “Zo morunk bhiyeta to jiepak bhiyeta. Hi khobor asa mhu tuka? Ani tum re? Sodanch, Kuveitt-Goy Dis sorombhak yevpi? He pavtti…..?” “Na re! Kitem zalem, zalem…” “Zalem, zalem, zalem? Sarko nitt uloi re. Talleak kitem xirkolam?” “Bhurgeank exami asat mhunn…” “Polle! Ek fott uloitolo zalear adinch-fuddem bara fotti ekttovpak zai. Tum kiteak yeunk nam, hem mhaka gorjechem nhoi. Punn tuzo vichar mat mhaka boro lagunk nam. Konnui to zaum. Mon’xak nirmilam tech sekenddar vo vogtar moronn yetolem. Zaum tem ofisant, nach-hollant, tiatrachea mattvant, igorjent vo ghorantuch nidhlole kodden…” “Khorem sangum?” “Aikotam!” “Internet-ar Kuveittt-Goy Dis-ak, hevui vorsak konn punn ekleak mornn astolem oxem vachlea uprant, mhojer bexttoch akant ailo ani hanv….”. “Ani tum khote somzonicher adarlolea (superstitious) khobro aikopi mon’xam porim sotmanddlem?” “Gelea vorsamni, sorombh somplea uprant morunn ghelolea prannichi khobor vachli. Hevui vorsa sorombhak vochpi mon’xank vaitt zaunchem nhi mhunn, sonvsarbhor aslolea Goykarank, kalchea disa internet-avelean rozar-magnnim korunk vinonti. Ani hacho porinam mhojea oslea osoktt mon’xachea monar boslo.” “Tunch nhi re to? Gelea pavtti mhaka sango mavllea thollar bharik-sarik yetli borpavoll vachinam mhu? Ani atam? Hoi! Dhongi (hypocrite) tum. Anikui tuje bhoxen asat. Bhitorlea bhitor kolea bhaxen khos zavpi, punn bhailean mat mendrea porim.” “Borovpean, vachpeanchea monar vaitt porinam’ zata toslim borpavoll korunk favo nhi” “Borovpean cheppem udoilolem. Lagtta tannem ghalchem aslem. Ani zannaim? Tuka kitlo boro khariokram chuklo to? 2006 vorsant ‘ Goan Cultural Center ’-an, poilech pavtti Kuveittchea Goykarank Kepemchim Kirnnam pongddachi vollok korun diloli. Tea vorsa, tum Goyam suttient aslolo ani tuka tancho khariokram chuklolo mhunn niraxi zalolo. Ho ugddas asa mhu tuka? Aichea Goykaranchi poram, (bhurgim) jim Kuveittan zolmoleant, tankam kitlem meren mhunn Goychea sonkruttayechea girest daizachi khobor asa vo tancho avoy-bapui tankam xikoita? Goycho Manddo Prince Elvis ani tagelo ‘Kepemchim Kirnnam’ pongodd bharim vavurtat lok-nach-gitamni amchem daiz voir ukllun dovorpak. Ani itlea poisulean ailolea pongddacho khariokram ‘internet’-avelo khobro vachun chukovop mhunnchem, tujea oslea Goykaranchi kedi vhodd pixai? Bhurgeank ghevn Goychea vhodd sonskruttik daiz polloichea suvater unnea bhavartea mon’xam porim tum ghorach nidhlo re papia? Itlean sompunk na! ‘Kala Mogui’ asrea khal ani Vasudev Amonkar hanchea fuddariponnan, tholave (local) Goyche Hindu bhav-bhoinnamni ek voznadik Goycho Lok Mandd sadar korun Carmel Xalecho Vosro rongoilo. Sokallchea vellar ganvchea tintear vochun dudd haddchem, mattka khellcho, saikolir pantlo ghalun ganvant podderanche unde ani nustem viktole hem ek bhes borem toren dakhoitonam, hajir aslolea prekxokank (audience) Goyant vorun xennoile. Tangelo fugddi, dallo, lok-nach, xigmo ani dendlo (ho chodd-so Fonddem vatharant zata) pollevn Goychem poromporik sonskruttayechem chitr jivem dislem. Zori tum ani tuji famil sangatan he soglle sonskruttik khariakram pollelole zalear, tugelim bhurgim tujea lagim kitem tori vichar korin aslim. Tednam tum umedir yeun Kuveittan zolman ail’lea tugelea bhurgeank purvozalim dovorlolem Goychem girest daiz ugttem korun tanchea tornnea gineyanar amche poromporicho uzvadd ghaltolo aslo. Aikota tum….. Hello!…..helloooo…….Arre khoim ghelo? ……….Melo kitem re?” Lino B. Dourado http://aitaracheokaskuleo.blogspot.com/
