---------------------------------------------------------------------------
**** http://www.GOANET.org ****
---------------------------------------------------------------------------
Happy New Year Twenty-Ten
---------------------------------------------------------------------------
Lucazinho Ribeiro - Tiatracho Rochnnar
Tomazinho Cardozo
Goycho Tiatr Mumboint zolmank ailo mhunttlear aikonk vichitr dista. Punn
Konknni
bhaxechea mollar - magir tem sahtiya zaum, potrkarita (journalism) zaum,
kadambori/kovita zaum, git-songit zaum vo drama zaum hache vixim chodd pavtt
survatechim panvllam Mumbointuch suru zaleant. Karan Goykar chodd koruna aplea
pottak lagon Mumboint nokri korunk vetale ani thoim tancher koslo koslo na
koslo
probhav poddon tea tea xetrant tannim survatechim panvllam marlim. Hech porim
Goycho
tiatr-ui Mumboit suru zalo. Hea nanvlovkik tiatracho rochnnar mhunttlear
Lucazinho
Ribeiro zannem poilo tiatr boroilo, digdorsit kelo ani Abrilache 17ver, 1982
vorsa
Mumboint machier haddlo.
1982/83 vorsa Goychea sorkaran, Goyche Kala Akademy votin, poilech pavtt
Tiatr-achim
xembor vorsam monoilim. Ponjent boreantli bori ek kariavoll ghoddoun haddli. He
somoyear tiatrantlea mhalgoddea tiatristancho bhovman kelo. Tea vellar
Tiatrachea
itihasa vhoir ek program machier haddlo. Hea program hachi 'script' boroupachi
zababdari mhaka dili. Tea khatir tiatracho itihas kholayen xikpachi mhaka
sondhi
mell'lli. Lucazinho Ribeiro hannem poilo tiatr boroilo mhunn mhaka John Claro
hannem Inglez potrancher boroilolea lekhan vorvim koll'llolem. To Assagao
ganvcho
aslo mhunnonuim mhaka khobor asli. Tea khatir hanv Assagao gelom. Lucazinho
Ribeiro
hachi konn punn famil asa kai mhunn chovkoxi keli. Mhojea borea noxiban mhaka
mhojea
eka ixttan Assagao, Sokol vaddeant ek Ribeiro mhunn famil asa ani te familint
tiatrist aslo mhunnttat mhunn sanglem. Hanv Assagao Sokol vaddeant gelom ani
thoim
Lucazinho Ribeiro hachi nat-sun ravta mhunn mhaka koll'llem. Hanv Lucy,
Lucazinho-chi nat-sun, hika mell'lom. Tinnemn mhaka zaiti mahiti dili ji mhati
Lucy-k tachea sasupain diloli.
Tiatracho rochnnar ticho vhoddil asa mhunn kolltoch Lucy ekdom khoxi zalem. Tem
umedhin bhorlem ani tannem mhaka Lucazinho Ribeiro hachem moddlolem ghor
dakhounk
vhelo. Ghor moddlolem punn vontthi asleot. Fuddlean bolkanv asa tache sope
asle,
'pillars' asle punn nolle konsllon poddlole. Cholpi vatter thavn bolkavant
vochpak
12 te 14 panvdde asle. Lucy mhunnolagli, " Mhojo sasupai sangtalo ki Lucazinho
hea
bolkavant machi kortalo, chedram lavn podd'dde lamboitalo ani aplea vangoddchea
bhurgeank gheun kariavolli kortalo." Lucychea sangnnea voilean Lucazinho-k
bhurgeach
ponnar thavn sonskrutik kariavollincho khub mog aslo mhunn mhaka koll'llem.
Mhaka ek tori Lucazinho Ribeiro hachi fottu zai aslo. Tanchea ghorant asa
zalear ek
kopi dhi mhunn hanvem magnni keli. Tea vellar ami fokot Lucazinho Ribeiro
hachem
nanv aikolem punn tacho fottu poriant pollounk naslo. Tanchea ghorant ekui
fottu na
mhunn mhaka Lucy-n sanglem. Lucazinho-chen ghor tor moddon poddlolem. Lucy adim
Mumboint ravtalem tea khatir tem mhunno laglem, " Mhaka dista Mumboint amche
eke
pettent Lucazinho Ribeiro hachea mornnachea vorsachea ugddasak Regist chhaplolo
to
asa so." Hanvem Lucy-k vinonti keli ki to Rejist tannem Mumboi vochon haddcho
mhunn." Lucy jem khub umedhir aslem tannem rokddench amchem magnnem svikar
kelem.
Tem Mumboi ghelem ani Lucazinho hachea mornnachea vorsachea ugddasak chhaplolo
rejist mhaka haddun dilo. To rejist azun popriant mhoje lagim asa. Tea rejista
vorvim Lucazinho-cho fottu amkam pollounk mell'llo, to koso distalo ani to koso
nhestalo tem pollounk mell'llem.
Joao Agostinho Fernandes, zaka ami 'Pai Tiatrist' mhunn pachartanv to Lucazinho
Ribeiro Tiatrachea mollar poilo man favo zata mhunn sangta. 1943 vorsa jedna
Joao
Agostinho Fernandes hachea fuddarippona khal Mumboint Tiatrachi 'Golden
Jubilee'
somorombhli tedna Joao Agostinho Fernandes hannem ek lekh boroilo. Ho lekh 'Ave
Maria' hea 28vis Novembr, 1943 disachea ankar chhapon ailo. Joao Agostinho lekh
survat kortana oxem mhunntta, " Jedna hanvem Tiatrachi 'Golden Jubilee'
somorombhpachi zababdari ghetlea tednam tiatr zolmant haddpak poilo man konnank
favo
zata tem boroun dovorpachem mhojem kortovea asa." Tea uprant to Lucazinho
Ribeiro
koso Mumboint ailo, eka Italiachea dramatic pongddan 'back stage artiste' mhunn
sirvisek ravlo, koso tannem "Itilian Bhurgo" ho tiatr boroilo ani apleak ani
dusreank gheun Abrilacher 17ver, 1892 vorsa machier haddlo tachi bariksanen
khobor
dita. Anui lekh sompoitamna Joao Agostinho oxemn mhunntta, " Dubhavnastana
tiatr
mollar Lucazinho Ribeiro haka poilo zago favo zata. Hanv taka mhoji tokli
bagoitam
kiteak to mhojo margdorxok (guide) ani 'Guru' ani takach lagon hanv azun
poriant
dekhivont tiatr machier haddtam." Joao Agostinho Fernandes hachea hea
nivedhana
(statement) vorvim Lucazinho Ribeiro tiatracho rochnar mhunn nischit zalem ani
Lucazinho Ribeiro-k tiatr mollar favo tem sthan favo zalem. Joao Agostinho
Fernandes
hachea khalteponnan kedem vhodd vhoddponn asa tem mol korunk zaina.
Tiatr Academy Goa Janerache 2rer Lucazinho Ribeiro hacho zolm-dis somorobhta.
Hi
kariavoll Kala Akademy-chem Black Box hantun 4.30 vorar zatoli. Soglle tiatr
mogi he
kariavollik hajir zaum-ea ani Goykaranche avddicho Tiatr zolmank haddpi
Lucazinho
Ribeiro haka man dium-ia.
