TO, MAHANAND NHOI! TI:Bogum tanchem TO:Konanchem? TI:Voilea vaddeantlea Kamil ani Kelmetinachi dhuv, pollun gheli khoim TO:Zaum. Konna tori vangdda ghelea. Surokxit astoli. TI:Ek barikxi kes zal’lea vori uloile tumi. TO:Chorun vorunk na mhonnon, mhunnta hanv. Kitlim vorsam tika? TI:Konnank? TO:Pollun ghel’le choliek? TI:Ghelea mhoinean ikvisavem voros sompun bavisavem lagil’lem mhunn, sango ti mhaka. TO: Pollun vochpachea kaidean asat tim TI: Tumi ani tumgele kaide. Kitlim dev-bhogtti avoy-bapui. Atanchea porank kosli khas yeta ti ekleak Isvorak khobor. Pollun votana, ghorantlem bangar ani duddu mhollear panch lakancher pavtta khoim. TO:Konna vangdda pollun ghelea ti? TI:Tangelea ghora bazun baddean ravtolea, Bihari Apu vangdda. TO:Konn? To Apu? Yad asa nhi tuka? Amgelea, fattlea zolvache kompin baddean ravpak don vo tin pavtti tori amger ail’lo to? Kamil ek nivrut (retired) zal’lo tarvotti. Poise nant takodde? Borpur asat. Punn tagele bailek dudvanchi chodduch as. Funkot sol’lo (advise) dil’lo hanvem Kamilak. On-vollki lokak baddeak dovortana, to monis konn, khoincho, tagelo pot’to, ek pasport akaracho fotu, Goyan koslem kam’ korta ani khoinsor hi sogli zanvay ani mahiti ghetoch, baddeak dovorpak zai. TI:Asum tem. Churchure Kamil-Kelmetinchea. Choliechi sod korunk zai. TO:Mahanand-a bharim vochunk na nhi ti? Tache bharim polloun ghel’lea cholienchea avoy-bapayni, somazache lojek lagun apnnalea dhuvanchi topasni korunk na. Ani survatekuch toxem kel’lem zalear, az ghoddie tatuntleo thoddeo thoddi cholieo jivio urpacheo. Kamil lojek morpi monis. Odikh soro, ghontunk lagtolo. TI:Xistin vadleli choli ti. Tigelea angant ek tori vaitt gunn zolkunk na mhaka. Tiche hanstem mukhamoll mhojea dollea somor yeta. Konna tori ghavchea choleacho prem’ korun, logn korchem aslem tinnem. TO:Age, dolle dhampun ulounchi sonvoim ken’na somptoli tugeli? Disna tuka, amche vaddeantle Kristi kuttumbantle chole Purtugez passport korun videxeant votat te? Votat te bore asat, punn Goyant porot yetna dove khatichem bim ghevn yetat zalear, amgeleo cholieo koxeo kopteleo? Dha Mhoinea Uprant TI:Aikotat tumi? TO:Sanglear aikunk yetlem nhi ge? TI:Choli aili khoim TO: Konnachi? TI:Pollun ghel’li Kamilachi choli TO:Ektich ailea? TI:Tumkam koxem koll’lem? TO:Vokil hanv. Hea kaman onbhonvlam. Dha mhoinnem adim, rogttachea forsar pollun ghel’li choli ekti ail’li mhunn asa? Ghoddie, pollun ghel’lea bharim tinnem lognbandchem vo gorbest zaun vo zolman ail’lea porak ghevn yenvchem. TI:Apu, Biharacho nhi. Andracho mhunn atam koll’lam. Kazari bail ani dogam bhurgim asat bhi taka. Kamilache cholie koddlean, tannem sogot bangar-duddu ghetle ani tiche thaim zobordosten mog kelo ani bhurgem rochlem. Thoinchea hospitalan ek Goychi nors axil’li khoim. Tiche mozotin ti pollun Goyam pavli. Apu, bhouch dharun ani khorkos monis mhonnttat TO:Zaum! Pollun ghel’li hi tori choli salamot aplea kuttumbaxim pavli. Mahanand-a bharim pollun ghel’leo cholieo, porot surokxit ghora pavil’lo mhunn asat ge? Lino B. Dourado http://aitaracheokaskuleo.blogspot.com/
