---------------------------------------------------------------------------
Sign the Petition requesting The Honble Minister of State for Environment
and Forests (I/C) to maintain the moratorium on issuing further
environmental clearances for mining activities in Goa
http://goanvoice.org.uk/miningpetition.php
---------------------------------------------------------------------------
Amchi Jib Khobram-Potr
Disantlim 24visui voram portean-portean eke ghoddnuker attaploli teoch khobri
TV-ir sangcheo, ani thodde pavtti khoslich bhunead nasloli bhatmi vitraun
lokachim monam guspagonddollan ghalchem kam’, aichi media korta. Gorom-gorom
khobrecher boroch pez dovorun, modench jahirat (advertisement) break mhunn
ditat. Ani turturit khobrank tannelolo lok, fuddem khitem zatolem tem aikupak,
pochpochit TV-chea channolak chitkun ravtat. Gelea sattolean, Pakistani
kriketter Shoiab Malik ani Bharoti tennis khellgoddi Sania Mirza-chea mog ani
lognachem dhanvtorem, Bharoti media-n, fog-para-uzo kelo.
Dogam premicho mog koslich xim’-mer, zati-katicho ani dhormancho veglozar
nastona zata. Oslea prem-rogak kosleoch addkolincheo ximo laguzainant.
Khaxealle amche Gõykar bhav-bhoinnam veg-veglea zatinchea ani sabar porki
desantlea loka modim sombond zoddun logn zaleant. Punn jednam Shoiab ani Sania,
ap-apnnalea xrestan, nanvlokik namnechim mon’xam (celebrities) zalolean,
tanchea mog-lognacho prochar okosmat, Hyderabadi choli Ayesha Siddiqui, apunn
Shoiab-achi poili potin mhunn sangun TV media-k zagoyta. Samanya vo sadea
mon’xachi khobri TV-ir dakhoinant, na mhunn, vhodd-vhodd vortomanpotrancher
chhapun yenant. Punn amchi jib mat, barik lokacheo khobro korunk ek khorelem
jivem kobarampotr zaun asa mhonnlear, hanv chukchona.
Shoiab-Sania vixim, zaitea zonnamni apleak zai te toren jib gasaili. Konn eklo
mhonnonk laglo, Sania khorea sobhavachi choli zaloli zalear, tigelea
bhurgeamponnavelea ixtt-mogiak Shorab Mirza hache lagim lognanchem utor
zall’lem tem, moddchem naslem. Tharaylole tarker logn zaunchi umedichi
dhanvpoll pollevn, konna ekleak dislem, Sania bayen addvarlolem foll khailem?
Tor-toren lokacheo jibleo korzunk lagleo ani veg-veglim khobram poddam ghait
astonam… Hyderabadi cholie lagim telefonavelean nikah vo logn korunk nam mhunn
survatek Shoiab Malik negar vetana, xevttim Sania-chem vozon (?), Shoiab-acher
poddun tannem poile bailek talak vo divors dilo asot? Ani oxe toren, TV-ir
aikotolea khobram vonn, lokacheo jibleo chodduch korzunk lagleo?
Kal, hanv ghora veche vatter astona konn-eklean mhaka zagoylo. Halinchea
tempar, Kuveitan yetele Gõyche tiatristanche tiatr pollevpak hanvem unnem
keleat. Punn porchea Sunkrarak Kuwait Canara Welfare Association ghoddoun
haddlolem Kala Milan 2010 ani adlea Konkan Kala Samithi-Kuwait, hea
Mungllurkaranchea show-ank, ekan-ek hanv hajir zaunk lagla mhunn, taka vhodd
usko zala. Hanvem kitem pollevnchem ani nam pollevnchem, keddna pollevnchem,
konnanchem pollevnchem tem, tachea tokler kiteak pez poddla ti mhaka khobor
nam. Hanvem voilea donui khariakramank vochpachem kharan sangtoch, vatter
doddlolo monis, Kuveittantle vorixtt Gõykar sonvsthachi ttika martalo ti
aikupak, mhojea kanache podd'dde sodoll zait ghele
Thodde monis dhongi (hypocrites) astat. Dusreachem padd zata tednanch tanchi
jib chodduch ulounk sodta. Punn jeddna, to vo tem Konknni somudayen ponnte
porim porzolltona, tachea vo tichea ponnten tel votoun odhik uzvaddik korchea
bodla, thodde nid’duki monis pettloli ponnti palovpak zaiti khotpott kortat.
Tanchi jib favo tea zagear boddboddona. Punn naka thoim tondd ghalunk soglle
toyaren astat. Oikari (positive) bazun pollenvchem soddun, nhoikari (negative)
vattevelean nodor firaytat. Kuwait Soddun Vetana tiatr, hanvem tin pavtti
koslea kharanank lagun pollela tem kal vatter mell’lolo monis zannam zaunk
sodta. Orthabhorit ani chalu jivitak lagu zatolea istorin gunttlolea tiatr
borovpeachi toknnay vattevelea mon’xan keloli zalear, tagelea rundd monantlea
chintnanchi tust hanv kortam aslom. Punn toxem korunk tache jibek constructive
ulovpachi fursot nasli. Asa ti fokot destructive korchi.
Konknni itihasan poilech khepek Kuwait Soddun Vetana, ho tiatr, tin pavtti
Kuveittche Konknni rong machier dakhovpan haddlo. Hea tiatra velean, lokak boro
sondex mellta mhunn, Gõyche ani Mungllurche Konknni somudayen donui khepek AIS
vosro borun votoilo. Kuwait Canara Welfare Association (KCWA) ani Konkan Kala
Samithi-Kuwait, he vhodd Mungllurche Konknni sonvsthani Shri Rosary Ferns-acho
vavr vakhandun, tachem bhovman kelam tem pollevn oprub dislem. Povitr Pustok
porian amkam ugddas korta. A prophet is not without honour, except in his own
country, and among his own kin, and in his own house. (Bhaknnarak fokot apleach
ganvant, apleach ghorabeant, ani apleach soiream-dhaiream modem man nam,
MK.6:4). Goa, Goan, Goans osleo sabhar Goykarancheo sonstha Kuveittan asat.
Shri Rosary Ferns sonvsarik famad celebrity nhoi asot, punn; Gõyche Konknni
somudaye modem tannem rong machier zaitem kelam mhunn, fattlea mhoineant Kala
Mogui-Kuwait hannim, lokam ujir
Shri Rosary-chem bhovman kelam. Punn tacho vavr tiatravelean Bharoti
prantantlea dusrea lokam meren pavlo mhunn, Kuveitt-Goykaranchi khoinchi
sonvstha, sorv subhagi monant tacho sotkar kortoli? Hem mat hanv polloit
astolom..
Vichar
WELFARE mhonnchem kitem?
Anik ek motti gozal mhonlear WELFARE hea sobdacho orth porchea Sunkrarak mhaka
sarko kollun ailo. KCWA-cho boroch pezad (mhonnchem; khubuch jahiritin ani
borpavollin bhorlolo) yadostik (souvenir) mhojea hatant poddlo. KCWA (1988
vorsant) suru korpacho ud’dhex (purpose) mhonlear Karnatak Rajeant, Canara
prantan aslolea durbollea iskolache bhurgeank funkot mhullavem xikxonn divnk
mozot korop. (1) Poor Children’s Education Fund sumar 160 Institutions Canara
prantan manddavoll kelea ani 75 lakh rupianche nidhi ruzop zalam. (2) St. Agnes
Special School, Mungllur, Bendor prantant Computer Eduction School panglea
bhurgeam khatir 38.5 lakh rupiancho khorch kela. (3) Munglurche Bispachea
odhikarkhallachea vattaran (diocese) dog borea gunnvon (meritorious) xikpeank
St. Joseph’s Engineering College-int xikunk 10 lakh rupeanchi sodankhallachi
Scholarship toyear kelea. (4) Venur pratant aslolea Christraj Navachetan
Special School-ak 5 lakh rupianchi dengi
dilyea ani thoim Ursuine Franciscan Education Society hasreakhall konn naslole
bhurgeank asro mellta. (5) Kumbla prantan St. Monica Eductional Institutions
mhulavem iskol bandche khatir 5 lakh rupiancho adhar. (6) Sabar monisponnachi
doyea vixim (towards various humanitarian intentions) 18 lakh rupiancho khorch
kela. (7) Chalu 2010 vorsan Bharotan ani Kuveitan xikxonn ani monisponnache
doyea khatir sogllo mellun 1.66 krut (crore) KCWA-achi dengi pavtti zalea.
Anikui yevzonni fuddem vorcheleo chalu asat.
Zabab:
WELFARE mhonnchem: Organized efforts to ensure people’s well-being. Oi! Kuwait
Canara WELFARE Association-a koddlean Gõykaramni zaitem xikchem asa.
Lino B. Dourado
http://aitaracheokaskuleo.blogspot.com/
