Gharwali Sovai Baharwali Marog Kaim sumana fattim perim zhaddam graunddar (Kuveitt, SportCenter graunddar khubuch perimchim zhaddam aslolean, hanvem voilem nanv dil’lem asa)eke futtbol finalik ghel’lom. Graunddar entry martanch game suru zali. Mhojea lagsoruch aslolea eka mon’xacho mobile fon vazlo. Fonacher nodor ghalit, tachea dhavea bazun aslolea mon’xak (ixtt kai?) tannem sanglem.
“Goyam thavn, bailecho missed call” “Ho poi Camil (nanv bodol’lam) asa. To net-fon dita.”, tagelea ixttan kolloilem “Hei-i Camil. Fon di re.” Lagim sorun Camilan taka fon dilo. Tannem mobilavele ankdde pushed kele ani kanank laun ulovpachi girin chalu keli. Hat haloit ani hanga-thoim pasoyeo marit tachem zoran ulovpachem chalu astona, futtbol khellgoddi graunddar bolak gholloitat te toren kaim fattleo yadi mhojea bezean ghollounk lagleo. Survatekuch (bazarant cell-phone nasle vo nanvuch aikunk nam tednam) dor eka minutak 600 fils KuwaitTelecommunication-achi dor (rate) asli. Chodd ghorjecheach kam’ aslearuch tea tempar ghorcheank fon korchelo aslo. Thoddem odik uloitolo zalear, 5 dinaranchem kard pavo naslem. Konnem tori lip-choriam bekaidexir (illegal) unddi call 250 filsan suru kelem. Fon korpak, lokachi tea-tea lip-choriam zagear ghorddi zaunk lagli. Kuveittchea sorkarak hea kaidhebhailea donddeachi khobor melltoch, 600 filsanchi dor 300 filsar haddli. Internet multi media ani bazarant novim-novim VOIP (Voice Over Internet Protocol) him sadnam chalu zaunk laglim tednam mat, KuwaitTelecommunication-achi dor 150 filsancher pavli. Punn fon korpi khoxi zaleat kay? Netfon-achi survatechi dor eka minutak 100 filsancher asli ti atam chodduch kompotation pettlam dekhun somptich 15 filsancher dhenvlea ani thodde zagear 10 filsan asa mhunn kanavelean haddlun ghelam. Adim 600 filsan call aslem tednam Goyant dor sumanank tin pavtti odik fon kortolo monis duddvamni boroch pezad mhunn somzotale. Punn atam disantlean tin pavtti fon kelolo mhunn sanglear, rokddech cheap vichar kortat. Pondra vo dha filsancho? Amche koddsun dha metram pois jetan baile thaim fonar ulovpi monis amche dixen yevnk laglo. Futtbol khellacho orddo somoi vo half-time zavncho vell zal’lo. Punn tannem mat aplem net communication chaluch dovorlolem. Ami ube aslole zagear yevn to thamblo tedna, portean tacho mobile fon vazlo. Vaztolo fon konnacho to pollelo ani bond korun bolsan lotlo. “Borem asa. Bayek novim saikoll ghevn di. Mapxemche kumarik vicharlam mhunn sang. Sunday koll kortam. Borem bhaxen. Fon bond kortam ham”, ani fon bond kortana taka porthean ek missed call ailem. Bolsantlo mobile bhair kaddtana tannem tonddantuch gunngunnlem. Hachem taplam kitem? itlean refrin piluk marun khellacho half-time zalo mhunn kollit kelem. Fonavaleak vicharun kullkullit 600 fils tannem duddu farik kele. Mhontoch 15 filsan kontt kelear 40 minutam uloilo nhi to? Ani hench foncall eka minutak 600 fils aslolea tempar kelolem zalear, ubech 24 Kuveitti dinar zata asle mhu? Futtbol khellacho dusro half-time suru zalo. Laginch aslole eke kodelir vochun hanv boslom. Tovui-i yevn mhaka tekhun aslole kodelir aple kulle tenkoitana, tannem bolsantlo mobile fon bhair kaddlo. Hanvem mhojea monantuch mhonnlem. Futtboll khellacho poilo half-time Goyant uloun sarlo ani atam dusro half-time konnam lagim chakatam martolo kai? Tannem sottasot fonachem button dhamle ani mhonnlem. “Koxem asa tum? Kiteak missed call ditalem? Bexttoch mhonnchem? Ugddas ailo? Itlo vell konnam thaim uloitalo? Goyant baile thaim. Kitem mhonllem? Tuka kaluch fon kelolo hanvem. Porthean-porthean tuka mobilavelean fon korpak kitlem marog poddta, hem zanai mu tum? Bailek fon korpak minutak 15 fils poddtat ani tuje thaim ulovpak minutak 40 fils. Tum chodd marog…Hallo…hallo…” Lino B. Dourado http://aitaracheokaskuleo.blogspot.com/
