S. M. Borges hankam zabab “Romi Konknni” – Soglleo Fotti! Ekuch Sot!!
( Chotrai: Ho zabab hanvem V. Ixtt hea satolleak daddlolo. To tea satolleacher chhapun ailo punn kaim mhotvachim vak’kyam chhapinastana dovorlim mhunn toch zabab atam vachpeancher nodrek haddtam – Tomazinho Cardozo)
S. M. Borges baban boroiloli chitt vachli ani sodam porim to fotti sangon sot mhunn dakhovpacho proitn tem matr sarkem sid’dh zalem. Tachea borovpacho niyall kelear tantun chodd fotti sampoddta. Ani zaunk saiba tantun ek punn sot asa. Dekhik to mhunntta:
(1) Poili fott: “Tomazinho baban sabar pavtti mhonnlolem asa ki Okhil Bharotiy Konknni Porixodek Romi lipint borovpi vochonant, dekhun thoim ghetil’le tharav soglê Konknni porjeche mhunn manun gheunk to toyar na.” Oi tem hanvem mhunttlam ani ataim mhunttam. To tea fuddem boroita, “ Zalear to atam hea apnnalea sommelonanchi khobor korta tedna thoinche tharav soglê Romi lipint Konknni vachpi porjeche mhunn tori manun ghevpache?” Hanvem oxem khoim mhunttlam re Borges bab? Borges bab anik ek fottinchem bogllant mhojer ghalunk sodta mhunn hanga sid’dh zata.
(2) Dusri fott: Borges bab mhunntta, “Ek pustok-prodorxon legun dovrunk tanklem na!” Thoinsor pustok-prodorxonn aslem tem soglleamni polloilam ani tea pustok prodorxonnache fottu poriant porgott zalole asa. Fokt Borges babak tem disonk na. Tannem aplea dolleank fottinchim oklam ghatleant tim kaddlea xivai Romi lipintle Konknni vixim taka sogllem urfattench distolem mhunn mhaka khatri asa.
(3) Tisri fott” To mhunntta, “1988 vorsa, somplolo Pri. Freddy J. Da Costa, Dalgado Konknni Akademicho odheokx asun tannem eka ‘Press Note’-ant ‘Roman Konkani’ him utram vaporlolim khoim. Hem sot zaunkuch xokona.” Puravo mhunn mhoje lagim somplolea Fr. Freddy-n soi kelolem tem potrok asa. Tacher tem sogllem spoxtt zata. “Hem sot zaunkuch xokona” mhunnon Borges bab fottinche bunheadicher aplem ‘arguments’ okhondd korunk sodhta kai?
(4) Chovti fott: “Romi Konknni” hea xobdacher adharun kaim lok amchim khebaddam kortat zalear, tacher upay mhunn, ami tem nanv bôdlop? Toxem kelear khebaddam komi zatolim?” Hanvem mhojea borovpant ‘khebaddam’ ho shobd vaprunkuch na. Hanvem “arop’ ho shobd vapurla. ‘Arop’ asa to ‘khebaddam’ mhunn boroun sot kitem tem dampun fott vhoir kaddpachi Borges bab tozvit korta kai?
(5) Panchvi fott: “‘Roman Konkani’ hem Sunday Times-chea editor-an ghalem khoim. Editor eka ‘article’acho mathallo bodolta? Chhapun ailolo to ek ‘press release’ vô ‘interview’ aslolo zalear somzum-ietalem. Tea bhair toch lekh internet-arui kitleaxeach thollancher, heach mathalleakhal, uzvadda ailo.” Inglez potrancher niamit lekh boroupachi Borges babak sondhi mellonk na tea khatir ho taka onnubhov na oxem mhaka dista. Punn noko astana aplench pemprem vazovop mhunnchem sot dhampoun fottik vhoir kaddpache proitn korop. Onbhov aslolea lekhokham lagim vo Inglez potrachea sompadpea lagim mahiti gheun Borges baban aple arop kelole zalear apnnem sangllea ti fott sotuch asa mhunn bob marcho naslo. Tea fuddem hoch Borges bab ‘toch lekh’ internet-tar aila mhunntta. Toch lekh asa zalear to dusare bhoxen koso yetolo tor? Tosoch yetolo nhoi? Hanvem zo lekh Times of India haka daddlolo tachi proti zai zalear mhojean konnakui diunk zata. Bogor bogor fotti sangleo mhunn tem sot zaina Borges bab.
(6) Ekuch sot: Ani akhrek Borges babache te chittint ekuch sot asa. To oxem mhunntta, “Soglech rajkarnni eleisanvak bosonant ani eleisanvak bostat titlei rajkarnni nastat.” Borges babachem hem vakya khorench sot asa. Dusrea utramni hanvuch nhoi punn Borges babui ek rajkarnni asa. Somplolo Nikita Khrushchev, USSR hacho adlo Prime Minister rajkarnnea vhoir uloun oxem mhunttlam, “ Politicians are the same all over. They promise to build bridges, even where there are no rivers” Rajkarnni lok fotting ani bondolist astat mhunn hea nivedhanantleant sarkem dakholl zata. Ani fotti marpachea kar’yan, vhoir dakhoilam tea pormonnem, Borges bab tor sarko kurtid asa ani tea khatir to rajkarnnich na punn ek ‘mharajkarnni’ asa mhunttlear fott zanvchina.
Ani akhrek Borges babak ugddas kortam. “Romi Konknni” hea shobdam vixim tannem oxem mhunttlolem, “Tor ho xobd poilech pavtti vaporpi boroinnar konn aslo kai? Soroll zap: “Tomazinho Cardozo.” Hanv poiloch mhunn provar korunk zalem na punn apnnem fott marli ani aplo ghuneanv zalo mnhunn sobhemazar sangpak matr Borges baba lagim ghodlem na. Khorench mharajkarnni to!
Fottinchem zoit kednanch zaunchena mhunn mhaka khatri asa. Tomazinho Cardozo Candolim, Goy.
