Bebddeak, Devachi Savlli Ambea MhuLlant Dis Aitar. Sat voram vazlolim. Bail-bhurgeam vangddam Jezuchem dhorxonn ghevnk vadeantlea kopelan vochunk bhair sorlolom. Mukhi rostear eka ambea zhadda mhullant mhoji nodor thorli. Thoimsor ek modlea piyrayecho daddlo bosun aslo. Rosteavelea dhulan mhottvem khalsanv ordem mhellem zalear, tache angar pinzkurem baniyen aslem. Hanga-thoim piklolem lamb kens, khadd ani payank roborachim zottim. Tacho bhes khub churchureancho diso. Tachi nodor amcher poddona borobor, eka hatant dortoricho adhar ghevn utthlo. Zumzumit varear zhaddanche khandde haltat-doltat toxe toren to hallunk laglo. Oi! To sokall fuddench soro piyela mhunn kolltalem. To khoinsor bosla ani kitem korta taka zanniv nasli. To ek bebddo aslo. Misachi bhett 7.15 vorar suru zaunchi asli. Dekhun amchi cholpachi gotti (speed) vaddli. “Lawry bab”, oxem mhojem nanv ghetloleacho avaz mhojea kanar poddlo. Pattim volun mhoji nodor tea bebddeacher ghatli ten’na mhaka kollun ailem tannench mhaka voddkiloso. Halot-dolot-lokot amchea samkara ubo zalo. “Lawry bab…” , tachem aikochem soddun taka vicharlem. “Tum konn?” “Hanv konn to tuka uprant sangtam. Tumi itlea sokallim khoim vetat?” “Tuka khobor nam, aiz Aitar mhonnon?” “Zannam hanv. Aiz Aitar mhunn. Punn tumi edeya vellar vetat khoim?” Soreachea gunddear astona taka hanvem kitem mhunn zap divnchi asli? Ani dil’li bhi zalear hea poristithircher tachea toklen tori vechi? Hanvem taka mhonnlem “Ami Devak mellunk vetat” Ho mhozo zabab aikun bebddo mottean hanslo. “Devak mellunk vetat? Vochat. Ani Dev melltoch mhaka yevn mellat. Ek sang. Dev khoim asa?” Taka noikarun, ami kopelachi vatt dorli. Mis sopun porot ghora yetana tea ambea mhullant nodor ghatli, punn bebddo thoim naslo. Konn kay to? Tacho ganv khoincho ani to mhaka ani tenvuim zalear mhojea nanvan ollkota? Hea vicharamni mhojem mon guspollan poddlem. Dev khoim asa? He tache tin sobd mhojea kanar bhitor sorun mhojem xant mon uchabollan bhorlem. Tache tin sade sobd punn tacher thonddayen nyall kelear zanvayeche sobd koxe mhaka disle. To bebddo mhaka porot mell’lo zalear, taka koslo zabab dinvcho, hea prosnachea somdiran buskelom. Somdirant lhan vhodd lharam yevn koddpancher bosun ozar udka tembe ximpodttat toslinch mhojea monantlim lharam yevn mhojea kopalache toddir futllim punn zap mat mellunk nam. Tachea nenarponnachea vicharak mhozo xanneponnachi zap mhaka koxi melot? Ek dis nokrecho ghora yetana tea ambea mhullant fatracher bosun konn tori eklo pustok vachtolo, mhoje nodrek zollkolo. Ani toch bebddo ghoddie zait oso odmas korun, hanv lagim sorlom zalear mhojem gonnit sarkem zalem. Az to soreachea nadar asunk na ani angarui nitoll kopdde aslole hanvem pollele. Pustok vachtona kitem tori to monantlea monan gunngunntalo. Mhaka pollevn utthlo ani mhojea bholaikechi khobor ghetli. “Asa borom. Punn tum konn ami mhaka koso ollkotay??” “Dev khoim asa ho prons, pondra dis fattim tuka kelolo toch bebddo hanv.” “Ollkila tuka hanvem. Punn mhaka ek zannom zaunk zai tujem nanv ani tum khoincho ganvcho poi to” “Mhojem nanv Bosteanv, punn lok mhottvea nanvan mhaka Bostu mhonntat. Ak’koch Kepemcho ganv mhaka Bostu bebddo mhontlear ollkotat. “Toxem zalear tum amcheach ganvcho?” “Oi! Hanv tuje bhoxen Kepemkar. Tuka, hanv bhes boro ollkotam. Punn tunch hea bebddeak ollkunk visorta. Mhojea vicharak tunvem zabab haddla?” ”Nam. Azun meren boroso zabab mellunk nam” “Naka mhaka tuzo zabab. Tuka vicharlolea prosnachi zap mhaka mell’li ani aiz tuka sangtam. Fattlim kaim vorsam soro ek devuch koso hanvem manddlolo. Kiteak, mhojem ekui kam’ monam purtem zaunk naslem. Mhoje bebddikayen, mhaka nokrecho kaddlolo. Charui konxeamni odruxtt bhitor sorlolem ani hem sogllem sosunk nezo zaun hanv soreacho gulam zalom. Mhojea jivitacho adhar zalo soro. Dev mhontlolo nam. Dev aslolo zalear mhojer odruxttachim kupam yevn hanv kalloki jivit jiyepacho nhoi aslo oxem mhaka poilim yevzotalem, punn auchit ghelea Aitara mhojea panch vorsanchea putan mhojea monancher uzvadd ghatlo. Aplea dortonichem pustok haddun mhojea hatant dilem. Dotorn xikovpi tticher, taka oso prosn ghatlolo. “Where is God?” Hea vicharachi zap magloli. Puta ani mhojea sovem oxi chorcha zali” “Daddy sang nhoi dev khoim asa poi to?” Putan anekdam vichar kelo. “Mhaka poddunk nam tujea devachem. Dev mhontlolo nam.” “Zori havem zap borounk nam zalear fuddlea Aitarak tticher mhaka punishment ditoli” “Tuka zai tem boroi”, dengso ghalun tachem pustok taka dilem, ani tem ghevn eka konxak bosun kitem tori borovpak laglo. Boroun somplea uprant to mhojemxim ailo. “Daddy, hanvem dil’li zap sarki asa vo na tem matxe polle”, mhojea hatant ghalolea pustokar boroiloli zap God is nowhere (dev khoinsorunch nam) vachtana to fuddem uloilo. “Daddy, tuvem sanglam toxench hanvem boroilam” Ghontlolo soro mhojea tokler choddun aslo. Pustokar boroilolim okxoram muyeo (ants) zololea porim voir sokoll dhanvtalim. Mhoje dolle motte korun, putan kitem boroilam tem porot ekdam vachlem. Hea vellar nowhere ho sobd doxim zatolea vo halltolea porim mhaka dislem. God is now here (Dev hanga asa) Hea vellar monacher ek zoglavnem marun tokler choddlolo sorea dev sokoll aptolo. Mhonnchem, mhozo soro denvlo. Dev amchech modim ravta oxem mhaka somzun ailem. Ten’na mhojea putak vegen ghevn somzailo. “Baba, God is nowhereoxem boroinaka. Tuvem boroiloli zap doxim (split) kor ani he toren boroi God is now here. Ani tunvem dil’li mhottvi punn xanneponnachi zap tuje tticherik ojapun ghaltoli. Itlim vorsam Dev na mhuntalom, to Dev aiz mhojea putachea rupan mhojea samkara. Ghorabean sukh ani khuxealponnachem varo porttean marunk laglo. Khalloki jivitacher uzvaddachim kirnnam fakorunk laglim. Sorean, khorea Devak pois kel’lo. Dev amcheach modim asa. Dev mhollear ek super natural power. Ek svas ani tech natural power-an hi dorti udok, varem, uzvadd, kalok ani privicheo soglleo rochna tannench rochleat ani xevottak monis zat. Hoi takach ami Dev mhunn manddtat. Povitr pustokak oxim utram meltat. and the word was made flesh’ mhunnchem, tech svasan monis soimb rochlem. Ambea mhullant vaddol-moddam porim haltolea bebddealim zanvayechi utram aikon hanv thoktaklom. Hi tachi jivitachi kanni aikon urlole dis sukhache zaunk ani Devacher visvas dovorunk taka vinnoilem. To apnnale vatten ghelo ani hanv mhoje vatten ghora portotona, mhaka dislem, koreaninch tea bebddeak, Devachi savlli ambea mhullant favli. Lawry Fernandes Kepem-Kuwait
