Mar Re *?* Mar re *?* Mar re, mar re,ho boball kalchea Budhvarak, (Abril 28ver, 2010 ) Kuveitt Sporting Club (Kheifan) graunddar Churchill Brothers ani Kuwait Sports Club hanchea modim Asian Football Championship (AFC) khatir, donui ttimi khelltana, konn tori ek Gõykar vhoddlea avazan aroddtalo. Taka dusrea eka Gõykaran zab dili. Aare, tum mottea boballan mar re mar rearoddta tem somzunk, Churchill Brothers ttimink kitle Gõykar khelltat papia? Hea tagelea vicharan, khoim tori mhaka vhorun korkottolea ghoddolant xen’noilo. Zaum te Vasco Club, Salgaokar, Dempo, Sesa Goa, Goa Shipyard adi, adi heo Gõycheo futtbol ttimi futtbol graunddar khelltana, tea-tea ttimichea lok-priya player-aranchim nanvam ghevn futtboll mogi vhoddlean aroddtale. Come on Bernard, come on Machado, xabas Gobro, dhor re taka Katoa, pettoy Visitasanv, dam re Alcantr ani sabar nanvoste khellgoddeanchim nanvan vichirt toren udgarun futtbol moiddanam ghazoitalim. Punn kalchea Budhvarak, Churchill Brothers ttimiche eklaiy-i khellgoddeachea nanvan, voir sangil’lea porim avaz zaunk nam tem pollevn, futtbol khell pollevnk ail’lea hozaram voir Gõykarank zoborxem ojeap dislem. Thoddeamni fokot, Churchill Brothers futtbol klubachem nanv aikolam punn players choddan chodd bhaile asat hem mat nemnant. Gol rakpi (Goalkeeper) Arindam Bhattacharya ani defence khellpi Gounmangi Singh, Robert Lalthamba, Naoba Singh, Rowilson Rodrigues (Goykar?), modekat vo mid-field khellpi Kalu, Murali, Nascinmento Silveira (Goykar?), Lalrindika Ralte ani forward vo gol topchea zagear khellpi Jaison ani Felix Vhimaokw. Him nanvam Goykarank ollkichim? Ani dekhunuch, adle toren topp re Bruno, ghal re Alvito, petoi re Soccor osle famad Goychea khellgoddeanchi vonttar khelltolim nanvam kalchea Budhvarak, Churchill Brothers ttim khelltana, lok mhonnonkuch urle, mar re, *?* mar re *?* (1) Ek Vichar Navelim Youth Center-achea xevottachea vo finalik mhukell soire khoxe Gõyche PWD Montri Churchill-bab Alemao, boddayen uloile. Adle futtbol khellgoddeank panch hozar eka season-ank farik kortale punn atam lakh-krutamni ami farik kortat dekhun aiz amchi ttim (Churchill Bros.)Indieachea unchlea panvddear pavlea. Churchillbab, hatunt tumgelem sot asot, punn tech lakh rupia tumi adim thavn Gõychea khellgoddeank farik kell’le zalear, tumche ttimink khellpi boreantlea Goykar players tumche futtbol klub soddun redde-panddeanchea fattlean donddea khatir danvche asle?. Hem tumi, kalchea disa tumcheach tonddan sanglam mu? (2) Tisro gheta lav Kuveittchea Gõykarank kalcho Sunkrar, ek itihasik (lojechi kai?) 2010, Abrilache 30tis, tarik ugddasachi urtoli. Hea adim ken’nanch ekach disa don futtbol finali khellunk nant, tem kalchea Sunkrarak Gõykaramni korun dakhoilem. Xebas! Mar re, mar re TALLIO. Ani hacho faido konn gheta ani ghetolo? Eka famad kovichi mhaka yad zata. To aple koviten mhonnta. Kav-kav, zhogottat bhav-bhav. Tisro gheta lav. Kai borele xannim Gõyche Montri amgele? Sokalchea adesak Kuwait Telecommunication graunddar IFFK- an ghoddoun haddlolea knockout tournament-an mukhel soire koxe Gõyche Tourism Montri Micky Pacheco uloile. Don zome korchea bodla ekuch zomo korun ekvottan vavurlear chodd borem. Sanjechea adesak perim graunddar (Shaba Sports Center) KIFF-chea hasrea khall Navelim Youth Center-an ghoddoun haddlolea tournamentant mhukell pavnne koxe Gõyche PWD Montri Churchill Alemao udgarle. Goykaramni ekvott samballpachi goroz. Don-don federation-am korchi goroz nam. Va va Micky ani Churchillbab. Tumi, ekvottacho usko dakhoitat ani teach borobor donui pontteamni vo diveamni tel ottoun duspottachi agtti zoloit dovorchem, ho tumcho bhitorlo agenda?. Tumchi rajkarnni chal hangasorui chalu keloli pollevn thoddea niz Kuveitt-Goykaranchim kallzam dukhin vilaplim. IFFK ani KIFF-ak adle toren ek korchea bodla tumi donui vatteantlean fuddlo tournament cholovpak sponsor kortole mhunn avasan dilam ani Federation vangddeamni tem svikar kelem mhunn, ekvottak axelole Kuveittche Gõykar lojen buddle. Oi! Adhava vinnem konn xidi foddna (without gain, no one endures pain). Oxem korun tumkam kitlo lav zatolo hea tumchea rajkornni chal amkam kitem tori xikoita. Khorench tumkam Gõycho mog ani Gõykaranchea ekvottacho usko aslolo zalear hangasor don zal’lim futtbol federation-am ek korpak tumcho poilo vavr zaun astolo aslo, ani chodd korun Churchill babacho. Kiteak, to ek futtbol klub choloita. Azun vell asa. Donui zomechea zababddari vangddeank ekthaim haddche ani Kuveittche-Goykar axeleat te toren EKVOTTACHI khuxi palchi. Na tor tumchi sponsorship nisurtolea terea pannacher dovorlolea porim zait. Mogacheanom. Ek kanni hanvem vachleli. Ti tumkam vachunk ditam. Mon divn vachat. Tichem nanv: Tisro Gheta Lav Ek Xinv ani ek Randukor dogui sangata udok piyeunk nhõycher pavle. Dogui ekamekak polleun tiddle, ani konne udok poilem piyeunchem hache vixim tanche modem vad suru zalo. Kaim vellan hea vadan zhogddeachem rup ghetlem. Utrak utor vaddun zhogddem maramaricher pavlem. Zhogddun zhogddun samke jam' zaun poddchea vellar tanchi nodor thoim gitt'tteo ghaltolea Gidhancher geli. Dogaim modlo konn moron poddta kai mhonn te vatt polletale. Hem polleun Randukor ani Xinv dogui sabud'dir aile ani zhogddim thamboun dogaimni ixttagot korpachem chintlem. Tannim mhollem "Gidh ani Kavlleanchem jevonn zaunche poros ami dogaimni ixttagot kelear chodd bori." Dogam modlim zhogddim ani vaittponn vell astanach sompoyna zalear, tisreacho lav zata. Lino B. Dourado http://aitaracheokaskuleo.blogspot.com/
