Amche ‘Self-styled’ Som’padpi! - II
Romi lipientlean Konknnichi anik-ui udorgot zaunchi mhonn Dalgado Konknni Akademik (DKA) sorkara koddchean onudan (grants) mellonk lagot porian, don gozali ghoddunk lagleat – Poili, Romi lipientlean Konknnicho zo anik-ui vavr zaunk zai aslo to atam aste-aste fuddem veta. Dusri gozal, DKA-k sorkari onudan favlam mhonn jahir zalam tea disa thavn tem aiz meren khubxea zannank he gozalichi jirvonnuch zaina. Hanche modem ‘fokot Devnagori’ mhonnpi bhoktancho aspav asa to zaloch, punn vichitr mhonnlear Romi lipientlea kaim masikanchea som’padpeancho-i aspav asa… …. dekunuch, bara mhoineantlean chovis pavtti tanchea masik-mhoinealleantlea ogrlekhantlean vo lekhantlean directly vo indirectly DKA add vikh onkhlolem… pois ravun DKA-cher fator xevttilole… DKA vixim sot nasloleo gozali…. adi. vachunk melltat. Oxe ritin te dolle dhampun don gozali korunk panvlam fuddem ghaltat – Poili gozal, Romi lipientlean Konknni mollar DKA zo vavr korta taka addkholl ghalpacho khottpott, ani dusri gozal, lokanchea monant goir-somoz nirmann korop. Heo don-ui khunnam kherit bhaxen Romi lipientlea Konknni masikamni dison yevop boreachim lokxonnam nhoi. DKA-k sorkarachem onudan mellonk suru zaunche poilim, DKA-chem konnakuch poddon gelolem naslem. DKA-chi konnuch khobor korinaslo. DKA-cher konnuch kainch, borem naka zaum, vankddem legit borounk (eka masikan ekdam DKA-chea eka sekretarachi mulakhat ghetloli to opvad - exception - soddlo zalear) vochonaslo. DKA-cho konnakuch kosloch forok poddonaslo. DKA-cho konnakuch kosloch husko naslo….. ..…ani khub arthik vorsam (financial years) sorkara kodde oundan magot aslole DKA-k okosmat eka vorsa sorkar onudan diun tichea vavrak maneotay dita tednam, eke ratin DKA Romi lipientlea kaim masik-potramni negative ritin limelight-ik yeta… DKA-cher buniyad naslole arop zatat… DKA-chim podam-sutram samballtana DKA-cho vavr fuddem vhorunk opangull zaloleank-ui sorkarachem onudan melltoch okosmat DKA-cho interest yeunk lagta…. Sogllem vichitruch ghoddonk lagta… Romi lipientlean Konknnicho vavr anik-ui nettan zauncho mhonn sorkaran DKA-k dilolem onudan tor kaim som’padpeank ‘lolipopam’ distat; punn tech som’padpi aplea masik-mhoinealleank sorkaracheo jairati magtat ani ghetat tednam tankam teo jairati mat ‘lolipopam’ disonant. Kiteak kai…? DKA jednam kosleo-i karyavolli ghoddun haddta tednam Romi lipientlea kaim Konknni masik-potranchea som’padpeank dusreanchea sangnneamvelean tea karyavollintlim ‘unneponnam’ disun yetat…. Ani tea ‘unneponn’-anchim karonnam khobor nastona he som’padpi aplea ogrlekhantlean apnnak dista toselem ‘fanciful’ boroup kortat… ordkuttem second hand information-acher adarun… apnnem ‘First Hand Information’ gheun boroylolea porim… Toxem polleunk gelear, aiz Romi lipientlean Konknnichim potram-masikam choloitolea thoddea som’padpeank Romi lipientlean zaupi karyavollink hajir zaunk vell asona…. Tea khatir vell-ui kaddunk tanche thaim ghoddona… dekunuch Romi lipientlean jeo karyavolli zatat tea karyavollink te hajir asonant…. He vixim kitem ‘fanciful’ chintpachem? Romi lipientlean Konknnichi udorgot zatoli, ani “Romi lipi Rajbhas Kaideant” ghalpachi mokh follak yetoli zalear, poile-voile suvater Romi lipientlea Konknni sonvstham odhikareancho-vangddeancho, masik-potranchea som’padpeancho, boroupeancho, te bhaxechi veg-vegllea angamni ani mollamni seva kortoleancho ekvott asop chodd gorjechem. Tanche modem bhaxeche udorgoti ani her vixoyam som’bondan bhasa-bhas, uloup, yeuzonno, zomateo zavop gorjechem. Romi lipentlean Konknni mollar zonn-zonn ek-eklean aple porim vavrunk zaich, punn ekamekachea sangatan ani ekvottan-ui vavrop tea von mhotvachem. Tednach hea mollar yes (success) yetolem. Ani hem yes melloupacho pon’nas tok’ke vavr amchea som’padpeanchea ani potram-masikancher dhorlolo asa. Dekun, tannim Romi lipientlea Konknni mollar moddun uddoupacho nhoi, punn ghoddun haddpacho vavr korpachi goroz asa. Mhonnonuch, apunn Romi lipientlea jea Konknni masik-potranche som’padpi asat tantuntlean tannim Romi lipientle Konknnichi udorgot korpachea vavracher chodd bhor diupachi goroz asa, ani tem kam’ korta-korta Romi lipieche chollvollechi-i vatt aple porim toyar korunk zai. Tea khatir tannim, ‘First Hand Report’ mellounchea hetun Romi lipiechea Konknni karyavollink hajir zaunk zai… tea karyavollink hajir aslolea monancho thav gheunk zai… tanchea chintnam-ulounneancho analysis korun Romi lipieche chollvollechi vatt toyar korpache vatten panvalm ghalunk mozot korunk zai. Dusrea utramni, Romi lipientlean Romi lipientlech Konknnicheo tisteo-vadreo korunk aplo vell nuksann korinastana Konknni mollar vibrant journalism-achi survat korunk zai. Jose Salvador Fernandes
