POILEM TANTEM VO KOMBI? Zaite pavtti hanvem boroilam, ani aiz-ui anik ek favtti boroun yad kortam, "jea mon’xak pixeaponnam somzona, taka xanneaponnacho orth kollona". Pixeaponn ani xanneponn donui veg-vegle gunn mon’xachea jivitan astat, punn konnuch monis pixeaponnam adarunk fuddem sorona. Apunn kitem korta ani kortolo tem ek xanneponnuch zatolem mhunn, hea nirnoyacher ghott ravun aplem kam’ purem korunk fuddem sortat.
Adle vhodd 'Scientist' ani 'Philosopher' ap-aplea xrestan novi sod korchea khatir dis-rat apleachea vavran gull zal’le astale. Xevottak, tancho vavr sufoll zatoch tanche khuxeallkayek xim ani mer asonasli. Ekdanch pixe koxe zatale. Oslich ek goxtt, nhanient udik nhanvunk ghel’le kodden khubuch tempavelem gonit law of floatation sodun kaddlem teddnam, Greek scholar Archimedes, khuxechea nadar Syracuse mhonttlolea xarantlea rosteavelean nagdoch ‘EUREKA, EUREKA’ mhunnit dhavnunk laglolo. Chalis dis ani chalis rati ghosghoxeamni pavs zhoddoun prithvivelo papi sonstechem nas kortolo mhunn, sonvsar rochpi Bapan, ek Ark vo tarum bandun ani tantunt Noah-an, taka, ani tache bailek, tache putank ani sunnank bhitor rigoun, ani jinsavar pranni zatichem ek-ek jodem jivi rochnna ani zomnir sorpotun vochpi jiv, nar ani nari (male ani female) koxim bhitor ghevn tancho samball korunk, Devan Noah-k sanglolem. Goddie zait, ek kombi ani kombo Noah-chea tarvant bhitor sorlolim tednam thavn, kombi poili mhunnadlephilosopher somzotale. Ani hakach lagon, sonvsar suru zalolo te meren aiz porian, amkam ekuch proxn dispottim sotayta. To mhonnlear, tantem poilem vo kombi poili? Hozar vorsam adim 'scientist' ani 'philosopher' hanim, tantem vo kombi poili, hache voir, bhasabhas kelea.. Koxe toren jiv asun vixv (universal) suru zalo hea vicharan purvile 'philosopher' guspolole. Zori tea vellar poilo monis aslo zalear, to zolman avoy-bapai vinem ailolo, jem soimban zaunk nezo aslem. Hea vicharancher, tantem poilem mhonnonk zainaslem. Monxa porim, suknnim poilim asunk xoktat, ani sukneamni tantiam dileant. Tori astona poilem kitem tem tharavpak konnancheanuch aiz meren hem umannem soddovlem (solved) nam. Punn! Zori tor hanvem tumkam sangot, amche ixtt Lapitt-an, itlea tempavelo voilo proxn sodoilo mhonllear, Lapittachea pixeaponnank hanstole? Rav, rav! Vachpachem soddum dinaka. Fuddem vach papia! Poirchea atthvoddean, Lapittagelea eka lagxil’lea ixttan (ganvan Agxecho, nokri Dubai korpi, suten Goem ailolo astona) fonar sanglem. Donparchem jevonn zatoch to matxe sodam porim bedir nidhunk ghel’le kodden chodduch tachea pottan chabunk laglem. Taka dislem, urta vo morta. Lapittache dotor ixtt zaite aslolean, boreaxea dotorachem nanv vicharunk mhunn tagelea Dubaikar ixttan fone kel’lo. Duensa pormonnem dotor astat. Tea khatir Lapittan, taka thodde proxn kele “Arre papia, pottant itlem chabunk, kitem paddelem khail’lem tunvem?” “Toxem kainch ek ruchi bhailem khavunk nam. Mhoje bholaikechi kitli kalji ghetam, hem tumi bhes bore zannont” “Zalear, itlem vegan tujea potant chabunk konn bhitor sorlo?” “Tech chintnamni hanv guspolam.” “Ek sang” “Vichar” “Sokallim nosteak (breakfast) kitem khailelem” “Half-fry tantiam” “Donporam jevnank” “Chikon” “Anik ekdam sang” “Mhoje bailen poslolim ghorchi fresh kombi khailoli hanvem” “EUREKA, EUREKA” “Mhonchem? Koslem duens zalam mhaka?” “Ixtta Dias, tugelea duesan, borech tempavelo proxn suttavo zalo” “Koslo?” “Aik! Sokalim tunvem tantim khailim ani donporam kombi. Monchem, poilem tantem uprant kombi. EUREKA EUREKA” “Arre hem Eureka tuka kiteak sotayta? Mhojea duensachi gozal kor mure papia” “Ekdom sopem. Voizagher vechi goroz nam. Tujem duens 21 disamni somptolem” “21vis disamni? Hanv fokot pondra disanchi sutti ghevn ailam. Itlem vhodd duens?" "Koslem duens mhagalem?" “Poilem tunvem tantiam khaileant.. Uprant kombi. Atam ti kombi tantiancher, mhonnche; rovnneank boslea. Ekvis (21) disam uprant mhaka portean fon kor…..EUREKA, EUREKA” Lino B. Dourado http://aitaracheokaskuleo.blogspot.com/
