2020 Vorsa Savn Oxe Toren Konknni Xikoitole.
“Bhurgeamno! Abril-May mhoineanchi lamb sutti sarlea uprant, az zavn asa tumcho tosoch mhozo poilo dis iskulant. Mhojem nanv Jyothi Varghese. Amchem kuttumb Kerelachem asonui mhaka amchi bhas, mhonnchem Malayalam vachunk nhoi mhunn borounk yenam. Kiteak? Hanv Gõyant zolmoleam. Konknni xikleam ani hanv zaun asam tumchi Konknni tticher.” “Tticher, tticher. Amkam ek vinod sang nhi?”, Laginch bankar bosun aslolea eka bhurgean mhonnlem “Tujem nanv kitem?”, tticherin vicharlem “Samkutty” “Polle Samkutty, tumi ghelea 40 odik dis movjen sarleat. Atam tumchem lokx obeaseacher asunk zai. Fokanddam korunk amkam dusro favo to vell asa. Poilem mhonnlear, ami Gõychea Sorkarachea upkaran asunk favo. Tannim amkam on-Gõykarank….” “Tticher,tticher. Tum Gõyant zolmololi mhunn sangta. Zalear, tum on-Gõykar koxi zata?” Eka videartean xidduk prosn kelo. “Tujem nanv?” “Raghunadhan” “Polle Raghunadhan! Tujea nanvam pormonnem mhaka dista tuzo avoy-bapui Karnatakacho. Sarkem?” “Oi tticher” “Tuzo avoy-bapui Gõyam keddna ani koxim pavlin hem mhaka zannam zaunk naka. Punn Gõyam yevn kam’ korun aplem udorposonn kelem ani tuka hea bore iskulan bhorti kelo. Ek zannam zavnk zai mhaka. Amche vorgant 35 bhurgeam modim khaxeallea Gõychea dotorevelim kitlim bhurgim asat tannin, hat vhoir kaddcho.” Panch zannache hat varear disle. “Pollelem? Fokot panchuch!” “Zalear tticher, klasint on-Gõykaranchi majority astona ami Konknni kiteak xikpachi?” Ayyappan vichar mandlo. “Gõy Xikxonn Khateche nem’ ani kaidea pormonnem amche xikxann bosoilolem asa. Adle toren satvi pas zal’le Xikxonn Montri atanchea Gõychea Sorkarachea Mondollant disonant. Adlo sorkar apnnalem kodel samballchea khatir bote, mhonnchem unnem xikop asloleank vhoddlem Montrimondoll samballpak ditalo. Tumchea avoy-bapaichem udorposonn Gõyam zata mhontoch Gõykaram bhaxen ami ghannti lok, khatat tatunt tukpi nhoi. Raghunadan ani Ayyappan somzotam tumchea vicharak zap mell’li mhunn” “Tticher, tticher. Konknni xikun koslo lab mellcho asa?” Vanitha-n proxn kelo. “Sorkari nokre khatir Konknni gorjechi. Dekhunuch, tumcho fuddar boro zaunk tumkam Konknni vorg xikunk poddta. Tea khatir tumchea ghorcheamni tumchem borem chintlam. Borem chintlam mhonllear ek yad zali. On-Gõykaranchem borem chintole Gõyche Montreank ami visronk favo nam. Tankam portean-portean nivddun haddun amche fuddari korunk zai. Adim ani atam porian ho ghantti mure, ti ghanttin mure mhunn hinnsavpi lokak, Varkenchea Shahenshah-an Gõykar dukram bhaxen roddtat mhunn hinnsailole asat. Amche lokak vavr mellchea khatir Gõyambor mega project chalu dovorlole. Save Goa. Save Ghantti lok. Motam mellchea khatiruch. Ham!” “Tticher, tticher. Tea Shahenshah-chem nanv kitem?” Haridasan vicharlem. “Kitem re Haridas? Kainch noko tum? To mure Church Hill”, Sukumaoran khub zanna zal’le bhaxen mhontlem. “Hey Sukumoran. Gõyant Church Hill nam. Moddganv Monte dongor zalear asa” Moddganvche Monti dogurlear ravpi Shardan mhonnlem “Puro, puro bhurgeamno! Atam voggi ravat. Monte dongor mhonnlear tumi mhaka anik ek yad keli. Monte nanvacho ek Khellam Montri Gõyant axill’lo. Havan vo challenge divn tannem so mhoinneam modim Fatorda ganvan Jawaharlal Nehru Stadium ubo kelo. To bandunk tea khallar Gõyant titlo kamdar naxill’lean tannem dusrea prantachea lokak kamank haddil’lo. Kam’ somplea uprant, hea vavraddeank porten tangelea ganvan daddche bodla tannem Gõyantuch hanga-thoim nokri korpak soddle ani ravpak Monti dogurlear zago dil’lo. Fatorda graundd bandtona, mhozo bap’pu Supervisor mhunn kam’ kori.” “Mhonntoch, ami Monte mhonntat taka borem magchem?”. Raani-n vicharlem. “Taka borem magchem magun ten’nache Mukhel Montri Kamatachi bhi puja korchi. Tannench zaun Monti dongor on-Gõykaranchea nanvar kelo. Ani apnachem vote bank samballun dovorlolem. Ek dis oxem ghoddlem, Kamatachi chorbi toklek choddun tannem khaxea Gõykaranchea motachi taka goroz nam mhunn tondd borun sangun Goykarank dukhoile” “Ixttamno! Tea khatir on-Gõykaram vatten zuztole rajkarnnank amchea vhoddilamni vichun kaddunk zai. Nhi ghe tticher?” Padmini udgarlem. “Anik ek motte kharan bhailea lokachem zoi-zoi zavpak” “Koslem?” voggich aslolea Shantin vicharlem. “Nagri ani Romi” “He konn? Babulbhav?” “Eka fullak dog mali ” “Mhonnchem. Eke choliek dog premi?”, Padmini ghonddollem “Ek full mhollear Konknni, dog mali mhonnlear Nagri ani Romi. Bharotache ghottneche 8ve vollerint Konknnik unchlo zago mellchea khatir khorele Konnnivadi zuzlele ten’na mottem yogdan Romi Konknnivaleanchem aslem khoim. Fevrerache 4ter 1987 vorsa Gõyche Vidhan Sobhen Gõychi Raj bhas, (Nagrivaleamni Romivaleank chikan korun) Devnagri lipin pas korun ghetli. Itlean vad-vivad suru zalo. Devnagri vangda Romi lipikui odhikrut maneotay magchea khatir, konn ekto mhonnta 1988, dusro boballta 1989 vorsa Dalgaddo Konknni Akademi (DKA) sthapli. Konknnichi udorgott korchea pasot Gõychea Sorkaran DKA-k onudhan dil’lem tem thodde Nagrivaleank je, Romi lipichea tovear bazpi punn Gõychi Rajbhas Devonagri lipien khavnk zai mhunn boballpi, hanchea pottan chablem. Ektoch monis DKA-cho chitnis, proofreader, editor, publisher, distributor kam’ polleta tem vattun divnchem mhunn Nagri Lipik support korteleancheo suchnna ail’leo. Akademi-n guspagonddol korunk Nagri mogeamni fuddem kaddlolea mon’xank, DKA-che vanttekar korche ani tanchim-i tonddan sorkari lolipopam ghalun bond korchi mhunn kaim borea mon’xamni, DKA-k funkott sol’lo dil’lo. Zori tor, tea vellar dogui mali ektthaim yevn mogan ani somzikayen Konknnichi udorgott kel’li zalear az khaxelea Gõykar apnnalea ganvant porki zavnche nasle. Bhaxea mhonnchem osmitay. Atam Konknni uloitolo Goykar thoddo zala ani ghantti lok subeij Konknni uloita. Bhurgeank Inglez iskulamni xikxann divn Portugez passport korun pordesant daddle ani amchea lokak Konkan Railvechi tikett kaddun Gõyant kam’ korunk haddle. Dekhunuch amchea mogan lastolea Montreachea upkaran ravtana ami Konknni lipik lagun zhogoddtoleank visrunk zainam” “Tticher, tticher…..” “Puro khorat anik tumche savall nakat. Pustok ugoddat ani chovttea pannar ZAYAT ZAGE vachat..” “Tticher, tticher nidhun konn asle?”, Samkuttyn-n vicharlem. “Chup! Anik savall nakat mhunn sanglam mu? Zayat Zage, hem ek omor git lokpriya kovi sorgest Manohar Sardesai baban boroil’lem ani Goem Shahir sorgest Ulhas Buyao hachea avazan gailolem. Hea gitan Gõychea xetkarank, mundkarank, zankarank, ganvkarank ekvottachem mondir bandun, vangdda jiyeunk, vangdda cholunk, vangdda vavrunk ulo maril’lo Punn tednnache Konknni malgodde fuddari……..” Intervalachi bel vazli ani pustokam dampun bhurgeamni bhair poll kaddli. Ani babddi tticher ektich klasint urli. Tika kitem tori mothvachem sangunk zai aslem. Punn aikotole konnuch nasle. Lino B. Dourado
