TINNEM Ratol KITEAK KHAILEM?
Tim xarant ravpi aslim. Kosloch husko nastana tanchem ravop, jevop ani khavop khoinchai vellar zatalem. Ghor-ghoramni vosun bukh marchi keddnach tankam goroz poddunk nasli. Tim ravtat thoimsor tancheo soglleo gorzo pureo zataleo. Punn halinchea mhoineamni bhailo lok Gõyant lottun dhenvun yeta tech toren, tanchi sonsot yevnk lagli ani ak’khea xar bhaile undranche poltonin bhorlem. Undrachi sangatin gorbest asli. Tichean sottasot ruchik jevonn sodunk zaina zalem ani mellta tem khavnchea vellar, ghantti undir, ti gorbest asa te churchure korinastona tika tras divnk lagle. Xarantleo vhodd imaroti choddunk tichea lagim zainam zalem. Tannim xar soddlem ani eka ganvant pollun gelim. Undrache sangatinink ekdom puro zalolem. Tichean anik fuddem vochun zainaslolean undran tika laginch aslolea ek lhanxea sulsi nolleanchea ghorant veli. Tim ekdam paddoxer vochun jivak thoddo visov mellchea khair boslim. Tanv-tanv korun igorjichi gantt vazli. Ghorantle ostoren bhitorlea khuddant asloleank bhair apoun amori chalu keli. Sumar char vorsanchea porachi nodor vhoir aslolea undrancher poddli. “Mummy, mummy…” porak fuddem ulounk dinastona aplea vonttancher bott dovorun voggo ravunk xiddkailo. Itlea mhonnosor vhoir aslolea undramni dusrea konxeak poll kaddli. Amori somptoch avoyn mhonnlem. “Tumkam khitle pavtti sanglam amori, rozar-ters ani magnnim kortana zap kaddchi nhi mhunn. Ani tum re! Tujem kitem zalem? Dusre pavtti rozar kortana zap kaddlear kana sokoll avaz kaddtolim.” “Mummy, khorench hanvem paddoxer undrak pollela” “Undir? Amchea ghorant? Undrachi sonsot amgelea bullun khobar kelea. Nhi gho bullu? Tichea payam sorxim tenkhun zomnir dolle dampun alxi mazran mhew korun tika zap dilolea vori kelem. Vhoir aslolea undrancher akhant suntlo. Tim dogaim bhair sorun vochunk kori punn tech vellar randdche khuddint boroch ruchik jinos xiztoleacho pormoll tanchea nakant guslo ani undrache ghorbest sangatinichea jiber udkam ailim. “Cholat, cholat. Vegim jevonn korun vegim nidhunk vochat. Tarde (late) korun nidhunk vetat ani sokallim iskolak vochunk uttchea vellar tumche nokre zatat.” Chikon-koddi, torkari ani xit tinnem mezar haddun dovorlem. Char, sov ani dha piraiyechim bhurgim mezasorxim kodelir boslim. Avoyn, eksarkem jevonn tankam vaddlem ani xitachi ek tori konni mezar varoinastona jevlim. Bhurgim jevtoch, aple ghorkara sangata tivui jevli ani urlolem khann frijint dovortana, vhoir savn soirea undramni pollelem. Ghorant kallok zalea uprant undir sokoll dhenvle. Alxi mazor pott borun sust nidhlolem. Tannim ak’khea ghorak dhadd (raid) ghatli punn chukun porian xitacho ek goto tankam zomnir poddlolo mellunk nam. Undir frijexim ghelo ani ugti kopachi kollpott kortalo. Undrak lokondacho vavr konnem mhonttla? Tannem monant gungulailem ani sangatinink ghevn bhair sorlo. Rosto par kortana motor-saikolichi light tancher poddli ani pattlean bosun aslolean, mottean git gailem. Undir mhojea mama ani hanv sangta tuka, amche motor-sakolichea ponddink poddum naka. Ganvant undrank mama mhonttat tor? Undir chintunk poddlo. Aikunk borem dislem. Zaum! Jevonn mellunk nam. Nanv tori mell’lam. Rosto par korun khoimchea dixen vetolim tem chintam astona tannim ek Purtugues stailichem vhoddlem ghor pollelem. Ghoddie girest mon’xam asot. Vhodd ghor mhontoch khub lok tea ghorant ravta astolo. Khub lok mhonntoch khub jevonn astolem. Khub jevonn mhonntoch pott bortolem. Oxem niyallit tim dogaim ghorachea durgan pavllim. Bhair bolkavant bosun aslolo jigant kutro dislo. Khub jevonn-khann khata astolo chor. Undrache sangatinink dislem. Taka pollevn, tichean pottachi bukh sonsunk zainam zalem. Undir somzolo. Veg-vegim sunneache dolle add korun, tim ghorant guslim. To pejama ghalun aslo. Mezar aslolea eke platintlo kekicho kuddko tonddan lotlo. Mezar, anik ek plastik plate asli. Te platin cream dovorlea porim distalem. Ghoddie zait kekiche vhoir asloli cream to khaina astolo. Tannem hat dule ani konnank tori ulo marlo. Ek nokrani (tichea nhesnam vorvim somzunk zatalem) aili ani mezar asloli kekichi plait kaddli. Dusre plaitik hat ghatlolo ten’nam, undrank pott-bukhecho chimpto ailo. Nokranin cream asloli plait thoinch sanddli ani light palloun bhitor gheli. Undranchea jivak suseg zalo. Thoddea vellan ak’khea ghorak kallok zatoch tannim ghorak guri ghalchi survat keli. Mezar aslole cream-ik zopt korpak undran, apnnalea sangateak sanglem ani apun zaun kuznant topasni korunk ghelo. Punn taka khoinsoruch khainch ek mellunk nam. Irlo tori cream-iche axen to porot salant ailo zalear purai cream khavun undrachi sangatin sust nidhloli. Tannem, tika hat lailo. Ti utthna zali. Tika zagovche proyont kele punn ticho suvas bondd poddlolo. Tachea dollea samkara kallok zalo. Xarant uloitoleache lokachi yad zali. To lok mhontalo. Vochot thoim ‘Ratol’ hem undrank marpachem vikh piyeun lok morta. To khub-khubuch niraxi zalo. Kusvean rochtolea bhurgea khatiruch sarko vas ghenastonam ani topasnni korinastona pottache bukhek cream mhunn somzun, vikh khailem astolem. Undir somzolo. Taka khub dukh zali. Fugar zalo ani ekuch killoch marli. Undrachea boballan salanti light pettli. Tannem ekuch dhanv marli ani eke gollint liplo. To underground gelo. Pejama nheslolea mon’xan, ghorantlea lokak zagoilo. Ghor-montri (tachi bail) melolea undrak pollevn khos zali, punn dusro undir underground gelamhunn aikona fuddem tinnem ghorantlea Mhukhel (vhoddlea putak) zagoilo. Nidhantuch tannem, nokramnichea darar marle, ani rater (mousetrap) toyar korunk sanglem. Kitlech dis sorle to undir tancheach ghorant liplolo asa. Vigans ghevnk ghorant aslolea lokachi nidh piddear korta. Dis-rat tacho paro korunk kutre asat. Keddnam sampoddtolo hench pollevnchem urlam. Lino B. Dourado http://aitaracheokaskuleo.blogspot.com/
