Waka Waka. Tuka Zai, Mhaka Naka Hea disamni tor FIFA Vixv Kopacho (FIFA World Cup) umedicho zor soglleankuch pettla. Ho lekh, kal Son’vara Vixv Kopachem quarter finals Paraguay ani Spain-a modim choltana boroila. Hea pavtti, Vixv Kopa vixim ajun hanvem kainch ek boroilolem nam mhunn, mhagelea mhavlle thollavelea ixttamni (net-fans) mhaka ugddas kel’lo. Khubuch mhagele ixtt antre-poirean hea ani tea ghoddnuke vixim mhaka zagrutay ditat. Hanv soglleanchem mon divn aikotam. Boroitana mat, mhojea monantlench boroitam. Hea pavtti FIFA Vixv Kopacho futtbol khell mhaka zalear titlo umedicho lagunk nam. Survatechi dhanvnni (first round) haddlea Vixv Kopachea khellank sor khelear bhouch unnem ispan futtbol khellachem manorojonn zalam. Ani tatuntlea tatunt kaim bore futtbol khellgoddeank tea-tea ttimintle bhair dovorlolean, hea pavttichi khellachi urba dhenvun gheli vori zalea. Modinch The Taeguk Warriors South Korea ani Samurai Blue Japan heo amche Asian ttimini khellachem monorojonnachem rup dil’lem ten’na mat, ek atvoch sontos ani umed khub zannachea angant bhorleli. Japan penaltin piddear zale khore punn, zaitea zannank (odik korun Asian-ank) ti har sivkar korpak tanchim monam koxinch khobul nam zaleant. Ani ujean tel otoilolea porim kalchea quarter finals-ancho nikal laglolo pollevn bhouch zanank niraxiponnacho tap suntla. Dusrea rounddant Gõykarachi avddechi ttim A Selecão das Quinas Portugal, La Roja Spain-a koddsun har khaili teddna, khoreanich Gõykar harle vori dislolem ani Brazilak ghora vochpachi Netherlands-an tikett ditoch urill’le Vixv Kopacho khell nam pollevpak zaitea zannanchim monam koddu zaleant. Waka waka! Jem tuka zai asta tem mhaka naka ani jem mhaka naka, tem tuka zai dista. Poilea rounddant Spain ttimicho khell ekdom vaitt toren suru zal’lo. Nnov pavtti Vixv Kopan bhitor sorlole Switzerland-a thaim eka golachi har khaili teddna La Roja anink fuddem pavtole oxi khatri nasli, punn khalcho Albirroja Paraguay thaim sullsullit eka golachem zoit mellun ghetoch zaitea zanank atam dislam hea pavtti Vixv Kop Spain ubartolem mhunn. Black Stars Ghana-n tor quarterfinal-ik udki marun sonvsarak ojeapun uddoile, punn tanchem penalty shootout chukill’lean 1930 survatechem poilem FIFA Vixv Kop jikhlole Uruguay-n semifinal-k udki ghevn 2010 anekdam futtbolacho itihas rochtole kai distat. Semi-finalintleo ttimi, Uruguay, Netherlands, Germany ani Spain boro huxar khell korun FINAL-ik pavttat ti vatt, futtbol sonvsar dollean tel ghalun polloit asa. Portugal ani Brazil-achi har ajun thoddea Gõykarank niraxi korta zalear amche ixtt Lapitt dukhache bed-ir ak’koch poddun poddla. Orxim poilo thavn to Brazil ttimink sarkoch chitkon astalo punn, jeddna Diego Armando Maradona-n, Argentina ttim jikhlear rostear ugto vo vinglo dhanvtolo mhunn jahir kel’lem teddna meren Argentina ttim tachi, avddechi zal’li. Poilea khellant German-an 4-0 golank Australia-k zalear England-ak 4-1 golamni har dil’li asa Ani kal Argentinachi ttim German-a koddsun 4-0 golank harli teddna meren, amcho ixtt Lapitt kainch khaina nhi mhunn kainch piyena. Tacho hat kaddlear hat yeta ani paim kaddlear paim yeta. Konna thaim subeij uloina. Nidhatuch zanktta. Waka waka. Khoinchea vorsa Maradona nagddo dhanvtolo pollevnk melltolem mhaka? Lino B. Dourado
