Kiff ani Iff
Nam , nam, nam! Tum somzola toxem nhoi tem. Hi gozal dogam ghott ixttinichi. Sukh-dukhacheo khobri eka-meka thaim, vella pormonnem tim (Kifframent ani Iffra) ugtim korpi. Kifframent aslolem nanv Kiff koxem zalem? Cliff, tagelea bhavachem nanv tem lhan astona tachea lagim sarkem uchharunk vo pronounce korunk zai naslem. Tache jibek matxe ghagg vetali. Vhoir taleak vo vhoilea dantachea mostokak jib tenkoinastona tem aple bhavak Kiff mhunn ulo mari. Tum try korun polle. Sarkem mu? Ani Iffrachem nanv Iff koxem? Tem iskolant xikoitana vo uloitana if hea sobdan vakea (sentence) suru zatalem. Dekhunuch taka bhurgeamni Iff addnanvan batiszad dilolo. Atam somzoleat? Kiff: Kitem sangum mhojem kopal? Amgelo ghorant pikasanv ghevn yeta tem mhojean sosunk zaina. Iff: Kitem mhunnta gho tum? Tum ghorant nastona, Dandol vaddeantlem Pikasanvank ghevn, tumgelo ghorant yeta? Kosli ollxig gho hi? Kiff: Agho Iff, kai borelem Purificação nanv, tunvem pikasanv kelam, ani somzonnechi chuk korun gheta. Hanv sangunk sodtam, amgelo klubachea boskek veta ani thoim zal’lim tensionam ghevn ghora yeta. Iff: Oxem ghoddta mhunn, amgeleak keddnam thavn tea klubantlo bhair kaddla. Ani dekhunuch, amchea modim atam suseg dista. Adim to amkam ghorant dovrun, sumanantli sutti mitinge fattlean ogddaitalo. Kiff: Tugelo aikopi punn amgelo? Ek somajik vavurpi mhonnta to. Ganvcho klub tajem dusrem ghor zalam. Punn klubache vangddi asat te? Kitem chukta tacher, obeas korchea bodla kijilam vhaddoitat mhunn, pikasanvancher don odik xekoita amgelo. Iff:Itlem pikasanv mhattear poddo pasun, kluban zalam tori kitem? Kiff:Thoddea utramni sangchem mhonllear, klubache nem’ ani kaide asat te dor vangddeamni pallche astat. Kaideam bhair ghelo zalear tuka xiddkavnechem potr ditat ani fuddarak chukichi sudhranni korpark tuka vell basaitat. Iff: Zalench! Dor membramni kaidea porponnem chol’lear, ganvant ekvott ani xanti togtha. Kiff: Punn thodde asat te, apleo chukeo manun ghevpak toyar nant. Teddnam, dusro upai nam zaun sthogit (suspend) korche poddtat. Ani oxem kitem aiche bosken zalem mhunn, amgelo bezar. Iff: Tuzo ani bhurgeancho suseg piddear zavnche adim, sodd mhunn sang klubacheo ratavoli. Kiff: To mhaka soddit punn nhi klub. Mhojea thaim kazar zavnchea adim, klubacho bavis vorsancho vangddi. Tachea borea vavrak lagon, ghanvcho lok taka man-respet ditat. Punn nove vangddi kluban bhorti zaloleak, soglloch ghonddoluch zala khoim. Iff: Novea membram modleak konnank tori vhodd ud’do (post) zai astolo…. Kiff: Sarkem uloilem. Ghele pavtti, klubacho novo odheox nivddun kaddpak, boska bhorloli. Naka aslolo monis odheoxponnanachea poddar nivddun ailo mhonnon, thoddea vangddeank khontt bhoglli ani kluba koddsun sombond thoddun, te bhair roun ghele Iff:Vochum di tankam. Addaileat konnem? Kiff: Toxem nhi gho yea! Ganvant ekuch klub ascho, hem adim thavn cholot ailam. Bhair sorun tannim ganvan ani ek novo klub sthapla. Iff: Hem mat sarkem nam. Dusro klub ghoddun haddop mhonnchem, ganvant duspot ani kijilam. Kiff: Tech khatir, borea magpeamni bhair sorun ghelolea sat vangddeak porot bhitor sorunk vinonti keloli. Dog vanddi apli chuk vollkunn, porot aileat khoim. Iff: Somjikayeche astole. Amchea povitr pustokacher ek vechik putachi (prodigal son) gozal vachunk mellta. Girestakai somplea uprant chuk magun porot aplea bapaixim pavtta. Hech toren urlolea membracho rag nivolltokuch ghoddie porot yetle. Ho mhaka bhorvonso asa Kiff: Tujea chintna pormonnem zaum. Iff:Punn ek sang gho? Kiff: Kitem zannam zaunk sodta? Iff:Ganvche malgodde asat. Te kitem polletat? Kiff: Thoddeank soddlear yer asat te soglle dhongi (hypocrites) Iff: Mhonnchem? Kiff: Klubachea vangddeam modim tanv-tinv zatat tim, he dhongi pois ravun bhitorlea bhitor murgottun polletat. Tankam lagim yeun, ekvottachem don ghontt sangunk zainam tanchean? Iff: Oi gho baye! Eklean uzo haddlo zalear to palloupak dusrean udok haddunk zai. Tum sangta te toren, uzeacher petrol ottoupak, dhongi ani kuskea monanche mosis zaite asat tor. Kiff: Albot sot tujem. Iff: Kitem zaum. Sotor pavtt sat pavtti, chukloleak bhogsuchem mhunn amcho dhorm amkam xikoita. Pois zalolea vangddeamni apnnalea monacher xantticho, ekvottacho uzvadd ghevn hatak hat melloun porot ailear puro mhunn mhoji magnnim. Kiff: Tujea magnneank mhozo tenko asa. Agho, amgelo ulo marta. Fon dovortam ham? Iff:Punn ek gho Kiff: Vichar mu gho Iff:Tem pikasanv tumchea ghorant guson, tum bhair poddot mhunn mhaka bhirant poddlea. Kiff: Shut-up you idiot……. Lino B. Dourado GLOBAL GOENKAR (The Voice of the Goan Diaspora Worldwide) GLOBAL GOEMKAR an online quarterly magazine edited and published by Kenelm Santana Lopes, based in Bangalore can be downloaded at the URL below. Please Copy Paste it into your browser https://docs.google.com/leaf?id=0B_2VDM-ZLn9FNTdmNGQ0ZWItNzdhMS00MTg2LTkzZjItNjI3YTQ3M2VkNmM5&hl=en EKVOTT GLOBAL GOANS UNITY http://groups.yahoo.com/group/gulf-goans/message/31001 Tumi Konknni Uloitale? http://groups.yahoo.com/group/gulf-goans/message/31051 http://aitaracheokaskuleo.blogspot.com/ * * * * * * * * * * * * * * * * * * * * * * * * * * * * * * * ISSUES BEING DEBATED: In East Africa, despite colonialism, the British afforded the Goan a sliver of a socio-political voice. Read *Into The Diaspora Wilderness* by Selma Carvalho. Soon to be available in Toronto. Pp 290. Via mail-order from [email protected] http://selmacarvalho.squarespace.com/
