Cheddeak Tin Cheddvak Don Tho…tha..tho ..tha…tho..tho..tha, segid tin pavtti fogottencho avaz aikolear, mhageli avoy soroll mhontali “Konnagher tori cheddo zala” ani don fogottea maran laslear, cheddum zalam mhunn tika kolltalem. Ani ek maran lastat teddna mhojer mottean dhengso poddtalo to, xezaream aikotalim. “Ajun hangach asa
re? Ladainicho vell zalo mhunn fogotteo lasleat. Nhess ani voch vegim” Adim fogotteanche maran lastat tea pormmonne, konnagher choli vo cholo zala tem kollit zatalem. Zolmotolea ballkachi khuxalkay xezareank ani ganvank porgottunk, adlea tempar fogotteo mottem dadhos kam’ kori. Konnagher fogotteo pettleat tem zannam zaunk, xezarim ghorantlim bhair sortalim ani rostean yetolea-vetolea xezareank vicharun khobor gheit. Novea zolmololea ballkak ani avoyk porbim divnk adlim mogall xezaream, ek lhanxi bhett porxim vochun ditalim. Filu timaighelea ghorvank rakpi Topus, sokall fuddench aptott-doptott ghorant thanv ghorvanchea gotteant dhanv mari tem hanv, iskolak vochunche vatter astona pollelem. Topusak lagim soron vicharlem ten’na tannem mhaka sanglem, tanchea ghottean eke gayek, paddkulem zalam mhunn. Don’parchea vellar iskolak thavn hanv ghora portotalom. Hatant don fogotteanche maran ghevn sorean boroch zur zal'lo Topus te lasunk tozvit kori, punn hatantle fogotte maran soreache noxear soklla poddo. Hanv chintnamni poddlom. Atam zon’varagherui zatoleank fogotteo pettoun, xezarchea lokak kollit kortat kai? Topus varear altolo pollevn, Filu timain, fogotteo laspak mhaka porattlem. Hanvem fogotteo lasleo, ani laspachem kharan Filu timaim thaim vicharlem "Colva kazar kelolea mhojea Terezagher bai zalam. Nigtinch tumchea ghora vochun aileam hanv. Moddganv hospitolant, Terezache khobrek vechea khatir tuka matxe mhojea borobor dhaddunk, tuje maink sanglam" Ani thoddea disamni eke sanjechea vellar, sumar char vorancher Filu timain mhaka ulo marlo. Tea vogttar, amchea ghorachea bolkavant bosun mhojem lisanv kortalom. Posrear vochun tin fogotteanche maran haddpak tinnem mhojea hatant poixe dile ani fogotteo laspachem kamui mhojearuch soddlem. Konnagher baba zala tem vichartoch, tinnem dupett khuxallkayen borun mhonllem. “Cheddeagher cheddo zala” “Cheddeagher cheddo? Aage timaim, cheddeangher bhurgim zatat ghe?” Mhozo vichar aikun ti hansli ani mhonnlem. "Arre baba, thoddea vella adim cheddechea bailek Magddalenank, baba zala. Sarkoch mhojea somplolea ghorkara porim dista khoim” “Toxem zalear, atam hanvem tujea borobor Moddganv yevnchem poddtolem?”, ghelea pavtti tichea vangdda tigelea cheddvache khobrek ghelolo teddna, tinnem mhaka Marliz Café-n khavunk-piyeunk pettisam ani faloda diloli ti yad yevn, hanvem vicharlem. “Nam re baba. Moddganv vechi goroz nam. Don vo tin disam modem, Magddalen ghora yetolem.”, tichim him utram aikon, Marliz-antlea pettisam ani falodachi ruch kaddloli ti thoinch jiron gheli. “Zannaim maim, thoddim mon’xam kitlea sobhavachi mhunn astat”, ghora vetoch mhoje avoyk mhonnlem. “Kiteak mhonnta tum?” “Aage maim, Filu timain tigelea cheddvagher dusri dhuv zaloli tea disa, beg-begim mhaka ghevn ti Moddganv gheloli. Ani aiz, tigelea sunegher poilo baba zala ani ti mhonnta, cheddegher cheddo zala.” “Arre mhojea puta, xekdde sompun ghele amche purvoz oxech toren uloun aileat. Bai vo baba zalear cheddvachi avoy khuxi porgottana zanvoim-ache nanv ghena, toxench putache bailek zolman ailolem por sunechea nanvan sanginant. Lokak sangtana putachea nanvan sangop zata. Hi chal, pillgeche pillgek thavn cholun ailea” “Punn ho veglozar kiteak?” “Oxem kiteak vicharta tum?” “Filu timainghelea dhuvegher cheddum zalolem ten’na, aple natik pollenvk ti dhavim-dhavim hospitolant ghel’li. Punn khaxallea ghortantlea cheddeachea bailek vo sunenk zolmololea natvak pollenvk hospitolant vochonam. Falleam ti, tigelea somplolea ghorkarachem nanv, natvak ghalunk boballtoli ani natvak kakheant ghenv mhonntoli, pai ailo. Sarko pai bhaxen dista. Zalear…” Puro, puro tujeo filozofi. Lisanv ghevn bhos”, mhojer vhoddlo dhengso ghalun, sarnn ghevn ghorak saron marunk lagli. “Maim ek vicharum?” Ti saron martanam, hanvem vicharlem “Keddna tori tunvem ekuch vicharlolem mhunn asa? Her mhoje teg put nant re? Ap-aplem lisanv ghevn bosleat ani tunch mhozo jiv khata kiteak?” “Ekuch ghe” Borem, borem. Vichar” “Ami tuje chog put. Tuka dhuv nam, mhonnchem; amkam bhoinn nam. Faleam hanv kazar zalom zalear, tum mhoje bailek Filu timaim bhaxen vagnnunk ditoli? Mhozo vichar mhoje avoyk kitlo koddu laglo tea vellar mhaka khobor nam. Saron martali ti sarnn mhojea patttir tin pavtti, fogotteo maran lastolea porim marun mhonntlem “Ajun, Aa-Bhe-Chhi sarki xikonk nam, punn kazarachem ulounk xiklo tum?” Lino B. Dourado http://aitaracheokaskuleo.blogspot.com/ * * * * * * * * * * * * * * * * * * * * * * * * * * * * * * * Goa-launch of the well-received *Into The Diaspora Wilderness* by Selma Carvalho on Aug 29, 2010 (Sunday) at 11 am at Ravindra Bhavan, Margao. Meet the author, buy a signed copy (only Rs 295 in Goa till stock lasts). http://selmacarvalho.squarespace.com/
