Sudhrotoleank Sudhropak Sondi Diat! Adlem poz'ddea filmamni kam' kortolem 32 vorsachem film nokhert Teresa Scott atam ek borem Kristi jivit jiyepak nirnnoy ghetla. Magnnim ani Kristi dhorma vixim pustokam borovpak tannem suru kelam. Teresa mhonnta: "Chukoi nastona pattio ani thambonastona lingacho bong hanv poilench model zavnk bhitor sorlolem tedna suru zal'leo. Soreachea noxar hanv poz'ddim filma korunk lozo naslem. Khorem mhonllear hanv voir sortolem nokhetr soglleam dollea mukhar pavllem punn atam mhaka kopddeavinnem vo nagddem zaun kamerak fuddo korunk borem disona" 17 vorsanchea pirayer Nottingham-antlem Terezan 'beauty pageant' jikhlea uprant filmani kam' korunk Amerikak udki marli. Thoim tannem xeboram odik kuddik uchambolai ditolim filmani kam' korun duddu ani namnnea zoddli. Ani oxe toren tem movjechem jivit jiyetanam ek dis taka vegllech torecho avaz kanavelean sadovlolea porim dislem " zori tor tujem poz'ddem jivit porot nitayear ghalxi zalear tuka bhas ditam, tum tujea jivitan odhik sukhivont zatelem. Ani khorench, thoimsoruch ani teach vogttar mhoji dixea bore rostear gheli ani te meren hanvem portean mhojea angavele kopdde kaddunk nant." Voili gozal kalchea The Sun potracher chappun ailea. Ti vachtoch bhouch tempaveli eke khori gozalichi yad mhaka zali. Kaim ixttam sangata Moddganvchea karmrak tekhun aslolea adlea eka famad basement-antlea Bar-Restaurant-ant sanjeachea satam uprant bhitor sorle. Whiskey ani beer-ak odder dili. Zaitea tempan ami melltale mhonntoch, amcheo gozali rongar yetaleo. Hea ani tea ixttanchi vaspus ani khobrancher astona kaim sobit cheddvam tea nanvadik bar-restaurant-an bhitor sortalim ani bazuchea kuddant rigttalim. Tim khoim vetat tem somzunk naslolean hanvem mhojea ixttank vicharlem. Te hansle. Thoim kitem cholta tachi mhaka sulus na mhunn, te ojaple. Lovers joint hea zageak poilem nanv aslem, punn atam mal pormonnem umkeach duddu divn kuddichi umed bhagoupacho ek hadd’do zala mhunn, tannim mhaka sanglem..
Whiskey ani beer-ak dil’li odder vaittoran mezar dovorli. Beer-acho glass tonddak mat lailolo. Bazun boslolea Lesley-n (nanv bodol’lam) amchea samkaravelean cholun vetolea dogam choliam modlea ekleak nanvan ulo marun keddna free astolem kaim mhunn bindas vicharlem. Ti choli konn ani to tika khoim ollkota, hi hanvem sod kaddtoch, mhaka fokot hoch zago aslo kai? Mhojea ixttam sangatta thoddo vell sarunk? Hanvem mhakach vichar kele. Oi!! Ti sobit choli. Amcheach ganvchi. Eka durboll ghorabeantli. Punn hea vaitt dhonddeak keddna thavn ti sampoddli? Konnem tika vatt dakhoili? Zait ghoddie durbollkayen? Voilea porn film star Teresak, sundoricho mukhutt lablolo tedna tichi suropay borexea dixen suru korunk tika ekdom bori sond asloli ti tinnem ogddayli ani poz’ddea dhonddean duddu ani nanv zoddlem. Punn amche gorib bayen durbollkay pois korpa khatir, kuddik axeloleanchi xikar zali zait? Ani osoch hanv ghora astona eka sokallchea nnov vaztam amchea ghorant eka bhurgeak ghevn dogam mon’xam mhojea avoyxim ailolim. Tea bhurgeak katreachem duens zalolem. Mhoji avoy bhurgeank zhadd-paleachem vo khatreachem vokhod ditali. Te ostoren mhoji khobor ghetli ani mhojea avoyn, hanv ghorant asa mhunn tika kollit kelem. Main, mhaka ulo marlo. Konn ostori mhaka sodta tem pollevn ghelom zalear? Oi! Tich choli! Tin vorsam fattim barant dekloli poi ti. Ani aiz amchea ghorant aplea mogall ani doyall bhurgea ani ghorkara sangata melltta. Kazarak tin vorsam bhorlolim. Tanchea ekvottachem poilem bhurgem. Ghorkara sangata pollevn hanv khub khoxi zalom.. Kitlem meren tichem anvkari jivit tinnem dusrea dadleanche sangatak sarlam hi mhaka upeagachi gozal nhoi asli, punn apnnalem vaitt jivit soddun eka khorea mogachea kazari jivitak veng marleli pollevn, hi mat dupett mothvachi gozal. Oslea ostoreank xebaski dita titlich thoddi zait. Khub zonnam asat. Kantteantli vatt meklli khorun pormollit fullam porim novem jivit jiyevnk axetat. Punn amcho dhongi somaz tankam vaitt nodren polleta ani odik korun bazari ostoreank. Teresa Scott zaitem vavurtolem apnnalem ibaddlolem jivit nove dixen vorpak, punn tachi poz’ddim filma purave ditolim. Tichim filmam polloilole ani fuddarak polletole keddna tori hi ostori eka khorea ani borea Kristi jivitak veng marli mhunn sotmantole? Mhoje ganvche ollkiche ixttinniche adlem poz’ddem jivit Teresa bhaxen nhoi. Mhonnchem, koslech poz’dde fottu vo film naslolem ani purave naslolem jivit. Tori astona oslea ostoreank apnnali man voir kaddun somazan na bhovunk divpi, amche modim asat. Jivitachi novsoni (renewal) kortoleank amcho somaz, addkolinchem durig zata kiteak? Lino B. Dourado
