Pritichya vachpyamno,
Ho mozho lekh tumche mukhar haddtam. To tumkam faydyacho zayt. Dev borem
korum!
Fr.Ivo
"Padri Pulitikent Kityak Poddtat?"
*Ivo da Conceição Souza
Azkal Goyeam ani akhea Bharatant rajki fuddaryanchim nanvam lokachea
tonddar khelltat. Khoynchya pokxak zoyt melltelem, tem ami uloyt astat,
uprant pokx nivddun yeta, dusro pokx ken’na yetolo, osli ast ballgit ravtat.
Rajki serkos ken’na suru zayt, hem ami nokllot. Amchem jivit rajkornnent
vinnlolem asa. Arthik ani somajik mollanr rajkornnecho porinnam' asa.
Tornnya-dhakttyancho, nennttya-zanntyancho, dadlya-bailancho husko toch.
Xallamni lhan bhurgyancho poryant kityak nhoy? Tor oslea adhunik kallar ho
vichar amchya kananr sadta: "Padri pulitikent kityak poddtat? Tancho vaur
otmik, tankam osleo ratti lagonant..." Osle nare aikunk yetat.
Hea vicharak zobab diunche khatir amchem mon uzvaddaunk zay. To don
panvddeamni amchyamni dium yeta:
i)Rajkaronn (politics) mhonnche kitem? Azkal rajki fuddari soglea mollanr
misoll zatat. Lokoy tanche koddle zobab soglea prosnnank magtat. Rajkaronn
mhollyar xhar-proza (city-state [Gresia desantli POLIS]) cholovpachi vidhya
ani kola. Doreka mon'xan mon'xallayen-bhavponnan vinnlolem bhiradd bandunk
vaurunk zai. Doreka Kristi mon'xan hea jogant Devachem Raj sthapunk proyotn
korunk zay. Ponn rajkoronn mhellem zayt veta. Vikas vaddche boldek
broxttachar-burxeponn ani apsvarth amchea desant ghans ghetat. Rajki
fuddaryamni des zannvayen cholounk zay, somajik-arthik-sonvskruthik ani
rajki mollanr udorgot haddunk zai, projecho samball-seva korunk vavrunk
zay. Oslya vavrant borya sobhavachim mon'xam gorjechim.
Ponn amche modim vegllench ghoddta: okxikxit, lapitt, chor, mortikar,
broxttachari, fotting amkam melltat. Gunddagiri-dadagiri choloytole monis
rajkarnnant ghustat. Hat-maram' bhitor soron aplim bolsam bhortat, durboll
asle te grest zatat, nagoun-chorun, broxttachar korun...
Dekhun bhurgyanchea monant ho vichar yeta: "Khoinche nokrent mhaka odik
poyxe melltele?" Tanchea monant ekoch zobab mhollear ho: "Rajkarnnant bhitor
soron mhojean sottasott duddu ('fast buck') komaum yeta". Xikpachi
poryant goroz na. Hotelamni ani xallamni "waiter" vo "peon" koso nokri
mellounk SSC-cho dorzo zay, ponn rajki am’dar koxe nivddun yeunk xikpachi
ani xikxonnechi goroz na. Itlench nhoy: Soglech Mukhel Montri zaunk sodhtat,
aplya faydeak zhogddon amchi seva kortat mhonn fottoytat… Oslya mon'xanchea
hatamni amim amcho ani Goyencho fuddar ghatla...
Sobhav naslole monis amkam rajkarnnant melltat, hantunt konnoch dubhav
dhorpasarko na. Khoynchoy pokx aplea totvamni ani mulyamni cholona, ponn
poixyancher cholta...koxem tem tech zannant. Ek pokx soddun dusrea pokxant
bhitor soron, am’dar aplo jiv samballtat, ponn Goyenkarank lojek ghaltat...
Broxttachar khup chol’la mhonn sogottoch zannot. Ponn amcho lokoy oslea
rajkarnnaranchya ghansak sampoddta. Ken’na-ken’nai lok vikharya
karkhannyancher virud’dh aplo tallo ubartat, ponn rajkarnnar apnnak zay tem
korun lokak pilltat. Soglya nagrikank mon'xall-somajik hok'k asat,
khoyncheay dhormache te zaum, khoynchoy tancho vavr zaum... Mhonntoch
Katolk yadnikank loka vangdda broxttacharacher add zhuzunk kaydo ani
zobabdari asat. Te hinsa proghottinant, ponn mog, nit, promannikponn
xikoytat!
ii)Katolk Yadnikancho Vavr kitem? Yadnikancho vavr mhollyar Devachem Utor
ani Mog projek vanttunk ani he vorvim lokak mon'xallayen ani povitrtayen
jiyeunk adar diunk. Tancho vavr "pujaryancho", mondirachea char vonntim
modim sompta, toslo nhoy, ponn sobhemazar Devachea Utrachea uzvaddan ani
Sonvskaranchea bollan mogache ani nitiche govay koxe jiyeunk. Devachi puja
korunk mhollyar mon'xanchem vorteponn rakhunk ani tanche mon'xall hok'k
samballunk. Ho tancho 'otmik', dhormsevent rig ghetolo vaur. "Devacho onod
mhollear jivo monis" (Gloria Dei homo vivens), oxem Lyons-cho Bhag.Irinev
amkam sangta. Durbollam khatir vavrun, tankam to jivitacho voylo panvddo
dakhoyta. Dekhun xalla, hospital, gorjevontank ghoram bandun, to somestank
adar dita. Te pokxi rajkarnnant (partisan politics) bhitor soronant, kityak
sogleank, futt ghalinastona, ektthaym dhorunk sodhtat, ponn amkam goroz
toslo sorkar diunk te provochonant margdorxonn ditat. Hantunt kaynch vaytt
na. Jen’na ek pokx Devacher vo Povitr-sobhecher ugteponnim add zhuzta, ten’na
tankam xittkavnni diunk kaydo asa: Povitr-sobhechea vangddyamni oslea
pokxank aplim motam diunchim nhoy.
Aychea kallar, jen'na itli maramari vosta, yadnikamni xanticho rosto
dakhouncho. Toch rosto Jezun dhorlolo. Jezu krantikar (revolutionary),
hoy, ponn kosli kranti tannem suru kelya zayt? Mogachi kranti
(revolution of love)! Mahatma Gandhin, Jezuchim Bhagyam ani Bhagvad-gita
vachun, toch sovostkayecho rosto dhorlo: ahim’sa ani satyagraha. Ponn
xanticho rosto mhonnche Sorkar onit korta ti vengoun nhoy, ponn ticher
khorayen aplo nixedh marun... Hem xant’tayen korunk zay, nhoy “goondagiri”
korun, ponn “Gandhi-giri” jiyevn…
Jezu nenntuvayen bhorlolo, ponn onyay asli thoynsor to kodinch ugi
ravunk na. Tannem projek uskaunk na, vaitt upay xikounk na, ponn kalliz-mon
bodlunk ulo kelo. Aplo vavr konn to proghottailo (cf.Lk 4:16-21)--Jezu
durbollank "bori khobor" (Xubhvortoman) kollit korunk ayla: Devachem Raj
jogant sthapunk, bogsonnem diunk, krupechem vors proghottunk, novsornnecho
novo kall suru korunk, novi somajik manddavoll-bandavoll rochunk, ho tacho
hetu, tacho vavr. Durbollank jivit diunk, tankam hya jivitacho suvad mellunk
suyog diunk.
Jezun onitichi ttika kelea: goribank pilltolya grestank ani rajkarnnarank
tannem xittkayleat (polle Lk 6:24-26). Ponn pelyacher hinsa tannem addvarlea
(Mk 13:13). Toriastona, rajki fuddaryamni tacher arop-garannem ghatlem: to
"lokak aple xikovnnen uskayta ani uchambollayta" (Lk 23:5). Urfattench,
rajkornnar zobordosten aplem raj choloytale, tem Jezuk sid'dh aslem (cf.Lk
13:1). Tacho eklo xis, Simanv, Zelot zomyantlo aslo (Zelot Romi
podvi-rajvott bondukamni ani torsadimni kaddun uddounk sodhtalet, hem Jezu
bhes-borem zanno aslo. Polle Mt 10:4). Tancho eklo (polle Ju 18:10: Simanv
Pedru) apli torsad gheun porom'-yadnikachea chakracho, Malkusacho uzvo kan
katorta. Ponn Jezu ahim'sa xikoita (Ju 18:10-11; Lk 22:49-51). To amkam
vatt dakhoita ("Tuka eka polyar marit, zalyar dusroi polo taka
dakhoy"--Lk 6:29a), dusmanancho poryant mog korunk to adnya dita
(cf.v.27). Bogsonnyachim mon'xam zaunk to apoyta. Ponn jen'na Jezu Annas
dhorm-yadnikak aple xikovnne vexim zobab ditalo, ten'na eka soynikan tacher
thapott marlem, hea vellar Jezun taka dusro polo diunk na, ponn
kalljidarponnan nitichya monan taka protipall kelo: "Hanvem vaitt uloylam,
zalear chukicho puravo di; ponn hanvem sot uloylam, zalyar kiteak mhonn tum
maka martay?" (Ju 18:19-23). Nitichim mon'xam koxim jiyeunk to amkam avhan
dita. Ponn khursachea polongar to kallzant thaun aplea dusmanank bogxita:
"Bapa, tankam bogos, kityak te kitem kortat tem nokllot" (Lk 23:34).
Jezu somajik-rajki-dharmik odhikaryank respet-man dita. Ponn podvecho
goyr-vapor kortolyancho to ttika korta. Pokxi mon (partisan politics) to
poisayta. Igorje-kaydya pormonnem, iadnikamni Bispache porvan’ge-roja xivay
pokxamni vantto gheunk favona (Kolm 287/2). Ponn rajki babtint tannem
bhavarthachi xikovn diunk zai (Vatikani Vixvsobha, GS 76: “It is only right,
however, that at all times and in all places, the Church should have true
freedom to preach the faith, to teach her social doctrine, to exercise her
role freely among men, and also to pass moral judgment in those matters
which regard public order when the fundamental rights of a person or the
salvation of souls require it. In this, she should make use of all the
means--but only those--which accord with the Gospel and which correspond to
the general good according to the diversity of times and circumstances).
Tachem misanv mhollyar onitichi somajik-rajki bandavoll moddunk ani mon'xak
patka-vayttantli-gulam’ponnantli suttka diunk. Onitik ani pillnnukek
sampoddlolyank suttka-sot'tea haddunk to asa. Tannem ekchar samballunk zai,
dekhun pokxi rajkornnent vantto gheunk favona. Hech bhitorle-kallzantle
pekovnnen tachean gulam’ponn, broxttachar ani naykinniponn kosllun uddoum
yetalem. Tannem aplea xisank xikoylam: "Sezarachem tem Sezarak diat,
Devagelem tem Devak diat" (Lk 20:25), mhonnche soglem Devagelem yeta, dekhun
Sezar aplea mollar Devache yevzonne pormonnem cholunk zay. Sorkara sovem
amche nem'-kaide pallunk zay, ponn tech borobor onit ani fottingponn asot,
zalyar osli poristhiti nittayer ghalchi!
Rajki mon'xank nivddun kaddtastona chotray dhorunk zai, nazalyar osle
osokt montri amkam favtat! Amkam kosli loz! Iadnik durbollam khatir vaurun
tankam voyr-voyr kaddunk vavurtolo, je upay taka melltat, te to vaportolo.
To aplem jivit adhunik sonskrutayent jiyetolo. Jezu az jiyelolo, zalear
amchya kallak lagu zata, te bhaxen jiyetolo aslo. Bharatant-Goyeam
sonskrutay asa, te bhaxen to jiyetolo aslo. Nhoy aponn poylea xenkddyant
Judev koso jiyela, he bhaxen to amkam korunk apoyna… Jen’na soglyancho dorzo
ukhlunk to vavorta, ten’na yadnikank soglyo adhunik sovloti asunk favo.
Rajkarnnarancho konnoy yadnik ixtt, zalyar poryant tannem
kalljidarponnan spoxtt aplya montrya-ixttak sangunk zai: "Ixtta, tum kortay
tem sarkem na...tum projecho faydo ghetay...kruttamni poyso komaytay...lokak
vaytt kortay... Borem kor, ami tuka amcho sohokar ditat". Yadnikan
bhavarthyank margdorxonn diunk zay, ponn bhavarthache nanvim hya vo tya
pokxak mot diunchem, hem provochonant poysavnchem (tachem khasgi mon
gozalint sangum yeta). Jezuchi xikovnn monant dhorun, soglea mollanr
(arthik, somajik, rajki) taka govayki dium-ya ani somest ami, yadnik, madri
ani griosti lok, "pulitikent" (hi ‘pulitik” khorench xantichem rajkaronn
zaunk zay) bore bhaxen vantto gheun, amchea desa ani ganva khatir
vaurum-ya...
