RIVER PRINCESS Raza-Rannichea ghorabeant choli zolman aili zalear tika princess mhonntat. Mhonchem, royal daughter. Tichi bhouch apurbai zata. Kitloch novkor lok, tichi seva korunk astat. Vorsamni ti vhaddta-vhaddtam tichea xikxonnacher, chal, rit-rovis, nhesnacher ani her sovoimyancher ekdom promann charchea zata. Potrakar ani TV sadhon asa tem, dorek vorsa ticho zolmdis khoxe toren ani khoim sorombtole hacher bhasabhas kortat. Tigelem avddichem khan ani follancho diet potrancher chappun haddat. Mogache sombond konna thaim dovorleat hacher dollo dorit ani vas ghe-it astat ani logn zanvchi asa zalear tichea bhitorlea mustaki-soit resperachim nhessnam vixim ani hatak-goleak kosleo diamanticheo moladik vostu astoleo hache vhoir, vhodd boball kortat. Hindu somudayechea ghorabeant choli zolmolear girestkay ani sundor noxib ghevn Lakhmi aili mhonntat. Kristi ghorabeant zolmololea choliek zaite toren yevkar mellta vo nanvam ditat. Malgoddea putache bailek choli zolmoli ani ghorant avoy na zalear, mhonnchem; avoy Devachea ghora ghel’li asot tor, rokhdench mhonntat, maim aili. Avoy asa punn xamaim nasot, sottasot mhonntat xamaim aili. Ani oxe toren poile choliek vorixtt nanvanim yekaran ghetat
Kaim vorsam fattim Gõyche utor dixen Kandolim ganvche dorya kinarer River Princess-an zolm ghetla. Raza-Rannichea vo Hindu-Kristi ghorabeant zolmotolea choliechi apurbay zata te toren hichi zaina. Ek dolldir yevn sobit kinarer poddlem mhunn, hi princess Gõyche porjecho xirap khata. Hea River Princess-an Gõychea soimbik jiyepi sorbhonvtonichea vattovoronnachem (ecology) nixontton korun uddoilam ani korit asa ani Gõycho broxttochar sorkar atth-paim pagrun hea piddechea princess-ak, bhailea bhonvddekarank tturizmachi ek bhavli koxi az meren apurbayen (?) samballun dovorlea. Kitlech tturizm montri, xirapan buddlolea River Princess-k doryantlem niklavpak poilo vavr zatolo mhunn, tturimz kodelir bostana sangtale punn River Princess-achea khorelea bapaycho vo dursre bhaxen dhonnyacho dhengso poddtoch, bonktolea kutrea bhoxen xempddi kovllun tturizm montri ogich poddtale te, az meren ogich asat. Ani atam Gõychea sorkaran, xirapache River Princess-ak Kandolim kinaraveli nikllavpak sogllo vavr aplea bhuzar ghetla. Tovui zalear, Mumbaichea unchlea neayalloen dhengso ghatlea uprant. Punn tika nikllavpacho krott rupeancho khorch zatolo to, konnacho pai ditolo? Insurance mellchea khatir, nadbuddin mudd’dom doryant buddovpak yotn kortana, vadoll-moddacher lottun, chukun Kandolim kirnarer xirkollole River Princess-cho guneavkari konn? Thoddixi garbage vo kochro rostear uddoitolo sampoddlear, taka dorun bondd kortat zalear, itlo vhodd ecological and environment disaster kortolea River Princess-ache dhoniank Gõychea sorkaran az meren zababdari kiteak tharavunk na? Konn konnachim bolsam bhortat? Hachi zap, konnui tori amkam di-it kai? Lino B. Dourado
