VIGARACHO SERMANV Fattlea Aitarak, Misar Padri Vigaran sangil’lo sermanv aiz meren mhojea kana velean poddsadd (echo) zait asa. Bhov thoddeank soddun, her padribabank provochon korchelem ek kherit dennem Sorg Bapan dilam. Thoddea padribabanche sermanv aikupak, tea-tea igorzani, upott ghalun lok vetat. Punn, sermanv aikotolo lok kitlo meren padri baban dil’lo updex, aplea jivitak lagu kortat zait kai? Vo padricho sermanv nhoi vonniek, punn derak. Oxem nhoi mu hem?
Amche firgojen ail’lo novo Vigar, apnnalea sermanvan, dor Aitarachea Misar vachpam zatat, tea vachpanchi somzoni divn sermanv kana bhorpa sarko korta ani tatuntlean tatun chaltea jivitak lagu zatolo boro sondex sadoita. Ani fattlea Aitaracho, tagelo sermanv zonn eklean aplea kuxensan (conscience) hat ghalun vichar korpa sarko zala. "hanv, dusreanchem kitlem borem uloitam?" Amchi jib torsadi von dharun. Zori tor ami, amche jibecher tabo dovorinant zalear dharun hatyaria vorim dusreanchea nanvanchem nixotonn korit ravteli. Mon’xan, oikari nodren (positive aspect) pollevnchem soddun, noikari (negative) dixen cholchem dorlam. Dusro denvchar ani apunn Sant, osle munis firgojent asop mhonnchem, ek kiduch zaun asa. Hi niddukayechi kid nopoit korpak zonn eklea firgozkaran mogan vavurpak zai mhunn, novea Padribaban, firgoz-somudayek ugddas kela. Apleak ekuch sot ulovpi monis mell’lo zalear, ho ak’khoch firgoz-somaz bodollpak ek agvodd kam’ nhoi mhunn, Vigaran spoxtt sangun dilam.. Poilea sumanant novea Padri Vigaraxim konn eklo firgorjikar (parishioner) ek lambxem kagodd ghevn ailo khoim. Tea kagddar, firgorjichea kaim mon’xanchim nanvam aslim. Firgoz lokache vaitt sobhav ani kornneo ukttavpak laglo. To vo tem, borim mon'xam nhoi mhunn kagall (complain) kelem. Osle mon’xank lagim gheit zalear, Kristi somudayek ani firgoz-somazacher vaitt porinam zaunk xokta, dekhunuch tankam pois dovorchim mhunn, Vigarak bhouch vhodd sol’lo (advise) dilo. Firgoz loka vixim, tachea monant soglench vaitt bhorlolem asa tem pollevn, Vigarache toklek tidok marli khoim. Tannem taka vicharlem "Ani tum kitem? Sorgar thanv ailolo dev-dhut vo Sant? Bhagivont? Dusreancher fattor marunk tum kitem, ekdom boro monis? Hoi? Zalear, igorjintlea eka Santak kuxin dovortam ani tea zagear tuzo puttlo vo murti dovortam. Zalo khos? Zori tor tujea lagim dusreachem borem ulovpak kainch nam zalear, peleachem vaitt uloinaka." Padri Vigarachim utram, hat ubarinastana tachea kansulla soklla vazlim astolim. Tannem sopnant porian chintunk nam astolem taka oslo kodokk zabab, Vigar di’it mhunn. To dis thavn to aiz meren mhellim chintnam ghevn to portean igorjent dislona khoim.Hoi!!! Amche-i sorbhonvtim osle zaite monis asat. Purumentachi vevostha korunk bhatache kodde astat tache poros vhodd, dusreancheo vaitt khobro zoma korpache tanche lagim chaddianche kodde asat. Punn, thoddem bhou peleachem borem ulounche khatir, tanche lagim tandull map’pachea anattea itlem lhan kalliz-ui asona. Lino B. Dourado
