Why is a Goan Pedro always a drunkard? Nidhlolea Kristi Gõyakarank zagrut korchelo ek vhodd kholayen kelolo vichar!!! Ani korpi mhunn konn? Gõycho susegad Kristanv? Gõycho Kristanv oslea vicharan asa? Thodde Gõykar Kristanv asat te, angaveli nimnni chedd’di purean tanchi magli zalear, apnnalea faidea khatir, vingllo zaun, vikunk toyar astolo. Sarkem mhu?
Gõycho Hindu somaz, Gõychi sonkrutay, asmitay, porompora samballunk teag korpi mhunn, aiz sidh zata. Barik nodren aiche poristithicher nodor marun pollelear, amche Hindu bhav Gõy Gõykarank samballche rattavolint guspovlole asat te, amkam dollebhor pollevnk mellta. Hoi ki na? Hindi cholchitramni, Kristi Gõykar bebdde mhunn chitraytat, ani Gõychea Kristanvamni aiz meren koddok nixed porgottunk nam, ho husko dakhoun, Konknni-Marathi filmi direktor Rajendra Talak baban, gelea Munglaradis, 41vea Ontor’raxttik Film Utsov (IFFI) ‘O Maria’ Konknni film sinema poddear dakhoile uprant, potrakaram thaim uloitana gombhir vichar mandlo. Hindi cholchitramni Gõykar bebdde mhunn kiteak chitravop? Kiteak ani kiteak mhunn? Gõychea Kristanvank bebdde mhunn Hindi filmamni chirtavop? Ho vichar Gõychea Kristi Somudayecho fuddari Archbishop Filipe Neri Ferrao, hanchea darar kottkottavun kortolom ani puray ‘O Maria’ film Gõyche Kristi dhorm muneareank, potrakarank, rajkarnneank, sorkari odhikareank ani Gõychem boremponn chintoleank khas proig dakhoun, ‘O Maria’ filman poilech pavtti Gõykaranchem chitr upzoilam te toren fuddarak Hindi fimamni dakhovchem mhunn, Digdorspi Rajendra Talak nomrutayen magtolo mhunn sangun dilam.. Tachim her filma Aleesha, (vattoronnam vixim zagrutay haddta) Saavariya.com, (online marriages) ani Antarnad (Don vegli pillgi avoy-dhuvem veglozarachi duspot) sinema sonvsarant bhouch famad zaleant. Aiz meren Gõykaramni tagelea filmamni koslo sondhex mellta hache vixim niyall kela kai? Vo Gõykar irlexem marun sust nidhta ani tacho faido bhailo monis kaddta teddna guneanv konnacho? Eklea Pedruk lagon soglle Gõykar bebdde tharavop? Gõyant, khubxea filmanchem sutting (shooting) zata, oxem aslolean Gõyche nanv sonvsarak porzolta. Gõychem kheritponn dakhoitana, choddxea Hindi filmamni Gõychea ghorabe soreachea bebddikayen buddole, ani ostoreo mottve nhesnnan sodol sobhavacheo oxe torechem ek vegllench mot divn chitraytat. Hea vixim zaiteamni avaz uttaila khoro. Punn ho avaz, oroneantlo sad zaun khoim tori xennla. Aicho Kristanv, Gõychem ani Gõykarponn chinta kai? Ken’na tori tannim hea gombhir prosna vixim vichar kela asot? Rajendra Talak, ho ek Hindu bhav zaun Kristi Gõykar bhavank bebdde mhunn Hindi filmamni chitraytat, hache vixim khont dakhoita. Hea vellar dor ek Kristanvan taka pallov divn, nhoinch Gõyche Gonvlli Bapachim daram doddovchim, punn puray lagu zatolea vorixtt sorkari khateachim daram boddboddaun zagrutay haddpacho vell pavla. Kristi Gõykar bebdde mhunn, chitraytat tea filmanchim suttingam Gõyche dotorer cholovpak Gõychi Monorojon Sonvsthen porvongi divnchi nhoi ani Gõykar bebddo koso dakoitolim Hindi cholchitram fuddarak Gõychea sinemam’ poddear dakounchim bondi ghalchi mhunn Rajendra Talak baba bhaxen, ami-i mottean tallo ubhartat. Lino B. Dourado http://aitaracheokaskuleo.blogspot.com/
