http://groups.yahoo.com/group/gulf-goans/message/33082
XROD'DHANJOLI Turturi* Gavpa Vellar Mornnanchi Ghantt Vazli. Kal solkalim nigtoch offisan pavlolom. Mhozo mobile vazlo. Landline-i velean to fon ailolo. Hanvem hello mhonllem. “Linobab tuka khobor mevlea?” “Kosli?”, tallo vollkicho mhonntoch, hanvem vicharlem “Rosary Ferns, aiz sokollim kallzache attakan somplo”, khinbhor hanv mono poddlom. Mhojea vatten avaz bond zalolo pollenv, tannem mhonllem. “Mhojean hem sotmandunk zalem nam, dekhun; kaim zannank fon korun khatri khortoch, tuka hi dukhest khobor divnk fon kela” Thoddo vell hanvunch xennololea porim zalom. Monn mhojem Rosary Ferns-a vatten oddun ghelem. Tachi ani mhoji vollok-ixttagott tondda purti astali. Vatter vo bhouxik svatter dodd’dat ten’na, ami eka-mekak hanstea mhukamollan zapoitale. Itlench amchem ixttagottichem natem. Punn tachea tiatr kolek mat hanv unch nodren polletalom. Ek vhodd gavpi, tiatr borovpi, digdorspi ani nattkist to aslo. Dekhunuch, tacho nimnno voznadik tiatr Kuwait Soddun Vetana, Konknni tiatr itihasan Kuwaitan tin pavtti rong-machier gazla, ani he tinui pavtti hanvem tacho tiatr bhouch umedin pollela. Mungllurche sonsthen, dusre khepek tiatr machier haddlolo tedna, Konkan Kala Samithi-Kuwait kharbareanchi, Kon’nod lipin borovpeachi, Lancy Rodrigues, digdorspi Rosary-chi ani tiatran khand marun bhumika kortoleanchi tust korun, hanvem tiatracho vimorson (review) mhojea Aitarachea Katkutleo vibhagan boroilo asa. http://groups.yahoo.com/group/gulf-goans/message/26106 Rosary-cho vavr Bharotachea dusrea pranthanlea lokan vakannla. Tea pasot tacho Kuwait Soddun Vetana tiatr, Kuwait Canara Welfare Association-an, Kuwaitche rong-machier Kon’nod lipichea Konknni somudayek tisre khepek dakoila. Nhoinch itlench, halinch Konkan Kala Samithi-Kuwait Rosary-chea tiatrachi nazuz DVD prothixit (presentation) kel’li ti hanvem polletoch, DVD vixim thoddi-bhov turturi* mavlle thollar (internet-ar) kortololom hi mhoji itsa asli ti, okosmat mhojea ixttan dil’le mornnache khobren turture zagear, mornnacheo ghantto vazoilea vorim mhaka dislem. Konknni palkacho anik ek khoddegant khambo kosllun poddlo. 21 Tiatr borun machier dakoileat ani sabar kantaram kessitir, CD-ir, VCD-ir ghaileant. Punn tacho mon bulgavpi ani portean-portean aikun dista, Veeam Bond sangata gailolo mando 'MOGAN TUJEA LASOTAM', mhojea ugddasan omor urtolo. Deva! Amchea ixttak sorgincho visov divnk, amchim prathonam tuje thaim Hanv ani Goa-world.com Team, somplelea Rosary-chea kuttumbak dukhest bhuzvonn ditat. Lino B. Dourado Turturi* - vakhanni Mando MOGAN TUJEA LASOTAM Gaupi: VEEAM BOND & ROSARY FERNS Moga mogan tujea lasotam, Uddtam bostanam sopnam sopnetam Ulounk tujea lagim anv lojetam...................... Mog tuzo kortam khoxem sangonk chintitam...} 2 Moga mog tuzo kortam gupitu Mog tuzo rigla re mojea kallzantu Ek pautt dhi maka tujem utoru Sodanch tujem rautolem ditam soputu...(repeat Moga) Ganvchea festak tuka poilolo, Fulam laun mojeaxim ailolo Hath mozo kuddik tujea tenklolo........ Teach vellar mog tuzo kallzant riglolo...} 2 Moga mog tuzo kortam gupitu Mog tuzo rigla re mojea kallzantu Ek pautt dhi maka tujem utoru Sodanch tujem rautolem ditam soputu...(repeat Moga) Igorjen magnem kortam Devaku Gopant mojea add mhunn mojea Franskaku Mevona tor ghatt zato mojea kallzaku..... Konnuch naka ankvar rautolem sasnaku..} 2 Moga mog tuzo kortam gupitu Mog tuzo rigla re mojea kallzantu Ek pautt dhi maka tujem utoru Sodanch tujem rautolem ditam soputu..... (repeat Moga)
