Aiche Fuddari ek Pidda Gõyche Dortorer? Aiz Janerachi 16vi. Ek vhodd mothvachi tarik. Gõyche Mahan fuddari Dr. Jack de Sequeira-n, Gõykarank Gõykarponn, osmitay, sonskrutay samballun dovorlear, aiz 43 vorsam sortat. Hoi!!! Aiz bhouch vhodd itihasik ‘Lok-Motacho Dis’. Dor ek Gõykar hodd’dear hat marun apunn niz Gõykar mhunn bodayen sangta zalear, tannem poilim Mahan Lok-Motachea bapaik, Dr. Jack de Sequeira-k dolleam samkara haddunk
zai. Takach lagun aiz amchem Gõy, Maharastracho ek prant zanvcho vattovlo. Ganvche panch, sarpanch ani Gõyche amdar-montri monddolache udd’dde ghetoleamni, Lok-motachea bapaik, apnnalo ek adorx (idol) koso mandun, tachea panvlamni ek khoro promannink fuddari zaun, ganvchi ani Gõychi seva korunk zai. Punn aiche fuddari, oxem kortat gai? Xikxhit (educated) Gõykaramni, Gõychem fuddarponn hatant ghevn atanche o-xikxhit (un-educated) fuddareank, tancho khoro zago dakounk fuddem sorunk zai aslem. Punn oxem zaina. Kiteak zait? Kudd’de motdar apunn kitem kortat tem vaitt, hem zanno astona thodde duddvanche axek lagon fokot gundda-movali ani be-moriadik jivit jiyetolea o-xikxhit rajkarnni banxirim portean-portean nivddun haddun Gõy broxttarachea khonddant lotat ani thoinsorlem kaddun nigutt korpak bhouch muskil kam’ aslolean, xiklole monis fuddem soronant zait? Adlea xikxhit zoxem; Dr. Jack de Sequiera, Dr. Alvaro de Loyala Furado, Dr. S. Mazarello, Dr. Maurilio Furtado, Dr. L. P. Barbosa, ani her dusre zaum te vokil vo dhondekar Vassudev Sarmalkar, Teotonio Pereira, Orlando Lobo, J. L. Araujo, J.M. Souza, Urminda Leitao, ani her promannink fuddareamni Gõy, Gõykarank broxttachara vinnem dovorlolem tea toren, atam amkam, tanche bhaxen fuddari kiteak mellonant? Asat!!! Ani melltat. Punn, xikun brutt mhonttlole Gõyche motdarank osle fuddari nakat. Dekhun, aicho xiklolo Gõykar rajkarnneank bhitor sorunk fattim sorta.Lokmot zal’lea 1967 vorsa, atam porim tea tempar ghoddie titlem puray vachunk-borounk lokak yenaslem zait. Punn tanchem edukasanv, mhonnchem; kitem vaitt ani borem tem somzunk, tankam somzonechem borem ginean aslem ani xiklole fuddari asle te, khoro marg dakhoitale. Dekun, tea tempavelea lokan Gõy, Maharastra jillin zavnk noikar dil’lo. Ani tea khatir aiz hanv, hi Romi lipin lekh boroila to, tum vachtta, ani ho borovpacho obhiman mhaka Lokmotachea bapain, Dr. Jack de Sequieran dila mhunn sangpak, vhoddlem vhoddponn Bhogtta. Na zalear.....? 1967 vorsa hanv, 14 vorsancho iskolacho tornatto aslom. Zori, chukun lokmot Maharashtra villin zal’lem zalear, mhogelea iskolan xiktana ek vixei Morathi mhaka xikcho poddpacho ani nhoi Konknni. Ani mhageli-tugeli avoy-bhas Morathi zata asli. Sarkem mu? Adle xikxhit fuddareamni Gõychi zomin bhailea buildderank vikunk nant. Mina khatir dongor konddunk nant, zhaddam khatrunk nant. Ganvchi udorgott mhunn mega-project ube korunkochreachem dovdir bhitor haddunk nam. Gõyche dortorer tannim promonnink vavr kel’lo.Tannim, aplea poddacho lab vo lounch khavunk nam, nhoi mhunn don nanne chorun apnnaleabhurgeam ballank sugur korun dovorunk nant. Te podder mele ani te undde khobar zale. Hoi!!! Adle promannink fuddari somple (bhov thodde jive asat) ani Gõychem raj, xikop naslolea gunda, movali, chor, broxttochar ani luttmaranchea hatant poddlam. Dekun, Gõychem boreponnn chakunk axelolo Gõykar vicharta. Aiche xikop naslole fuddari, ek pidda Gõyche dortorer? Lino B. Dourado Lapitt http://aitaracheokaskuleo.blogspot.com/
