ATAM LIGHT PETTLI Tujea ixttan, khub vorsam fattim zavn ghel’le ghozalechi okosmat yad keli tor, tea vogtar, tujea ugddasachi divlli pettunk, bhouch kotthin zata. Kaim pavtti kosle-i ghozale vixim uloitana, kallabhair pavil’leo ghozalinchi yad urona zatoch, tum sandlolea porim vagtta. Hem tor tujea ani mhojea jivitan nhoi, punn sogllea sovem ghoddta. Ugddassachi teli asa ti, novem-novem bhitor gheta, ani naka tem sodamkall bhair ghalta. Visorloleo ghozali portean motin haddtana vo ugddass yeta ten’na, hoi-hoi, atam light pettli, nam tor, atam mhaka yad zali, oxem kitem tum sangunk sodtta. Monis idadin vo pirayen vhaddta-vhaddta tednam, ticho/tacho ugddas uno zait veta. Hem tor amchea soimbanuch asa. Ani mhojea oslea 1953 modelache mon’xachi memory kitli fresh astoli? Hem anik sangunk zai tuka? Tea khatir…….
Ghele char-panch sumanam, konn ekti bail monis mhoji ixttagott lok-avddichem FaceBook-ar korchea khatir vinonti (request) kortali. Ti bail-monis vollok-bhaili aslolean hanvem tigelem magnnem poilim apnnavunk nam. Punn tichem magnnem dispottim choddot ravlolean, mhagelea bejarlolea monan ek dis sivkarlem. Itlean tinnem Facebook-a velean sondhex pattounk suru kelem. Natalam ani Novea Vorsa somoyar, bore anvdde pattoile. Antre-poirean mhojea borpavollichi tust korit ravli. Pilarchea, sattolea V-Ixttar, Gulab-ar ani Jivit mhoynallear chappun yetle lekh chukoinastona vachta mhunn kollit kelem. On-vollki (stranger) bail-monis, uzvaddak yetle mhoje lekh ani kovita kholayen vachta mhunn, mhojea jivak ekdom borem dislem. Konnank dischena? Hoi mhu? Oxem astona, tiche dinvas attoytolom mhunn, poir tedus hanv Facebook-ar ghelom. Itlean Facebook-a vele ixttinnin, mhojich vatt pollevn ravtolea porim online chart-ar bhitor sorli. -Hi Lino -Hi R….(tichem nanv ghenvchi mhaka khuxi na) -Koso asai-i? -Ghottmutt. Tumchi bholayki kosi cholta? -Devachem kurpen asam borim. -Gõyam khoimsor? -Kitem? Kitem vicharlem? Mhaka vollkona-iii? -Vollok, porot kelear bori nhi? -Mhaka visorlo re tum chora? -Ragar zainaka. Ho komputor porno. Memory, thoddi asa. -Hanv somzunk nam. -Hanv pirayen vhaddlolean, titli yad sarki doronam. -Ha, ha, he, he.Ani tuka kitem dista? Hanv pirayen tornattem mhunn? Tujeach idadir pavleam -Zalear, sarki vollok dilear bori nhi? -Mhaka sapuch visorlo mhunn, ojeap dista tujem -Toxem nhi tem. Tujea nanvanchim kitlinch zann mhaka vollkotat -Bouch famad zala nhi tum? Kiteak vollkochinant? Punn aik. Hanv ailim mhonntoch, tum melolo, sodanch amchea mamagher astalo mure. -Tuzo mama? Konn ani khoinsor? -Mhojem maim ghe! Taka-i visorlo? Tumchea Gabriel Cruz vaddeak tekhun Bebepaddar. An….gher. (Hangasorui nanv lipoitam) -Yad zaina. Bhouch vorsam zalim ganvam bhair aslear nhi? -Ugddass na tuka? -Koslea ugddassachi ghozal korta tum? -Tumchea ganvchea eka tiatran ami dogaim nheslolim. Tujea borobor duet gailelem. -Khonnachea tiatran? Bhurgeaponnar khub zanna sangata hanv rong-machier choddlam -Borem tem asum. Sanjechea vellar, tumchea ani mamaghelea vaddeantlim bhurgim ekthaim zavn, chor-pulis khelltalim -Ho khell sodancho aslo. Konn-konnachea ani koxim khelltamlim, hi yad mhaka kosi asteli? -Ek dis ami chor-pulis khelltana, mhojea maman amkam sangatak sampdaylolim -Lipun khelltana konnem tori eklean, lip-choriam khellpeank, khoim lipleant tem sodun kaddchelem kam’ aslem nhoi? -Toxem nhi re -Ani koxem? - Mamaghelea zollvachea khompten ami dogaim liplolim, ani kitlo vell bhitor ami…….loz dista sangunk…. -Oh bap’pa!! Oh Bap’pa. Tum go tem?……..Uprant, mamagher dislench na tum. -Atam light pettli? Lino B. Dourado
