Oso Ek Valentine Aslo Febrerachi chovdda tarik mog kornnarank bhettoylolo dis mhonntat. Adlea ani atancho Valentine dis sorombhan, zayto forok asa. Amcha bhurgeaponnar ami somzotale, ho dis fokot niz mog kornnarank vo fuddarak kazar zatoleank. Adlea tempar, antancha utpoti (generations) toren ami ken’nanch hea disak mhotv (importance) divnk nam vo toxem korpak amcha vhoddilam koddlean ami xikunk nant.
Khall bodoltam-bodoltam, hi ostomti desantli poromporik chal Gõyant bhitor sorli ten’na, Gõykaramni virodh dakhoun nam. Punn Bharoti kaim rajantle lok, hi ostomti poddot Bharoti sonskruttik bostayta mhunn, Febrerache 14ver vo Valentine disa, vhodd nixedh porgottat Kallzan mog utpon zata ten’na, apnnalim mogachi bhavnnam (feelings) ani maia (affection) kolit korpak Valentine disa fullam bhettoytat. Adlim mogiam nanv ghalistanam guptteam postantlean kard pattoun ditalim. Ani oxem toren mogianchi ixttagott vhaddot vetali Ho Valentine dis koso suru zalo vo konnank Sant Valentine-chi goroz poddli hi mahiti sarki mellona khori, punn to mogiancho askari (patron of lovers) mhunn sogott zonn manun ghetat. Sant Valentine ek padri aslo. Tisria xenkddian Cladius II Romacho Patxa aslolo ten’na tannem ankvar soinikank (soldiers) kazar nivarlolem. Hem ek vaitt kortub Sant Velentine-ak dislem ani guptteam tornattea mogianchim kazaram korunk laglo. Survatek hanvem sanglam. Valentine dis fokot mog kornarank oxem adli pillgi somzotali. 'Happy Valentine'mhontlear 'I love you oso' somoz kaddtale. Dekhun, amcha khallar atanche toren, Valentine disacho ghonnghonn zai naslo. Hi ghozal bhouch tempa veli. Amcha vaddeantlo ek cholo, eke choliechi ixttagott zoddunk sodi. Ti choli Nuvem-Dongrim ganvantli. Amcha xezarchia vaddeanli ‘bachi’ zavn asli. Mhonnchem, tigeli avoy Utordd’dechi. Antre-poyrian apnnale mamagher, xamainche khobrek mhunn, saikolin yetali. Ani mhagelo kombo xezari ixtt, tichi 'line' marpacho 'chance' sodtalo. Ek dis tannem, tachi gupttim chintnam mhaka ugtim kelim. To mhoynno Febreracho aslo. Febrer 14 tarkecho vo Valentine disacho orth iskutaun hanvem taka sanglo. Tannem mogacho anvddo ghil’lo. 'Happy Valentine' vo adle toren somzone porim 'I love you' mhonnon, tache kallzantle mogache umalle te choliek sangtolo, hi opekxa dhorun Valentine disa, xemainche khobrek ail’le kodden tika bhettunk ghelo. Punn tachim mogachi chintnam mogachem sopon zait mhunn tannem lokxan matui gollounk nam. To khorxet-khorxet mhojexim ailo. Tachi hi dhanvpoll poristithi pollevn Valentine koxo-kat zalo tem vicharlem “Arre tem cheddum bhedd’ddem mure. Tea cheddvak borem aikunk yena dista”, tannem bhivkura avazan mhaka sanglem “Kiteak mhonnttay tum?”, hanvem vicharlem “Hanvem tika tamddem rose divn ‘Happy Valentine’ mhonllem ten’na, tinnem pãyanchem zotem ubarun, aplea zoteancho number zanna kai mhonn vicharlem mure ya”. Lino B. Dourado
