DMD Gõycha Ostoreanchem Nanv Piddear Korchelem Film? Sonvsarbhor famad zal’lem sompil’lea Raj Kapurachem ‘Bobby’ film-an, sokall tem sanz nidonk vocho meren Gõykar sorea bottlik ghott veng marun asta tem dakhoitana, Gõychi soimbik sobitay, nitoll dhove revencheo dorya vello ani her sabar nazuk dekhaveamni nettoylolem filmi podd’dear dakhoun, dexi ani pordexi bhonvddekarank pixear kaddle. Gõycho xant-xitoll varo ani udhar opurbayechea kallzamni vengoitolo lok ani lokambhorim mekleaponnan Gõyant bhovunk zatelean, bhonvddekarank amchem bhangara sarkelem Gõy, ek sorguch koso zala. ‘Bobby’ filma fattlean anikui khub filmamni Gõykar bedde ani ostoreo unnem sobhavacheo mhunn dhakoilam. Punn aiz meren Gõykaramni koddok nixedh marlolo ami aikololena. Dusrea Rajeamni tanchea sonskrutticher vo porampora chalicher thoddembhov add filmamni dhakoilear, thoinsorlo lok filmacho proig choltolea sinema hollancher akromonn korun, tem film nakarunk fattim soronant. Punn amchea Gõyant? Susegad-ponnacho faido ghetat kai? Ani atam onek toren Gõychem ani Gõykar ostoreanchem nanv piddear korunk ‘Dum Maaro Dum’ hea nanvanchem film, Bollywood digdorspi Rohan Sippy-n toyar kelam. Hem film, Gõychea ostoreanchem mol denvoyta. Gõycho soro sovay ani ostoreo teavon lingi vatten oddunk sovay mhunn dakhoyta. Khorem mhonnliar Gõycha utor dixen Kandolim, Kalangute, Baga, Vagator, Arpora doryavelle vataran vikallim vongddancho dhonddo amchea Amdar-Montreanchea axirvaddan nettan choltat. Motte-mottea lokancho ani unchlea zagear aslolea pulis odhikareancho hattun hat asa. Bekar aslolea barik Kristi tornatteank poixanchi as dakhoun tankam hea dhondean bhitor ghetat ani pulis dhadd (raid) ghalta ten’na Michael Braganza, Colin Coutinho, Lorsa Misquita ani her Kristi lokachim nanvam amkam vachunk vo aikunk melltat. Nanv vogddavpi Mumbaim ‘ladies bar’-am bond zatoch, thoimsorlea baramni nachpini atam Gõycha baramni distat mhunn potramcher vachunk mellta. DMD filman Gõychea Kriti somudaiek vaitt sobhavacho rong dila ani vikallim vogddam vinkpi fokot Kristi somaz mhunn chitrayta. Brittix bhovnddekan Scarlet Keeling, 15 vorsanche choliek Anjuna ugte veller drugs divn ani soro piyeun ticher bholatkar ani kunn zal’lo. Tea vellar sogot zanna asle tem kam’ konnanchem aslem poi tem. Punn nikall kitem? ‘Gõycha Osttorancho Avaz’ hannim Gõycha ostoream man-moryada vixim khellta mhunn nixed porgottun DMD film dakhonvchem bond korcheak vorixtt lagu zatolea sorkari odhikareank ani ‘High Court’-ak ulo marlolo, punn kalcha Povirt Sunkrarak ‘National Censor Board’-an nivallo dil’lem DMD film INOX sinema hollant chalu kelam.
Dan Brown-acha kadamboricher adharun Povitr Sobhecher ani Povitr Pustokacher akromonn korun, Khristi lokachim bhavnnam dukhoitolem Inglez film ‘Da Vinci Code’ Ponnjent ani Gõybhor sinema hollamni dhakovnchem bond kel’lem asa. Tea vellar eka Kristi Montreacho tenko aslo. Ani DMD filma vixim itlo vhodd boball poddla to nivarpak amche Montri odik korun Kristi Montri khoim nidhun poddleat kai? Zori tor ‘Liquor is cheaper here and women still more cheaper’ hea sonvadda (dialogues) boddla ‘Liquor is cheaper in Goa and Goans Cheap Ministers still more cheaper’ ho sonvadd hea pikcheran aslolo zallear Gõyche Montri oge ravtole asle? Hoi? (Orxim zallear sarkech cheap-uch re te) Gõyche dottorer film kaddpak porvongi ditana Gõycha sorkarachea hasrea khal aslele ‘Entertainment Society of Goa’ hanchea odhikareamni filmachi script topasni korun, Gõykaranchim bhavnam dukhovpa sarkelem kitem-i aslear filmachim shotting-am Gõyant kaddpachim bond uddounk zai. Unnemponnachem chepem amchea mhattear poddche poilim vo filmache shooting suru zaunche adim E. S. G. odhikareaamni koddok panvlam ghevn filmachi script polloupachi atam nibel gozoz. Gõyant DMD cholchitrachem shooting kaddpak porvongi ditoleak poilo khursar marcho oxem zaitea zannachem mot asa. Mogacheano, je meren atanchem dolldir amchea povitr Vidhan Sobhen aso meren amkam amam Gõykarank boremponn chakunk mellchena. Ekuch tancho hetu divide and rule. Hatak melltat tim nibam ghevn xantin ani ekvottan choltole Gõykaram modim futt ghalunk sodtat. Dekhun Gõychem ani Gõykaranchem borreponn chinti nasloleank fuddle vechnukek portean nivddun haddop mhonnchem, ek vorixtt piddechitsunami Goyant bhitor haddtele ani tache guneanvkari dor eklo motdar ollkott koso tartolo. Chintun panvlam ghalchim. Lino B. Dourado SOMENSTANK PASKANCHI POROB ANVDDETAM
