http://groups.yahoo.com/group/gulf-goans/message/34302 DANT NASLE ZALLEAR... Amche kuddiche bhov thodde sande zoxe porim dolle, nak, dant, kan, polle ani tondd okman khatat title dusre kuddiche sande khainant. Ani choddan chodd dant mhonllear, mhojem chukichem zanvchena. Okman kosle? Ho vichar tumkam vichirt disot.
Lhanxea poran apnalea avoy vo bapay-k portean zap (back answers) dili zalear, rokhddench mhonntat. "Tonddar don vazoy tachea". Orxim pollevnk ghelear, poran jibecho vapor kela vo avoyk vo bapayk portean zap ditana jibecho vapor zala. Zalear, porache tonddar thapttam kiteak? Jibek chimptto kaddunk zaina? Bhurgeaponnar ghoddeancho khell khelltana, ek dang subeij marun ghodd'diak penddo marlear dusro khellgoddi angar yevn ekdam mhonntalo, "tujea nak barar marum? Roddi (cheating) khellta?” Hangasor nakak okman khavpak nakachi kosli chuk asli? Ghodd'deancho khell nakan zatalo? Ani oxe toren "kana sokla avaz kaddtolom vo dolleancher ekuch marun dolleantlo uzo bhair kaddtolom, ekuch pollear martolom”, jinsavar torechea khellamni ami lhan astona naka tim utram sonttapun uloitale khore, punn toxem ken'nach, mhonnchem; nakar vo tonddar vo kanar mut vo thapott boso naslem. Tovui zalear onek torecho khellantlean ek khelluch koso aslo. Oi mu? Punn hatunt choddan chodd amche 'dant’ okmananchi utram khatalo ani tenvuim zalear koslich chuk nastona. "Arre tuka ajun ovkoldadd (wisdom tooth) aileli na ani tum beer piyevnk xiklo?", konn eklean zanttelean poilea zolm disachem partek ailolea eka ottra vorsam borunk naslolea tornnateak mhonntlem. Beer to tonddan ghonttalo zalear, ovkoldaddek opman kiteak korop? Choddxem vhaddtoleank char ovkoldadd 17 tem 25 vorsam pirayer yevpak suru zatat ani hea ottra vorsam bhorunk nasloleak ovkoldadd yevunk na mhunn, tea zanttoleak koxem gomlem? Ek dis futboll khell khelltanam mhozo paim bollak chukun dusrea virudh (opponent) ttimicha khellgoddeacha paimyar boslo ten'na to mhojea angar yevn tannem mhaka nitt mhontlem. "Ekuch mut dantar marun dant pottant ghaltolom." Paimyani zal'li chuk dantancher kiteak pavli? Ho ek dantank sab-subo okman nhi? "Tuka bot'tis dant aslear mhojea fuddem ubo rav",Ponnje bazaran dogam modim kestanvam kortolea eklean avhan (challenge) dilem. Okhondd angloticho babddo bharikxea mon'xachi kodok utram aikun monneaponnan thoinsorlo koddsorun ghelo. Hanv chintunk poddlom. Bharik angloticha mon’xachem avhan svikar korunk, edea vhodd kuddicha mon’xak, bot'tis dant nasle kai? Koslem-i kestanv tem zaum. Ragacha vellar dantacher martolo mhunn ekto dusreak dhomki dita. Fuddle dant bhairsorloleank "ekuch marun bhair sorleat te dant bhitor ghaltolom”, oslea sobdanim bhirant ghaltat. Duddache dant zhoddlolenant, cheddvanchea mogan poddla mure, konn ekto lhan tornnato mogan poddlear tache ganvche malgodde asat te kebadam kortat Mhojea ugddasan amche duddache dant zhoddtale ten’na veginuch dusro dant bhorun yevcha khatir zhoddlolo dant ami, amchea poromporik ghorachea sulche vo ganvtti nolleancher vhoir martale. Dantachea vellean opareo unnem nant. Dakovpachem dant ani khavpache dant veg-vegle. Dant-ui mhoje vontt-ui mhoje. Dant korkoraylear pott bhorona. Ek dant zhoddlear soglle kaddinant. Anikui zaiteo asat. Hea vogttar yad zaina Bara vorsanchea pirayer bhair sorlole dant, dantachea dotoraxim (dentist) vochun ilaz ghetlo nam zallear vhadday zatoch dantachem moskot bhair sorlolem ugtem dista. Thoddo lok bhair sorlolea dantancheruch tea-tea mon'xak vollkotat. Brazilacho futboll khellgodi Ronaldoche bhair distele dant bhitor ghalunk dantancha voizaxim kiteak vochona oxem eka potrakaran vicharlolem ten’na tannem soroll zab dil’li. “Hea mhojea bhair sorlolea dantank lagun mhaka akh’kho sonvsar TV velean vollkota” EK GOZAL Eka kazarak ghel’le kodden Lapittachi amizad. Ten’nachi ratchi kazaram, sokall fantodder meren petromax divear zatalim. Sokall zatam-zatam petromax dive jhemetale. Tea zagear nachunk Lapittak dupet umed zatali. Vhokllecha vatten eka cheddvachi Lapittan amizad keli ani dattayer poddli. Lapitt kallokacho mhonnchem, jhemetolea petromax diveacho faido kaddi. Amizad choddot astona, tea cheddvan tacho pott’to mhaglo. Ani don disa upran ek chitt topalalean taka pavtti zali. “………….Mhoji mummy mhaka vicharun sotayta. To bhair sorlolo dantancho kitem kortalo kai mhunn. Mhojea onttar asli lipstickkosi natak zali, ho ticho hozar pavtti proxn…………………” Lapittan tika zap divn chitt boroili. “………………Ghorant bhitor sortanch mhoja-i avoycho titloch proxn. Mhoje bhair sorlele dant tambdde kose zal'le kai mhunn……………” Lino B. Dourado
