Fattlem dedd voros thavn 1097 AIDS suvidha cholona By Stanley Vaz
Ponnje: Gõyant HIV/AIDS hache vixim fonavelean mahiti mellun ghevpak lokak khup kotthin zata. HIV/AIDS-achi mahiti aplem nanv ani vollokh gupit dovrun 1097 ankddear fon korun apleak zai ti mahiti gheupa khatir "Goa AIDS Control Society"-n (GACS) sovlot dovorloli. Punn fattlem dedd voros zalem hi suvidha loka khatir bond asa. He vixim GACS-ache odhikari sangtat ki 'software' ibaddlolean hi seva bond poddlea.
Hi seva bailank ji aplem nanv ani vollokh gupit dovrunk sodtat teach porim dadle zankam he pidde vixim mahiti zanna zaunk 1097 'AIDS Help Line' hi seva khup upeogachi zatali. Ticho labh zaiteach zannamni ghetlea. Gõykaruch nhoi punn Gõybhaile ani khas korun Gõyant yevpi bhonvddekar he sevecho faido ghetalet oxem GACS-intlea odhikareamni sanglem.
Gõyant hi 1097 seva 2002 vorsa thaun suru keloli. Survatek he sevechi mahiti khubxea lokak naslolean sevecho vapor unnea promannan zatalo. Punn 2005 voros yeta mhonnosor khubxea lokak tachi khobor pavli. Ani khubso lok te sevecho vapor korunk laglo.
1097 ankddeacher fon kelea uprant fon kortoleak komputera udexim HIV/AIDSa vixim goroz ti mahiti melltali. Ani he mahite vorvim fon korpachem zaunk na zalear teach komputara udexim he pidde sobondant mahiti aslolea zannkarak (Councilor) ho fon pavtalo. Ani fon kortoleachi zannkarachi eka meka kodde soroll bhasabhas zaupacho soyeg melltalo.
2007 vorsak dor disa he pidde vixim mahiti ani budh gheupa khatir 8 tem 10 zannancho fon yetalo. 2008 vorsa vicharpus korpeanchi sonkea vaddli, oxem GACS-int ostoreancho ankddo chodd aslo. Teach porim nanvam bodlun ani fottkiri vollokh diun fon korpeancho ankddo poryan chodd aslo oxem thoimcho ek odhikari sangta. Hi seva itli nettan ani bore bhaxen cholta astana ani igorjent ticho faido gheta astana 2009 vorsak ti avchituch bond poddon lokak goirsoi nirmann zali. Hi seva toyar korun divpa khaitr GACS-in ho kontrad Mumbaichea software koponint dilolo. 2002 tem 2009 meren hi seva bori choltali. Punn atam fattlem dedd voros thavn he sevecho labh gorjevontank mellunk kotthin zalam. Hea vixim GACS-in hi seva porot chalu korpak koslim panvlam tori ubharleant? Oso proxn thoimchea eka odhikareak kelo tedna taneim sanglem ki Mumboiche software komponi kodden GACS somporkant asat. Hi seva zata title vegim suru korun ticho labh lokak diunk fuddarak he sevent koslich addkoll uprasona zaunk GACS kallji ghetoli mhonn sanglem.
http://www.v-ixtt.com/client/list.asp?id=6
