Paskanchea Benzimenta vellar sunean padricho kanuch ghansan toddlo By Bosco de Sousa Eremita
Ponnje: Saxttichea eka ganvant SVD Sonvsthecho vangddi Pri. Manuel Pereira suttyamni ghora ail'lo, to Paskam somoyar ghorancho benziment korunk gel'le kodden Mayache 4ter eka ghorantlean apunnuch suttun ailolim tin German Shepard suneamni taka yevn, padricho davo kanuch ghansaun kaddlo.
Padrik hospitalant vhorun sunean toddun kaddlolo kan voizan operesanv korun portun lail'lo. Ponn padriche kuddik to kan togot vo na tem sangunk zainaslem. 45 mintam uprant to kan hospitalant haddun voizamni lailo. Ponn heo volli boroitana khobor mell'lolea pormannem padrik lail'lo kan ibadd zalolean kaddun uddouncho poddlo mhonn gomlam. Churchure hea padriche; dhormik seva korunk gel'le kodden padrik oslo obghat zalo. Konnak xinn korcho?
Fr. Manuel Pereiran bhairuch thavn tea ghorachea ghorkarank suneank bandleant kai mhonn vicharlea uprant to darvonttean bhitor sorlo. Tache adim dogam sunim tachea fattlean laglolim, tantlo to vattoul'lo. Raia aslole, SVD Mission Seminaricho Vhoddil Fr. Carlisto Gomes sangta tea pormannem Fr. Manuelan dogam suneank zoddpailim ponn tisrem sunem tachea angar uddun taka sokol uddoilo ani ghansailo. Padri borobor ek bhurgo-i aslo to darvonttea bhairuch thavn dhanvun gelo mhonn suttlo. Khorem mhonnlear suneank kuddant ghalun khilli ghal'li. Tim daracher uddun-uddun khilli sokol poddun dar ugoddlem. Ek sunem bhair sortanch dusrim dogaim bhair sorlim mhonn sangtat.
Kan hospitalant pavunk uxir zale. To kan sunean ful-bagint uddoil'lo to uprant mell'lo. Ghoracho dhoni kan sunean khello mhonn somzolo. Padricho jiv salvar korunk hospitalant vhorpachi poili goroz asli, oxem Fr. Gones sangta.
Mhonntoch padrik rogot vhanvta tosoch hospitalant vhelo, ani ghorcheamni porsantle bagintlea zhaddam modem kan sodtana tankam kan mell'lo. Kan mellona fuddem ghorcheamni hospitalant vhorun voizak dilo ani voizamni to padrik dosoilo. Teach vellar mell'lolo zalear upeogi zait aslo mhonntat.
Fr. Manuel Pereira Gõykar padri, Indore misanvantle firgojent vavurta. Suneachea dhoniachem nanv gupit dovrunk maglam. Zaitim vorsam zalim firgozamni padri benzimentak yetat tednam suneank bandun dovorchim mhonn lokak xiddkaitat.
Atanchea kallar amche modem suneancho vhoddlo somajik proxn ani kittkitt vo sottavnneo uprasleat. Padrink bhettek yetana ghorantleank koxim asat tumi mhonn vicharun ghorant bhitor sorche bodlek tumchea suneak bandlam mum oxem vincharun noman korchem poddta mhonn Agxecho Kur Fr. Manuel Rodrigues sangta.
Zaite pavtti lok igorje yetana fattlean mekllim aslolim sunim Igorzamni yevn zogoddtat ani Misachea vellar soglleank bejesanv haddtat mhonn to sangta.
Kitlech pavtti igorzamni Misak yetana suneank ghora lagim bandchim mhonn padri magtat. Dekhun osli korondday unnim zalea tori astana suneanchi sonkhea vaddot asa ani sunim chabopui chodd zalam. Zonvaranche hok'k rakhunk vavurtoleank lagun veta thoinsor suneanchi korondday vaddot gelea mhonn kaim lokan lokx oddlam.
(ENDS)
