Igorje mukhar avhanam
Igorje mukhar kalla pormannem kherit avhanam ubim zatat. Adhunik kallar
him avhanam vaddot aslolim amkam distat. Polleunk gelear hea avhanank
fuddo korunk igorjechean zaunchem na-xem bi dista. Amchea modlim thoddim
zannam igorz hea avhanank fuddo korunk kitench korina mhonntat.
Bhroxttachara add zhuzunk ek vhodd avahan Bharotantle igorjen fuddo
korunk toyar asunk zai. Bhroxttacharacher zhuz manddunk dor eke
firgojent ek tori mhotvachem cell asunk goroz asa; nhoi fokot loka modem
zagrutay vaddounk, punn bhroxttacharak panchayatimni ani gram sobhamni
fuddo korunk igorjecho tenko na zalear zhuztolim mon'xam eksurim
zatolim. Panchayatink Igorjechi bhirant na oxem mhunnunk zaina. Punn
Panchayatimni aslolim Igorz kaim korchi na mhonn somzun
bhroxttacharachim panvlam martat. Igorjeche mogi aplo faido polletat ani
igorjek rokoddench 'donation' diun hea zhuzantlim kuxik sortat.
Igorjeche osle mogi kosleo-i 'scheme' igorjek melltoch, panchayaticher
ani amdaracher add ulounk bond kortat. Hoch adhunik kallacho itihas.
Lok mhunnta bhroxttachara add zhuzunk padri toyar nant ani padri
mhunntat bispacho sohokar mellonam. Ami padri mhunntanv
bhroxttacharacher zhuzunk lokachem kam'. Lok mhunnta amkam fuddari zai.
Padri mhunnta hanv fokot atmik fuddari. Oxem korun somazachea
fuddareank, te somazache fuddari mhunn khoboruch na. Te soglleam poros
aplo chodd faido polletat. Ani lok mhunnta amkam kitem-i tori mellta,
ami oginch ravum-ya. Hangasoruch bhroxttacharacher manddlolem zhuz thambta.
Dusrem vhodd avhan igorje mukhar asa tem poryavorannachem ani amchea
bhonvtonnim aslole xristticho samball korunk. Igorjecheo zomni viktat
to-i arop asa. Xetam vochop mhonnllear lojechi kornni oxem amkam dista.
Nhoich xetanchea vavracho obhiman vollkhunk bogor amchea bhonvtonnim
aslolea srixtticho samball korunk igorjechem mottem avhan.
Igorjechea xetam-bhattancher amchi virsor poddlea. Tantlem utpadon unnem
zait veta mhonn ami aikolam. Punn hea xetam-bhattamni kitlea xetancho
ani zhaddam-peddancho vavr cholta tanchi amkam khobor mellona. Punn
xetam-bhattanchem igorjek kainch mellonam mhonn ami aikotanv. Tancho
samball korunk padri mhunnta apleak vell nam. Somiti mhunnta konn korunk
toyar na. ani kelearui igorjek faido na. Korunk dilear, vavr korta to
zomin apli mhonntat. Taka lagun zomin dinastana dovorlear borem, oslo
zala atancho somoz. Zomin padd zal'li amkam distoli ponn zomin tori
igorjek urtoli. Heach pasot zomnichi pikavoll unnim zait veta.
Hea avhanank fuddo korunk amkam boll fokot atmik vatten yetolem. Punn
atmik ani dhormik totvank ami chodd lokx dina zaun oslea avhanank fuddo
korpacho uzo amchea bhitor palovta. Ami fokot devosanvam, devsthanam
samball'lear puro nhoi, punn dhormik totvam, srixttichim aslolim zhaddam
peddam ani bhroxttacharacher purpak ximiteri vaddounk goroz asa.
http://www.v-ixtt.com/client/ogrlekh.asp
