Bebeank marche nhoi By Maverick Martins
Gõyant pavsallo suru zauncho zalo. Paus poddunk lagtoch bebe bhair sortole ani amche tornatte bebeank dhorunk disa toxe ratiche bhonvtole. Ran Khatean bebe dhorpacher bondi ghal'li astana kitlech tornatte bebeank dhorunk bhonvtat tem distti poddtat. Konnui bebeank dhortana sampoddlo zalear 'Wildlife Act' ani Forest Act' hea kaidea khal tankam kheast asa. Fattlea mhoineamni bebeancho jiv vattaunk mohim choltali. Tantutn yes mell'lam. Bebeanchi zat he dhortore veli nopoit zaunche vatter asa. Sonvsarant aslolea 6,485 zatim modem sumar 1/3% unnem zait asat. Mon'xank lagun amphibians bebeanchi zat aiz nopoit zait veta. Zhaddam peddanchem nisontton zata toxench produxonn ani kiddink vokhot martat tantunt vattavoronant bodol zata, zomnint aslolem bebeanchem bim sompot ailam.
Bebeank marun soimbacher kitloch vaitt porinnam zata hachi amkam khobor asona. Bebo amchea nisorgant mhotvacho, hem ami visrunk favona. Zaitea ganvantlea tornatteank bebeank dhorpachi humed yeta. Paus poddtolo ani amchea jivak thonddai melltoli mhonn chintun kitloch lok pausachi vatt polleta zalear kaim zann bebeank dhorpak hatant bettri dive ani kapotti ghalun toyar asat. Tanchi as bhagounk te pavsant bizun legit bebeank dhorunk fattim soronant. Gõyant hotelamni bebeanchea masak borich dor asa. Ami taka uddttem tolog (jumping chicken) mhonntanv. Zaitea Gõykarank tanchea jevnnant bebeanchem mas zaich. Hotelamni bebeanchea masacho prat 80 tem 150 rupiya. Gõykar he nokre khatir pordesant vo bottir astat. Hea lokak bebeanchea masachi chodd ruch. Tankam bhailea ganvamni Gõychem jevonn mellona. Jednam te 2 vo 3 mhoineank suttyent ghora yetat. Tednam bebo, ran-dukor ani her ranvotti zonvaranchea masak odik magnni asta. Tanche dhoni legun hea babtint borench xittuk. Jem giraik tankam sodanch yeta tankam dhoni bebeanche mas ditat. Jevnnachea menu-nt bebeanchea masacho aspav asona mhonntoch novea giraykank masacho suad gheupacho bhag chukta. Bebeank dhorop tanchem mas vanttop ani khavop legit bekaidexir. Hem zannam astana poryan kitlech lok sogllea addkollink fuddo korun bebeank dhorunk fuddem. Zor konnui oxem kortana sampoddlo zalear taka 25 hozar dondd ani 3 vorsam khatir bondkhond asa.
Amphibians zatincho sambhall korunk thoddo bhov khorch korchi goroz asa. Hea kamak vigneanik, vokil, zannar ani nisorgant lagu zatolea rajki fuddareank ani dhonddekarank motam diun nivddun haddpi lokachea sohokarachi goroz asa. 1985 vorsa Bharot sorkaran Wildlife (Protection) Act 1972 khal bebeank dhorop, tancho jiv kaddop ani dusreank divop hea ghoddnukecher bondi haddloli. Punn aiz meren kitlech tornatte ratchea vellar apleak nanv zhoddunk bebeank dhorunk vetana nodrek yetat. Bebo amchea poryavoronnant mhotvacho. To piddecher tabo dovrunk vavurta. Eka vellar tancho jiv kaddpi mon'xank te salvar korunk adar ditat. Fokot bebo dhorpacher bondi ghalearuch puro nhoi. Pulis ani Ran Khateache odhikari kitlo bhroxtt asa tem ami zannonv. Hea dhonddeant tancho kitlo adar asa tachi Devakuch khobor. Aiz meren hea dhonddeant misoll aslolea bhov thoddeank dhorunk yes mell'lam.
Sorkaran favo toslea odhikareanche ek khas pongodd toyar korunk goroz asa oxem mhaka dista. Ani oxem zaina zalear bebeanchem mas viktoleank sompeponn melltolem. Odhikareank lonch dilear tankam dondd poddcho na vo bondkhonn favo zaunchi na, koslich karvay tancher zaitxi na. Hem bebo dhorpacho bekaideaxir vavr cholta hache vixim odhikareank mahiti diunk hok'k asa. Punn itleanuch zaunchem na. Karann odhikari te suvater pavta mhonnlear bebeank dhorpi pollun vetole. Hea kamant aslolea mon'xank kitem ghoddchem asa tacho thav dina astana pulisamni thoim pavunk gorjechem. Ho khell khellunk aiche pillgechem dhei asat. Konnakuch kaidea pormannem cholunk naka. Bebeank dhorle zalear kitem porinnam zata hache vixim kolejimni ani iskolamni mahiti diunk sorkaran poryavoronn zannarak dhaddle zalear odik faideachem zatolem. Bebeank kobar korunk ami nisorgak ani amkam luskonn haddtat te vixim ganvchea lokak zagrut korunk xibir korunk zai. Thodde odhikari khorench bebo dhortoleank dhorunk proytn kortat. Ami zonn eklean ekttaim zaun hea vavrak sohokar diuncho.
http://www.v-ixtt.com/client/details.asp?id=4588&cid=6
