Ranantlim Zonvaram Ganvant Koxim Pavlim? http://groups.yahoo.com/group/gulf-goans/message/34793 Poircha Budhvarak, disaleancher chappun ail’li bhatmi vachli. Don bhirakull ranvoti hoti, Mysore-cha xarantlea Bamboo Bazarant bhitor sorun, thoincha vattharant ravpi ponchavon (55) vorsancha mon’xak pamyam thalla mandd’ddoun akttak jivo marlo. Urleli tiddkechi thodd-fodd-modd korun bhouch akant ani kampero lokacher haddlo. Him zonglantli monzat xarant pavpachem kharan mhonllear, atam ganvan ravpi mon’xamni ranantlea monzatichea zagear rig ghetlea. Dekhun ranvoti monzat tiddkelea. Halincha vorsamni Gõyant osle kauz zaleat ani zatat. Amcha Gõyantlea zonglantli vo ranantli monzat ganvant yevn, lokacher attak korun kuddik dukhavoll ditat. Bichole ganvant eka bibttean (leopard) dogam mon’xacher guri ghatleli. Voizacho ilaz tankam dinvcho poddlo. Bibtte, gorvancha gottean yevn tras kortat mhunn zaite pavtti ami, paperar vachlam. Poiginium, Kanakon taluken, makodd ani dusrim ranvotti zonvoram xet-mollar bhitor sorun pikavollicho nas kortat. Eka vorsa 80 lakhachem luksan kel’lem asa. Halinchea khallar, makodd; mon’xancherui akromon kortat. Verna Electronic City bandun zatoch, thoinsorle makodd Verna-Consua ani lagsorlea ganvamni maddancher ani yer dusrea zhaddancher sust boslele dollebor distat. Ganvan bhonvtat. Adim zonglantli monzat ganvan pavlear ganvti sunnim tankam dhanvdavun galtalim. Punn atam toxem nam. Sunnim ani makodd ixtt-mitram zaleant. Tumi-i zonvoram ani ami-i zonvoram. Zogddim nakat xantin jiyeya.
Zonvarank ravpachea zageavelim zhaddam khatortoch, tankam khanancho unnav poddta ani ranvoti dhukor pikavolllicha disamni pik khavunk ani borobor pik padd kortat ti, amkam Fonddem-Keri ganvantlea ghoddnechi yad korta. Tor hi ranvoti monzat ganvan kiteak yeta? Gõyant zonvaranche zage, ran-dongor khatrun vhodd prokolp ani imaroti ubeo keleat. Ganvantlo moniszat dongor choddta ani ranantli monzat ganvan denvun yeta. Lutt marpi ani Gõy chorun khobar korpi Rajkarnni Gõychi soimbik svato ani zhaddamni bhorlele zage, udorgotticha nanvan pokrun padd keleat ani kortat. Susegad jiyetelea monzatik pisandur kelea. Adim ganvan disti poddonaslolim zonvoram halinchea khallar chodduch disunk laglea. Hem oxench chol’lem zalear, mhonnchem; monzatik ravpacha zageavelim zhaddam-rukh khatrit ravlear, falleam ranantli monzatichi pontton ganvan aili tor, tedna kitem zatolem tem chintpak, konnui tori ek boro fuddari Gõyant asa kai? Porvorim ganvant challis mon(is)zaticho ek prannisongralay (zoo) asa. Gõychi udorgott ani boreponn korcha khatir veg-veg rupachi ani karnnanchi ek-ek mon(is)zat dor ek motdarsongantlea lokan pattoun dilea. Segid panch vorsam hea mon(is)zatik Gõychi porza funkot posta. Somzun, irlem tori ginean yevn favo tea porim vagtoli kai mhunn. Punn dhukrancha golleant mottiam konnem mhonntleant? Kitloy dhuilo zalear dhukor chiklan lollpacho nam mhonn asta? Papianno!!! Hea pavtti tori ginean asloli, dusre bhaxen xiklole monis Porvoriche ‘Vidhan Sobhen’ daddpacho yont korumya. Corruption free Goa Vidhan Sobha 2012 oxem korunk dor ek Gõychea nagrikacho kaido asa---Na tor, vagache dollin fuddlim panch vorsam choddvoddeamni sarumya. Lino B. Dourado
