Khailench Mhunn Zaina, Jirvonn Bori Zavnk Zai. http://groups.yahoo.com/group/gulf-goans/message/35091 Mon’xachi arogea bori urteli zalear, poilea svater jevonn-khann pustik (nutritious) zaunk zai. Jirvonnenk, pochatap korta toslem jevonn-khann khavunk, khoinchoch monis toyar nam. Vellabhair khailelim khanna vo pottak naka astona, aiz mellta tem falleam mellchena mhunn khailear, khorench tem jirvonnenk tras khortolem, hatunt dubhavuch nam. Chalte nodrelean ami pollelear, atancho monis duddvancha fattlean dhanvta. Sogllea vonn bholayki ek vhodd girestkai zaun asa mhunn, duddvanche fattlean danvtolo monis sapuch visorta. Fast food khanna vell samballta; vo, duddu korunk odik sovlloti dita mhunn, tim khanna khavun zata titlo duddu ektavpache sortin (competition) bhitor sorun, khaxa; apleach bholaykechi vatt lavun ghetat. Kuddiche sandeank favo tea-tea vellar pustik khanna bhitor sorum naslolean, kaim zann gonbhir duensank boli poddleat. Purvonzachi xit-koddi ani nusteachea sadea jevnnan, jem pustik (nutrition) melltalem tem atanchea Kentucky Fried Chicken, Burger King, Mc Donald, Italian Pizzeria ani her Chinni (Chinese) jevnnamni mellonant. Amche purvoz, bholaykeche soglle nem pallun, borem ani tajem tench khatalet. Atanche jivit fast track-acher choltolean, fast-food khanna khavun veg-vegllea duensank ami yevkar ditat. Ani-ek torechi mon’xak jirvonn zaina. Ani ti mhonllear, kuskeaponnachi vo nosaiyechi jirvonn. Lhan jivit jiyetelea mon’xancher avchit boreaponnachi savlli poddlear, nosayen rokddech tankam khoxttanchea ujean vortat. Voir sorteleancher niddukayechem cheppon dovorun, fuddem veteli vatt khanteanchi kortat. Xikxonant, songitan, sport-an, chirt-kola, tiatr-kola ani her sabar vavran porzolltat tednam; thodde zann, dusvasi (jealousy) nodren addkolinchim durgam bandun bhitorlea bhitor fugar kortat. Zaitea zannank jevonn jevtana dusmanachea ghorabeantli bori khobor aikunk mell’li tor, soroll nattkayechi ttikxan jibek lagon xinkeo, uchkio (hiccup) ani usturem vo unkuteo suru zatat. Usturem vo unkuteo mhollear, khata vo piyetana okosmat khonkli borobor xinkeo yevn nakantlean vospi svas thoddo kinn bond poddta. Tea vellar ami mhonntat, konnem tori motto ugddas kela. Usturem ail’lea mon’xachi, patt thaptitat ani piepak udok diun somadan kortat. Konnem tori ugddas kela mhunnon, ‘usturem’ veta tem sarkem nhoi. Oxem mhaka dista. Punn zaito lok ajunui-i sotmandtat. Oxem astana, ek khori goxtt tumche nodrek haddunk, mhaka-i usterem ail’lea vori zata. Tea vorsak, Lapitt ani tache sangtti ixtt piknikek ghel’le. Donparchem jevonn zatoch ambe, apoll ani kellim ani her follam aslim. Lapittak tor kellim khavpachi avodd. Tannem ek kellem hatant ghetlem. Eksarkelo hat kellear bhonvdaylo. Kellem solltana kelleak dukh zanvchi nhi mhunn bhouch kalzi ghevn kellem soll’lem. Don-tin pavtti, apnnali jib soll’lelea kellear gonstun, ghans mat marlolo. Kelleacho kuddko tacha talleak xirkololea vori zalo ani tambosnastana khonkli ani xinkeo aileo. Konn eklean tachi patt thapitt mhonntlem: Konnem tori borea mon’xan ugddas kela. “Kitem re Lapitt? Konnank tori kellem khavoyloleachi yad zali?”, dusrean reng-teng vazoylem “Oi, oi!!! Kal tim dogaim……” “Shut-up you idiots”, tisreak fuddem ulovpacho bond korpak, Lapitt tapsanin mhontlem. Piknik sompun ghora portotana, xezarchem Perpetina vatteruch Lapittak dhoddlem. “Hey, rav re, rav re” Perpetinan, Lapittak thambunk sanglea borobor soglleamni saikolicho break marlo. “Kitem zalem? Heddo vhodd boball korun mhaka kiteak thamboila?”, Lapittan vicharlem. “Kal tunvem mhaka banana dilolem nhi re? tachi mhaka bori jirvonn zali nam”, Pottar hat oddit tannem mhontlem Perpitinachim utram aikun, ekach jotkean Lapittache sangatti ixtt, tachea islean pollevnk lagle. Ani boroboruch saikolinchim pedalam marit te futt-futttit ghele. “Aago, tuka sarkem mhonnpak yena zalear ulovchem nhoi. Kal tum mhaka Moddganv mell’lolem tednam, hanvem tuka ‘Penguin’ khannavolin vorun banana shake with ice-cream, khavunk-pievnk dil’li” “Oi! Sarkem tujem. Hanvem tench sanglam. Tem mhojea pottak mal poddlam mhunn ugddas kortam tuka” “Tunvem banana mhontlem ani tum zannam, mhoje ixtt kitem somzoleat te?” “Banana shake pieleam tim hanv. Jirvonn zalina ti mhaka. Tuje ixtt kitem somzoleat, nam somzoleat tanchem mhaka kiteak poddlam?” Lino B. Dourado
