SON'VARACHIM SUNGTTAM Ixttagotichem Porkeponn! Te sanjer, nhavun-dhuvun ‘Son’varachim Sungttam’ toyar korunk boslolom. Don volli boroun somponkuch nant. Kompiutorachea mullantuch aslolo fon vazlo. Monant mhonnlem, “ho anik konn, onvollkhi numbor-so?” “Nomoskar…!” Fon korpiak hanvem zap dili.
‘Ixtta! Koso asa?” Fonache poltoddchean avaz ailo. “Konn uloyta?” Hanvem koplak mirio ghalit vicharlem. “Avois! Vollkhonaslolea porim korta mure tum!” Tannem talleacho avaz bodlun mhonnlem. “Hoi! Konnem-i mhaka ixtt mhonnlo zalear, tokli mhoji chodduch pikar zata. Ani te birkent, mhaka ‘ixtta’ mhonnpi monis-ui mhoje vollkhi bhailo zata.” Mhojea dusrea hatant kompiutoracho mouse aslolo khelloyt hanvem taka zabab dilo. “Are, matxe ogich rav. Hanv XXX uloytam…” Solla vorsam fattim zaka hanv ixtt mandtalom, tacho tera vorsamni mhaka fon ailolo. “Sang, kitem zalem?” Hanvem thonddsannin vicharlem. “Itlea vorsamni tuzo ixtt tuka fon korta, ani hanv tuka porki zalolea porim tum mhaka ‘sang, kitem zalem’ itlench vicharta?” Mhoje koddchean taka kosli opekxa asloli tem mhaka somzunk vell lagunk na. “ Tea xivay anik kitem mhonnchem ani vicharchem aslem hanvem? Tuka kainch divop na, ani tuje koddchean kaim ghevop-ui na. Fattlim kitlimxinch vorsam tum mhoje porkianchech vollericher asa.” Koslich bhavna ballginastana hanvem soroll sanglem. “Mhoje sarkea jiva-bhavachea ixttak-ui tunvem porkianche vollerint vhorun bosoylo? Oso kednachean vichitr zalo tum?” Tannem mhojea talleant hat ghalo. “Pondra vorsam fattim, hanvem zanna zaun ek ghuttachi chuk keloli. Te chukichi mhaka khast bhogchi poddta mhunn mhaka khub tenxen zalolem. Oxea vellar, hanvem mhojem mon konnak tori ugtem korun matso kallzan lhou zaunk zai mhunn, loz-bhidd soddun ixttachea natean, tuka porxim bhettun ti khobor sangli. Punn tunvem tea vellar mhaka guneanvache khille marun, mhojea kallza-monacher anik-ui tannacho fator dovorlo. Ixttagotiche hatrecher tunvem mhojeo bhavnam, khor utranchea pondak mostileo. Tednachean, ixtt mhonnlolea utravelo ani orthavelo-i mhozo visvas uddlo.” Pondra vorsam fattlea ugddasachi pottli ugti korun hanvem taka thoddeach utramni sanglem. “Ugddas dhor, tujea tonddak chikol asa mhunn tuka sangta toch tuzo khoro ixtt asta.” Tannem apnnak poristhitentlean soddoun ghevpachi khottpott keli. “Punn tea disache poristhitent, mhaka chikol lagunk na thoim legit tunvem mhojer chikol xevttilolo.” “Mhonnche tuka azun-ui mhozo rag asa tor?” To apleponnan-so uloylo. “Rag kiteak? Zache kodde mhaka som’bonduch na, tacho mhaka kiteak rag yevcho?” Tachea proxnak hanvem proxnanuch zap dili. “Amche modem ixttagotichem natem aslem tem tuttlem tor?” Tannem utsuktayen vicharlem. “ Na… na… toxem tem apo-ap tuttunk na… hanvench zaun tuttoylem tem…anik upay naslo dekun… ani tednachean, khore ixtt astat tech tuka aplea buzancher roddunk ditat, khore ixtt tuka khuinche-i poristhitent somzun va mandun ghetat oxe torechim jim ixttagotichim sangnnim asat tim sarkim nhoi mhunn, monant ghor korun boslam.” Hanvem mhojea monachea pustokantlo ‘Ixtt’ vixoy kochreachea dobeant ghalolo to challun-sodun tachea mukhar manddlo. “Na… na.. ixttagotichea ortha vixim tujea monant kitem tori chuklam….” Tannem mhojem mon bodolpacho proyotn kelo. “ Mhojea monant to orth chukonk na, sobdkoxant (dictionary) chukla… khorem mhonnlear, sobdkoxantlean ‘ixttagot’ utra soit tacho orthuch kaddun uddovpachi goroz asa oxea motacher hanv pavlam.” Mhojea monachea pustokachem hanvem anik ek pan ugtem kelem. “Mhonnche, tuka jivitant apnnak ek tori ixtt asunk zai oxem disona?” Tannem khuinche nodren vicharlem tacho mhaka hoi-nhoi-so sumar mell’lo. “Distalem mhunn tum aslo… punn tuje tankichea mon’xachean-ui mhaka khorea ixttacho orth provar korunk zaunk na nhoi? Zalear, jea utrak orth dila to orth somazantlo konnuch monis vevharant jivo-jito korunk xokona, zalear te gozalik kiteak mhotv diunk zai?” “Mhonnche, tujea jivitant tuzo khas mhonnlolo konnuch ixtt na tor atam?” Mhojea vicharanchi vevharik khatri korunk tannem mhaka vicharlem. “Na titlo boro asam… fuddem vochun….” Oxem kitem taka sangunk vetalom… punn titlean fonache battrichea pottak samkich bhuk lagli. Dekun, tache kodde fuddem ulounk itlo vell sangat dilolea fonan, atam mhonnosor aplo sangtauch kaddun uddoylo. JOSE SALVADOR FERNANDES
