Atam Duddu Uloita Kaido Nhoi Chalu mhoynant Gõycha lokachim tonddam bond korunk, Kongres sorkaran teg pulis odhikareank suspend keleat. Verna Pulis thannavele PI Jivba Dalvi ani PSI Shushant Gavas-acher tatpurti kamancher bondi ghatlea. Hachem kharann, Utordd’dea ganvan voir sortolea nove hotel-acha supervisor mhunn kam’ polletolo, Arxe (Arrosim) ganvantlo, Melwyn Gomes-ak jivoch marun udkant uddoylolo. Ani to ek khunn astana, ek soimbik mornn (natural death) mhunn Verna pulis thannar kex nond kel’li. Ani tisro, Kunkollea Pulis Thannavele PSI Prasanna Bhagat-ak bekaidexir duddu ghetlole mhunn, chovkoxi zaisor, tacho pulis odhikar kaddun ghetla. Fatlea sumanan Cabo da Rama piknikek ghel’le 11 kolejicha bhurgeam modle dog zonn budd’dun somplele. Hi kex PSI Bhagat poletalo. Ek lakh rupia, dor ek famil 25 hozar hixobar dina zalear, bhurgeancher khunnacho arop ghalun jailint bond kortolo mhunn tannem bhurgeancha avoy-bapaik kodok xitkavnni dil’li. Hea vixim hanv ani mhagelea ixtt Albino fonavelean chorcha kortana……. “PSI Prasanna Bhagat-an duddu ghetle mhunn vhoddlexem dislem nam mhaka. Atam fokot duddu raj choloyta”, mhagelea ixtt Albinan mhontlem “Mhonnchem? Dhomki divn innosent bhurgeancha avoy-bapay koddlean duddu mhagchem sarkem asa mhunn, sangonk sodta tum?”, hanvem vicharlem. “Oi” “Kiteak?” “Pulisank broxtt (corrupt) korpak, lokamni nivddun kaddlole nadd-budinche politisan (politicians) zavn asat. Je zagear bori duddvanchi yenavoll bhitor sorta ani sompeaponni duddu zhoddun zata toslea svatancher, pulisanchi boldi vo transfer korunk Gõyche hollxig politisan lakaninch duddu ghetat. Politisinacha hodd’dear ghatlolo poiso vosul korunk, babdde pulisank nakantlean xinko kaddit dusro marg apnanvcho poddta.” “Polle Albin. Tum sangta tem sarkem asot. Punn khunnacho arop ghalun bhurgeank bondkonint bondd kortolo mhunn, PSI Bhagat chogam avoy-bapaynk dhomki divn ek-eklea koddlean 25 hozar mhagtta tem mat sarkem nhoi” “Zhoim mov mellta thoim khonnpak pulis kochech aikonant. Transfer mellpak zo duddu ibaddla to kosoi korun bhorun kaddpak pulisank konnanchech churchure disonant. Thoddea pulisamni loz ani promanninkponn ghorakodde randche kuddin (kitchen) khilleak lamboylolem asa. Zori tor Gõycho lok boro zalolo zalear, amkam bore ani xiklole rajkarnni mellpache. Promannink pulis mellpache. Hem nam mellunk, amcho lok, poilo broxtt (corrupt)” “Oxem kiteak mhonnta tum?” “Promannink sorkar asunk promannink motdaranchi goroz asta. Eleisanvam vellar motdarank jevonn-khann-piyepak ani hatar ek-ek hozar otoilolo duddu politisan koso vosul kortolo? Dekun hanv mhonntam, amcho lok vo motdar poilo broxtt zavn asa. Nivddun kaddlolo politisan, jevnam-khanna ani piepam dil’lea motdaranchim kama , funkott kortolo? Albot nam. Tannim ottoylolo poiso vosul zavnk zai. Ani koso? Sorkari nokri mellpak duddu uloita. Rosteache kontrad mellpak duddu uloita. Vorixtt imarotichim be-kaidean lisensam mellpak duddu uloita. Lonch ghetlea xivay koslench ek kam’ fuddem dukollna. Hem zanna mu tum?” Albinan tondd foddun mhaka sanglem. Mhagelea ixttacha ulovpan zaitench sot aslem. Khorench amcho lok broxtt zavn asa. Tea khatir amkam bore rajkarnni mellonant ani mellchenant. Dusrea vatten konnui to zaum. Voilo ani boro sorkari zago mellunk, broxtt politisananchim bolsam lakh duddvamni bhorchim poddtat. Uprant kaideabhair vochun rixvot (bribe) ghevn duddu kosai-i toren zomoytat. Khunn zal’lo to porian duddvanche axek lagon, soimbik mornn (natural death) mhunn sangpak pulis fattim soronant. Zopt kelelim vikallim vogddam (drugs) pulisancha hatantlean porot bhair bazarant pavtat. Duddvancho pez hatar ghatlo tor, bondkonnituch guneanvkarancher mornnanchem dovem chaddor udoytat. Aicho pulis, dhovem aslolem kallem ani kallem aslolem dhovem korpak borech fuddem pavleat. Kiteak? Kaide korpi rajkarnni, kaide samballinant zalear, kaido pollevpak dovorlole pulis, kaideachi nit koxe kortele? Duddvamni, kaideak konxeak xevttila. Oxem zale nam? Lino B. Dourado
