Cheddvank 'Dhan Laxmi' korunk sorkaracho proytn
Ponnje: Fuddarak Gõyant zolmol'lem cheddum bhurgem duddvanchem dhoni
zatolem mhonn khuxechi khobor mukhel montri Digambar Kamatachea lagxilea
sutram koddlean gomun ailam. 6 vorsam pirayechea cheddum bhurgeanchem
promann Gõyant borench denvlam, taka lagun cheddum bhurgeacho jiv ani
fuddar surokxit korche khatir fattlea Gõychea odmaspotrant hi yevzonn
mukhel montrean ankloli. Tea vixim sod'deak plan toyar zala toxench he
yevzonnek 'Dhan Laxmi' hem nanv dilam. Bailam ani Bhurgim Vikas Khatean
ho arkaddo toyar kela, to sorkarak dhaddla, oxem hea sutramni sanglam.
Hi yevzonn vevharant yetoch, ticho labh somest Gõykarank melltolo.
Fattlea Abrilache 1ler ani tachea uprant zolmol'lea cheddum bhurgeak hi
yevzonn lagu zateli. Hea vorsachea odmaspotrant Xri Digamabr Kamat-an hi
yevzonn manddloli ti mhotvachi, ani ticho labh khud mukhel montreachea
hatantlean ditole mhonn gomun ailam.
Hi yevzonn yesesvi toren toyar korpak Bailam ani Bhurgim Vikas Khatean
bhorpur thokos ghetla ani ti 100% vevharant haddpak sorkar vavurtolo
mhonn hea protinidhik khobor mell'lea.: Montrimondollache yete boskent
hi yevzonn ekmotan pas zait zalear, Agost 15ver thavn ticho labh divpak
survat kortole. Hea viximchi soglli toyari purai zalea oxi khatrechi
khobor V. Ixttak mell'lea. 'Dhan Laxmi' yevzonne khal ek cheddum
bhurgem zolmotoch tachea nanvar nogod 25 hozar rupiya sorkar 'Fixed
deposit' kortolo. He duddu benkint 'Fixed deposit ' aslolean, tem-tem
cheddum 18 vorsam pirayechem zatanch tea duddvancher tacho odhikar
zatolo. Khas korun tea cheddvak fuddlem xikop korpachi khuxi aslear,
taka hea duddvantle 1,50 lakh rupiya melltole. Zancho rabito Gõyant 15
vorsam odik asa tankanch he yevzonnecho labh melltolo. Labh mellpi vo
ghevpi cheddum bhurgem 10vi meren xikop korunk zai mhonn ek kondisanv
he yevzonnent ghalam.
He yevzonne vixim protikrya zannam zavnk hea protinidhin kaim
zannkaranchi bhett gheun bhasabhas keli tednam, Murmuganvcho namnecho
somaz sevok Vijayanand Kerkar-an sanglem, "Zorui Gõycho sorkar cheddvam
khatir osle torechi yevzonn vevharant haddta zalear sorkarak vhodd
xabaski. Cheddum zolmunk mhonnlear ek vojem, oso khotto goir-somoz khup
zannanchea monant riglolo asa. Gõyantuch nhoi, punn purai desant
cheddvanchea zolmancho ankddo boroch denvla. Sorkarache he yevzonne
udexim eka cheddum bhurgeak aplem jivit surokxit korpak khup adar zatolo
mhonnta.
Potrkar Clerencio Furtado sangta tea pormannem, "ghorcheanchea dobhavak
lagun, xikop naslolinch nhoi, punn unchlea ani xikop aslolim poryan
gorbest aslolim aple kusveant aslolea ballkachem ling topastat, ani tem
cheddum mhunn gomlear tacho abort vo gorbhpat kortat. Kaidean ho ek
khun, torui lipchoryam hem sogllem cholta. Thodde bhov dotor poryan
duddvanche axek lagun oslem bemoriadik kortub adhartat. Sorkarache
yevzonnek lagun, cheddum bhurgeak nattak korche adim, ghorcheank khoim
na khoim chintchem poddtolem, karonn cheddum mhonnlear jim konn ek vojem
mhonn somzotat, tem vojem lhov korunk sorkar fuddem sorla. Mukhel Montri
Digambar Kamatak soglleamni porbim divnk zai. Punn teach borobor hi
yevzonn nitt margan cholta kai na hacherui lagu zatoleamni apli koddok
nodor dovorpachi goroz asa, oxem tea potrkar Xri Furtadon sanglem.
http://www.v-ixtt.com/client/details.asp?id=4880&cid=3
