Gõychem havoman khatem Mumboichea khateacher tharlam
Ponnje: China desant toyar kelolem 'Dopler Radar' hem adhunik torechem havomanacho odmas kaddpi mixin Bharotant khoincheach kinarechea bhagamni (coastal zones) bosovpak Kendr Sorkaran bondi ghal'lean, Gõychea havoman khatea mukhar mottoch proxn uprasla. Haka lagun Gõychea havoman khateak Mumboi Colaba aslolea havoman khateacher tharun ravchem poddta.
"Chinacho 'Dopler Radar' Altinho havoman khateant bosovpachem sogllem kam' purai zalolem, punn xevtta vellar Kendr sorkaran tem bond kelem ani Gõy rajyak proxn upraslo. Havomana sarkea hea mhotvachea khateak pordexi yontronnacher tharun ravop surokxeche nodrentlean marekar zanv yeta, mhonn Kendr sorkarachem mot asa", oxem Xri Singh-an spoxttikoronn kelem.
Hem 'Dopler Radar' bosovpacher bondi ghalolean, Kendr sorkarak ek krutt odik rupiyanchem luskonn zatolem. Atam Bharat Electricals hannim toyar kelolem dexi 'radar' mixin bosoityole. Khoinche komponin toyar kelolem Radar mixin bosoitelet tacher azunui nirnnoy ghevpacho asa, torui Bharotanuch toyar kelolem astolem, oxem Gõychea havoman khateacho sonchalok Xri Singh-an hea protinidhik sanglam
Gõychea havoman khateacho sonchalok K.V. Singh he vixim sangta tea pormannem Gõyam khatir haddlolem hem khas 'Dopler Radar' mixin atam desantlea khoinchea tori bhitorlea bhagan bosoitole. Gõyant khud Bharot desant toyar kelolem oslech torechem dusrem mixin bosovpacho nirnnoy Kendr Sorkaran ghetla mhonn Xri Singh-an sanglam.
Mumboi Coloba havoman khateant aslolea 'Dopler' Radar' mixinam udexim Gõycheai havomanacho odmas kaddunk zata. Gõychea havomanachi mahiti divpa viximchi odhunik yontram thoim bosoileant, taka lagun Gõychea havomanachi mahiti Gõychea havoman khateak mellta mhonn Xri Singh sangta. Chokri-vadoll (cyclone) zavpacheo khunnam asta tednam oslem mixin gorjechem
Somdirant cholpi bottink, nustem marpi bondrank toxench vimanankui hem khatem dispottim havomanachi mahiti dita. Relve toxench sorkari ani khasgi xikxonnik kendram havomanacher atthapun astat, tankam poryan heach khatea koddlean mahiti mellta ani hacho labh tinui rajyant favo zata oxem Xri Singh sangta. Hangasor 'Research Ports Forecasting', 'space' adi, sarke vibhag asat. Purai desantlea havomanachi mahiti ghevpi havomanacho odmas kaddtat ani desantlea sogllea rajyank goroz teo suchovnneo ditat.
Hea protinidhin odik mahiti ghetlolea pormannem Bharotant sat havoman khatim asat, tantuntlem Mumboichem Colaba aslolem Maharaxttr, Gujarat ani Gõy hea tin rajyanche seve khatir 1984 vorsa thoim bosoilam. Arabi somdirant jednam chokri-vadoll (cyclone) zavpacheo kurvô (signs) distat, tednam hem khatem tache vixim heram khateank mahiti dita.
http://www.v-ixtt.com/client/list.asp?id=6
