Goychea adhunik itihasachi kotha
Borea ani vaitt karonna khatir fanki zaunk Goychea adhunik itihasachi
kotha. Ami Goyant kitem polletanv ani vachtanv hi heach adhunik itihasak
govay dita. Goychi novi vollokh 'casino destination' aikun Goykar khuxal
zaunk sodinant. He casino choloitana konn ani koxe porim tanchi sudd
gheta tacher proxn vaddot asat. Ontor'raxttrik kaide pallun he casino
choltat vo na tacher azun vhodd chorcha zal'li distti poddona.
Amchea bhitor thoddea zannanchem casino-cher bondi haddpachem mon asa.
Punn tem sorkarak zai zalear poryan titlem sompem nhoi-xem distta. Amcho
fuddar svarthi mon'xachea nirnnoyamni xirkol'lo asa. Casino
chota-choltam Goychi osmitay cholun Goy soddun pois veta.
Goyant onek torecho kherit proxn asa to mhunnlear plastik odik korun
plastikacheo pottiyo. Veta thoim disti poddtat. Khoim goroz na thoim
chodd disti poddunk lagleat. Tumi mhonntoleat rostea deger vo dorya
deger, xetant toxench amchea porsant, plastikachi potti. Kor tujean zata
tem, plastikachi potti zoitivont zal'lea porim dista. Sorkar plastik
pottiyancher bondi haddta ani atam Ponnje haddpacho asa. Punn plastikuch
sorkaracher zoit vhorta. Porot plastik amkam dista.
Plastik toxench 'garbage' Goyant unnem zaunk nagrikanchi axa. Punn kaide
fokot kaidech urtat. Amchi zonn ekleachi zobabdari oxi zababdarich urchi
nhoi.
Itlean sompunk na. Ho fokot bhaileanuch dista toslo itihas. Ami amchea
bhitor nodor marlear monis politicianacho gulam' zal'lo dista. Poixe
melltat mhunn to kitem-i vikunk toyar zata. Dhondo ek vhodd totv zalam.
Koso dhondo korcho ani kitem tacho faido tem polleunchem lokx unnem zait
veta. Osle poristhitint ek vost thavi zata. Amche bhitorli axa amkam
duddvanchim ani vostunchim gulamam korunk sodta.
Adleanchi mhonn'nni asa: 'axek gel'lo doxek pavlo' puri zata koxi amkam
disona. Boltench zata; axek gel'lo to yexvont zait veta. Doxek pavta ti
kalloki rat tankam azun pois asa.
Duddvanche axek lagun zomin vikop, nhoi fokot apleoch punn mellot
titlei, Igorjecheo poryan vikunk toyar. Aplench chintun-chintun monis
aplea bhonvtonichea bhavam-bhoinnincheô gorzo polleunk kudd'do zala.
Poilem ami to kudd'deponn korta mhunntaleanv ki dusreank polleunchi tori
poddta, taka lagun atam kudd'deponnam korunk anik vell na.
Amchea dhormant opurpayechem kherit magnnem asa, 'Amcho dispotto giraz
amkam di' hem zaitea zannamni bodlun 'Mhozo dispotto mhaka di' oslem
amchem jivit zalam. Goychea adhunik itihasant 'amcheo gorzo’ sompleo ani
fokot atam 'mhojeo’ utpon'n zaleat.
http://www.v-ixtt.com/client/ogrlekh.asp
