Kristanv Svotontrtayeche Chollvollint
Kristanv des-virodhi vo ‘anti national’. Tannim Britishank toxench
Portugezank tenko dilo. Hea aropachi savlli azun-ui asa. Kristanvacher
arop ghalunk sompem zata kiteak, boroylolea itihasant Kristanvanchim
nanvam chodd mellonant. Punn Bharotache svotontrayent toxench Goyche
suttke chollvollechea vavrant Kristanv padrincho zaito vaur asa. Hem sot
lipounk titlem sompem nhoi. Hache velem amchem lokx kaddlem zalear, ho
itihasacho bhag nopoit zaina.
Sorkari ani Igorjechea odhikareamni toxench dusrea sonvsthamni sod vaur
korpacho kall ho. Hea vixoyacher zobor chodd lokx ghal'lem disona.
Kristanv suttke zhuzareanchem pustok kedna yetolem? Hea proxnak azun mol
asa.
Suttke Zhuzari Gurunath Kelekaran Goychea sorkara lagim ek kherit pustok
Kristanv suttke zhuzareanchem korchem mhunn Setembrachea 30 ver 2008
vorsa Dr. Francisco Luis Gomes hea mhan mon'xachea 139vo mornnacho
ugddas kortana magnni kel'li.
Goycho Mukhel Montri thoim hajir aslo tannem, hea magnnek apunn pallo
ditolo mhunn bhasail'lem. Goychea sorkaran Kristanv suttke zhuzareancho,
je Goychea suttke pasot Portugezam add zhuzleat tanchem kherit pustok
kaddunk zai. Hem pustok Goy bhar aslolea sogllea lokak dhaddun Kristanv
Goyche suttke pasot vavurleat mhunn zagrut korunk goroz asa oxem
Kelekaran tea disa sanglem.
Hea pustokachi khobor amkam azun aikunk yena. Vorsan voros ami nove nove
suttke zhuzareanchim nanvam aikotanv. Punn tanchea jivitachi khobor
zobor porgottloli disti poddona. Ho vichar ami Goychea suttke disachea
nimtan, Vauraddeancho Ixtt hea amchea satollear porgot kel'lo.
Thoddeo boreo vostu, hea advertisement kortolea kallant, portun portun
amchea dolleam mukhar dovorcheo poddtat. Arop ghalunk sompem, punn sod
vaur korunk, purn ponnim itihas somzunk kotthin. Hench adhunik kallachem
avhan.
Hacher amchem igorjechea odhikareanchem ani sonvsthanchem lokx aslem
zalear suttkechea itihasachi mahiti purn zatoli asli. Ho vhodd proxn
Kristanv suttke zhuzant asle vo nasle tacho tor zobab jerul melltolo.
Punn odik korun zo arop Kristanv des-virodhi (anti national) ghaltat to
itihas Goyant ugto zatolo aslo. Arop ghaltole khoim chuktat tem odik
disti poddunk lagtolem.
Zaite Kristanv lok toxech padri je suttke zhuzachi zagrutay vaddounk
vavurle tem Bharotache khas nagrik asle. Suttkecho dis polleunk te
sorkara add toxech tea kallavellar igorjechea odhikara add
kalljildarponnan ube ravle.
Onit kortolencher add zhuzunk zo dhorm tuka gulam' korta tantum
monisponnachim toxech devik totvam nant. Zo monis sorkarache onit add
zhuzta ani tancho dhorm taka Bharota add zhuzunk prenna ani nett haddta
toch mhan. Oslea mon'xank, zaum te khoinchea-i dhormache, tankam amcho
salam’.
http://www.v-ixtt.com/client/ogrlekh.asp
