Nachonk Nokllo Angonn Vankddem http://groups.yahoo.com/group/gulf-goans/message/35498 Amchea purvozanim zannvayen uloilolea utrancher aiz meren ami dosun asat. Tancheo, xanneponnan bhorleleo opari aiz meren pixeavori portean-portean ami upeog kortat. Tannim dovorlolem vhodd girest orthabhorit oparinchem daiz, choltam-bhonvta amchea sadheaponnacha jivitan vapor kortana, ek onek toren gineananchem daiz amche fuddle pillgek jivi urpa sarkem kortat. Amgele azo-azi, xepai-xemaim, avoy-bapui ani atam ami, amchea bhurgeam thaim uloitana kaim pavtti purvozamnim dil’lea oparincho upeog korun bhurgeank xiddkavnni ani bori xist xikoitat. Thoddeo opari oxeo asat, teo chant-pallek amchea tonddar khelltat ani tantli ek mhollear nachonk nokllo angonn vankddem. Goddie zait hi opar eka Kristanvacha kazara matvant suru zal’li asot. Adlea tempar, Kristanvancha ghora angnant mattov ghalun kazaracho soromb zatalo. Angnnachi zomin vhoir-sokoll aslear tika eksarki unchai divn sopott (level) kortale. Kazarachem vo nachpachem angonn toyar korpak don va tin dis lagtale. Baimchem udok ghalun zomin ximpatale ani pettnni ghevn zomin ghott zavsor borich pett’ttale. Kazar suru zaunk thoddo vell asa mhollear, ekthaim korun dovorlolim zhaddachim chodd korun bendechim panam purai mattvan ximpaddaitale. Him pannam, nachpacha mattvan ghalpachem kharan aslem. Teddnanche twist ani cha-cha dans nachunk, hea pannancher sullsullit zatalem. Kazara disa nachtana mattvan dhull zalina zalear, angonn toyar korpeanchi tust kortale. Hi tust vo vakanni kazarachi xim zata tea vellar zatali. Ani zori nachtana dhull zalo zalear, konn tori ekto xim kortolea zagear, kantar ganvun angonn toyar korpeanchi izot kaddtalo. Adim, Abril-May mhoynneant, Mumbai aslelim Gõykaram sutten Gõyam yetalim. Xezarchea ghorant vo soireanchem kazarank tim vantto ghetalim. Kazarank vo dansank ximitt vo konkritachea Mumbaicha vosrean nachpi choddxea Mumbaikarank, ganvantlea ghora agnnant nachpachi sonvoim nasli. Borelim nachpi xenttalim. Maticha agnnant Mumbaikarank nachunk avghodd zatalem. Punn khorelo nachpi, keddnach zomnicho guneanv korinaslo. Hem mhaka thoddeabhov teddnacha Mumbaikaram thaim onnbhovlun ailam. Pollevnk sobit distali ti choli. Khas eka soireacha kazarak Mumbai thavn avoy-bapaycha sangata Gõyam aileli. Kazarak hajir aslolea ganvcha sogllea cheddeank ticha lagim nachunk zai aslem. Mhakai-i bhi tich umed asli. Punn chance poddonaslo. Emcee (MC) fuddlo dans miakar kolit korcha adinch, ticha sorbhonvtim tornatteanchi upot zatali. Noxib asloloch ticha thaim nachunk xoktalo. Ani oxem kortam-kortam mhojea bapul-bhavak ticha thaim nachpachi sort funttli. Amcha ganvcha eka choliechi mhaka ixttagott asli. Hi ixttagott fokot, kazara ghel’le kodden nachpa itlich. Mhonnchem, muzgamni khas songit vazlem mhonntoch ami dogaim kazaracha mattvant khoinsoruch asum, eka-mekak sodit muzgamni vazlole kumpasar ditadit nachtalim. Vaztole songitar ticha thaim nachonk ek atvich nachpachi urba mhaka yetali. Kumpasar moddop, gunvade marop, ani justuch vaztolea surar amche kullear-kulle ani bhuzar-bhuz haptop zatalem. Dekhun, he segit char-panch nach ami vhodda umedin nachtana, amkam konnench disturb korunk zai naslem. Punn tea disa amcho dusro nach somptanch, sobit Mumbaikanni thaim nachtolea bapul-bhav amchea sorxim ailo ani tea sobit choliek mhojea svadin korun mhojea ixttinnink zap korinastana ghevn ghelo. Hanv sodtalom bazlelem punn mhaka mell’lem orvem. Sobit sundor Mumbaikarnnink nachovpak mhaka ek bhag favo zalem mhunn hanv umedicha supan lottunk laglom. Dusre nachpi bhurge mhaka kunattkayen polletat kai diso. Muzgamni tango kumpasar sur vazunk survat keli. Tika kakeant ghetana mhoje naddieche ghoddghodd (pulsation) vhaddle. Hanvem payem halloile. Ti ubich ravli. Porto ekdam payem nittayer ghatle. Mhozo dhavo paim mukhar ghetlo somzun ti aplo uzvo paim fuddem kaddtoli kai mhunn. Punn nam. Ti tosich ubi ravli. Mhozo uzvo hat ticha pattir ghott chepplo ani mhojea islean oddpak hanvem steps fattlean ghetle. Ti nachpak chodduch zhodd yetali. Dotorer boslole vo gotlole mosik utthavpak ekdom sompem zait, punn; hea Mumbaikarnink nhoi aslem re saiba. Khorench; tika nachonk sapuch yenaslem ani tea khatir, mhojea bapul-bhav tika mhojea hodd’dear marun ghel’lo. Mhojea lagim nachtana tinnem kagall vo complain korchem aslem. In Bombay, I danced on the concrete floors. But here I’m uncomfortable…ani hanvem tika luan sanglem. People does not know to dance, blames the floor. Ani mhaka dista, amcha xannea purvozamni nachonk nokllo angonn vankddem hi opar oxich mhunnpan ail’li. Mhojem khorem zait? Lino B. Dourado
