Igorjent 'Dress Code' sodanch ho tontto aslo
Igorzamni padri toxench ghorchim vhoddilam, igorjent vetanam moryadin
nhespachem mhunn sangtalim. Dress Code ho vixoy atancho nhoi. Igorjent
vetana koslem nhesonn ghalun lok yeta tacher nhoich, padricho sermanv
ani dhormprantachi xikovnn, punn tiatramni poryan ami kantaram aikoleant.
Halinch Borea Jezuchea Bajilikent ani povitr zageancher vetana favo
tosli nhesonn ghalun yenasloleam touristank ek xello vo shawl ditole
mhonn ami aikolam. Ho dress code ascho hi ontor'raxttrik batmi zalea.
Toxench ASI ho dress code Bajilikechea odhikareamni apnnaunk zainam
mhunn sangtat.
Povitr zagear favo tem nhesonn aschem mhonn bhov purvilem mon sogllea
dhormamni amkam disti poddta. Punn Igorjent atanchea kallar odik lokx
ghalam. Haka lagun thoddo kall poilim igorjent zatolea kazaram vellar
nhesnnacher lokx ghal'lem amkam dista. Thodde padri koddok toren hi
xiddkavnnim ditat zalear thoddim padrink amchea nhesnnachem kiteak
poddlam kai mhonn ami bhasabhas kortat. Povitr zagear favo tosli nhesonn
ghalchi ho sodanch proxn asa ani to astolo.
Amchem itlem lokx nhesnnacher kiteak veta? Dress code hacher kollovnneo
korun ami vell kiteak ibaddtanv? Hea proxnak onek zabab asa. Amchea
monant ek yeta tem mhonnlear, amchea jivitachea bhailea vostuncher ani
bhaile sobitayecher chodd lokx asa, taka lagun nhesonn ami bhailean
dakhovnk odik mol diunk lagtanv.
Sogllem kemreak lagunk. Fottvacher borim disunk zai ani fuddlea
pinddkank mhaka polletana ami borim distalim mhunn tokhnay korche axen
ami lobdoleanv. Punn bhitorlea jivitacho fottu azun kaddta toslem mixin
ailear poryan hem bodoltolem koxem tuka dista?
Amcho dhorm chodd bhailea vostuncher dhorlolo zala. Ho dhorm ami faideak
poddta toso ami ghoddtanv. Sonvsarant sthaplolo khoincho dhorm amkam
favo tosli nhesonn ghalinastana povitr zageancher vochunk porvangi dina.
Punn amchea kuddichea vonddavnnek lagun, duddvanchea bollan ani eka
disachea fottvar urta toslem nanv zoddunk ami ek novo dhorm rochla.
ASI itihasik valor polletanv, sorkar tourism-acho faido sodta, punn
Igorjeche odhikari zageachi povitrtay samballtat. Ani Povitrtay
samballunk igorjek konnech addavunk zaina. Kiteak Bharot des dor
nagrikak aplo dhorm meklleponnim samballunk ani pallunk sothea dita.
Hantunuch amchea desachem vhoddponn asa. Soglleancho faido polleun
svotontrtay dita.
Dress code fokot touristank lagta mhunn ami somzunk favona. Ami povitr
zageancher fottu kaddtanv tea vellar hea zageachem povitrponn bhostavunk
favona. Boltench zalear povitr zage ami odik povitrtayen bhorunk amkam
avhan ditat.
http://www.v-ixtt.com/client/ogrlekh.asp
