Boroilear Chuk
Uloilear Patok
Loz-bhida naslele (immodestly) kopde nesun dev-mondirant bhitor sorunk thoddea
igorzamni monam kelolean, Mungllurant kaim lok challvolun poddleat. Ho thonto
kaim vorsam cholta punn halinchea disamni kaim padribabanim bemoriadik
nesnnacher tiddok anekdam ugtaylea. Hat-kape vistid, motvim skertam, angar
ttait bostolim T-shirts igorjechi mansugi ani sobay piddear korchem korun ajir
aslolea lokachem odikh korun daddlea mon’xachea monancher torekvar vaitt
porinam zata mhunn koddok avaz kela. Devak manun puzop korchea povitr ghoran,
be-moriadik nesnnam ghalun yevpachem koslem xanneponn asa, oso vichar
Mungllurche padribab kortat.
Devan dilolea denneanche upkar attovpak thodde zann igorjen vetat ani thodde
zann ek kaido mhunn sumanantlo ek dis Devak bhettoyla, hem nimit ghenv igorjen
distat. Oxem mhu? Mhaka zoborxem, ho/to kiteak igorjek veta; hem vicharchem
goroz nam. Tech porim hanv kiteak vetam? Deva kodden kitem magtam? Hem
pollevpachem dusreanchem kam’ nhi asta. Tori astana, Simanv, Sirineo, Satana
ani Sabina dispottim Misak kiteak hajir zatat? Ho pez thoddeanchea mhattear
kiteak poddla hench ek mhaka, vichitr dista.
Kaim dis fattim konnem eklean eksarke kitlech vichar kele. Tennis khellpi
cheddvamni kule (buttocks) dispa sarkem itlem mottvem nesnnam kiteak neschim?
Ani tennis khellpi daddleachim dhompra sokla? Cheddvancho tennis khell hanv
TV-ir polletam vo nam? Tim khelltana choddan choddxi mhoji dixtt vo nodor khoim
asta?
Raj Kapoorachea Ram Teri Ganga Maili filman, Mandakini film-notik, eke
avoychi bhumika korchi poddta mhunn taka ugddas kelo. Hea filman tornattem
Mandakini aplo tthan (breast) bhair kaddun lhan porak tem duddak dorta.
Sinemachea podd’dear hanv umedin tichi bhumika polletalom ani nhoi ticho tthan.
Teach pori mhoji nodor fokot tennis khellacher ani nhoi tanchea kuleancher.
Tiatr machier cheddum aktresache paim nhoi mhunn zangddancher mhoji nodor
asona. Punn tanchea ektingacher. Osi zap ditoch to mhakach eksarko pollevnk
urlo, ani tannem mhonnem, -Tum Arjun-a porim dista mhaka-.
“Arjun? Ho anik konn?”, hanvem vicharlem.
Arjun zavn aslo ek vhodd zuzari. Guru Dronacharya koddlean tannem bann marchem
(archery) xikop ghetlelem. Xiktole bhurgeancho thir vo bann marpacho huxarki
pollevnk, Guru Dronacharya-n lakdachem suknnem zhaddachea khanddeak humkaylem.
Suknneachea dolleak thir korcho aslo. Gurujin poilea vidhearteak taka kitem
dista tem vicharlem. Tannem sanglem jardin, zhaddam, fullam ani adi adi. Guru
Dronan taka kuxin sorunk sanglem ani oxe toren zaitea bhurgeank vicharle uprant
Arjunachi palli aili. Taka kitem dista tem vichartoch, Arjunan apleak fokot
suknneacho dollo dista mhunn zap dili. Ani Guru Drona khos zalo ani bann marpak
porvongi dili. Arjunan, lokxachi xoktti dakoyli (powers of concentrations) Taka
fokot suknneanche dolleak thir korunk zay aslo. Dekun taka fokot suknneancho
dolo distalo.
Hanv igorjent vetam, Devan anik ek suman borem jivit dilem mhunn upkar
hattovpak. Ani fuddlem suman koslinch vaitt vignnam nastonam, odhik folladik
ani bholayken bhorlelem zaunk Devachea darar marun hanv igorjentlo bhair
sortam. Ek vor odhik igorjent sartana, mhojea fattim-fuddem vo bazuk konn ubo
ravla, to vo tem kitem neslam hem pollevnchi mhaka sonvoim nam. Mhojem mon,
hanv igorjen kiteak ailam tacher chitkolelem asta. Dolle ani kan ugte dorun,
Misan vantto ghetam ani padribaban sermanvan sanglolem mhojea jivitak lagu
zata zalear, tem hanv ganttik marun dovortam
Punn soglle zagear ani sogllea vellar amche dolle bond asonant vo bondd
dovorunk zainant. Amchea samkara cholun yetolo vo ubo aslolea mon’xancher
avchit amchi dixtt poddta. Tednam to monis kitem nesla ani koxem nesla tem
dixtta. Ani oxem kitem tori ek dis ghoddlem. Mis somplea uprant igorjichea
kompaudant mhojea ixttachi vatt polletalom. Hanv ubo aslolo thoim, mhojea
samkara ek choli ubi zali. Begantlo fone kaddlo ani fonache ankdde chiddunk
lagli. Ti nesleli T-shirt, hodd’deache tenkun aslole don dongurleanchi
modli chir (cleavage) khoim meren pavlea ti dollebhor distali. Konn-ui daddlo
monis curiosidade-chi dusri nodor marlea xivay ravcho naslo. Punn oxea vellar
daddlea mon’xan ek ugddas dorcho. –Zor konn-ui eke ostorecher kam’charim dolle
lait, tannem aplea kallzant tiche kodde pordvar kelo- (Matthew 5:28) Tika
igorjintli bhair sortona dekloli. Zori tinnem Misan vantto ghetlolo ani
padribabaxim kumuneanv xevunk geloli tor, tichem ugtem
prodoxonn pollevn padribabachea monant tiddok choddli astolich.
Addvarlole fol khatoch, Adam ani Eve-che dolle lozun ugte zale ani tannim
Alzira zhaddachim panam xivun khuddiche khasgi bhag lipoile. Hem sarkem nam
mhunn Devan tankam sanglem ani zonvorak marun tancheo vingleo khuddi zonvorache
katin dhampunk dileo. Tea khallachim nesnnam tim. Punn hea tempar mansugen
khudd nesovpak zaitem lugot astona, aichi ostori apli khudd be-moreadik nesnnan
kiteak nettovun, khuddik axelelea mon’xanchi bexttich kiteak xikari zata ho
husko aichea dhorm muneareank zala. Dekun, Mungllurchea vattharan igorjent
be-moriadichim nesnnam nesun igorjen yevkar nam mhunn kodddok xiddkavni diloli
ti, thoddeank koddu laglea.
Lino B. Dourado
---------------------------------------------------------------------------
Protect Goa's natural beauty
Support Goa's first Tiger Reserve
Sign the petition at: http://www.goanet.org/petition/petition.php
---------------------------------------------------------------------------
