Goy Nagddem Zatoch?
Goychea Vidhan Sobhecheo vechnnuko darar pavleat ani kitem kai mhonllear ajun
thoddea pokxamni tanchea umedvaranchim nanvam jahir kelim nant. Tea-tea motdar
sanghantlea vechnnuko lodovpak konnacho pokx khoinchea umedvarak bosoitole tea
proman dusro pokx aplea umedvaranchi voleri ugti kortolo. Ho tancho vitt haddpa
sarkelo politik khell pollevn aam-aadmi mathear hat dovorun bosla. Internet
online Goychim disalim vachlear ani mavle tholl TV-cher (web site TV channels)
pollelear 2012 Goychea vechnnuko ekdom mothvacheo ani faideacheo koxeo disunk
lagleat. Barik nodreleant ek dhanvti nodor marlear, hem sot koxem disunk laglam.
Hea pavtti vechnnukecho zor vo tap, rajkaronn anik naka mhunn soddun ghelele vo
konxeak poddlele adle thoddea rajkarnneank, porot politikachi komri funtlea ani
vechnnukechea moidannar disunk lagleat. Thodde jitik pettleat. Ani thodde motam
foddchea khatir ube ravleat vo ravtole. Pokxanchim bhitorli kizilam pollelear
promanninkponn tannim ganank dovorlam kai dista. Delhi aslele khasdar vo Member
of Parliament porian hea pavtti Goem vechnnuk lodovpak tikett magtat. Pokxachi
tikett mellona zalear independent vechnnuk lodovtolo mhunn, xiddkavni ditat.
Barikxea voklantlean ho politik intruz niyalltana, mhozo fone vazlo. Mhojea
lagxil’lea ixttacho aslo to. Taka zap keli. Lhanxe ghoxtticher ulovop somptoch
hanvem eksarkem taka vicharlem.
“Kitem cholta re baba. Hea pavttichem politik amchea rajkarnni samkech
gannaitat mure. Vitt haddli re tannim”
“Fuddle vechnnukek hanv bostolom. Ten’na sogllem tharear poddtolem”
Mhojea ixttan panch vorsam uprantle, mhonnchem 2017 vorsan vechnnukek
lodovpachi itsa dakoilea ti aikun, hanv itlom hanslom, itlo hanslom, fuddem
anik hanspachem mhaka kainch uronaslole bhaxen hanv hansot ravlom.
“Hatunt hasnpachem kitem asa? Hanv seriously uloitam.”, mhojem hanspachem bond
zaina tem pollevn tannem vicharlem
“Kitem urtolem? Goy nagddem zatoch tum nivuddnukek bostolo?”
“Mhonchem? Hanv somzunk nam”
“Papia, Goem chorun ani lutun khavpak hinch 5 vorsam borreantlim borim mhunn
tuka ili tori khobor nasli?”
“Tori astam tujem somzunk kothinn lagta”
“Regional Plan 2021 udexim dhor ek motdar sanghatlean komoitole duddu, te
fuddle char pillgek pavta toxem puro zatelem. Tea khatir hea pavtticho
vechnnukecho zor soglleank ek virus koso lagla. Hacher tacher choddun koxai
porim tikett mellun ghenvchi marathon race suru zalea. Dhanvden, vechnnuko
jikhpachi tank asa taka tikett mellteli oxem nam, punn, luttintlo mall
ektthaitolo te vanttpachea hixeobar zo umedvar khuxi dakoita vo manddun gheta
takach pokxachi tikett mellteli. Hea panch vorsam modim vorixtt prokolp
(projects) ani imaroti Goyant toyar zatoleo. Ani tatuntlo kochro zo bhair
sortolo, tujea osle 2017 vorsan nivddun yetolea rajkarnneancho vavr, Goem
limpar korpacho astolo. Chintun polle. ”Lino B. Dourado
---------------------------------------------------------------------------
Protect Goa's natural beauty
Support Goa's first Tiger Reserve
Sign the petition at: http://www.goanet.org/petition/petition.php
---------------------------------------------------------------------------
