Mhozo Poilo Valentine
MOG, ho apurbayecho sobd mhoji ovkoldaddi (wisdom tooth) fultokoch mhaka
somzupak sarkem ailem. Hanv nenttea pirayechim vorsam tantalom, ani ti piray
cheddvanchi ixttagott zhoddcheli asli. Mogan poddlolim mogiam khoro mog
korinant, fokot movje khatir kortat hem ani tem, oxe; amchea vaddeantle voddil
uloitale tem, ken’na ken’na kanar sadovtalem. Mogan poddchem, ek patokuch, hem
survatek mhaka distalem. Punn jedna, ten’nachea Pilar sakun yetelea kherit
tornatteam khatir aslelem Inglez masik Fr. Agnel CALL-acher, moga vixim ailolo
lekh vachun mog korpachi bhirant mhojer asleli ti, futtfuttun ubon gheli. Padri
babanuch boroilolo lekh to. Khorea mogak, privthvi rochtolea Bapacho axirvadd
asta ani mog khorop ek pap nhoi mhunn, tea vorsak Febrerachea mhoynnant kherit
ankar chappun haddlolo Valentine lekh vachtoch, mhakai ixttagottiche ubav borle
ani Valentine ixttin aschi oxem dislem.
Kochro sap kortolo zalear saron marunk zai. Ani mog kortolo tor poili line
marunk zai. Hem khoim tori hanvem vachlelem. Line martolom konnachi? Ganvantlea
cheddvachi line marop mhonnchem, ek vhodd patok. Kiteak? Akkea ganvant
ghomtolem. Hea bhirantin, ganvantlea cheddvachi amizad naka distali. Khoim tori
poisullea cheddvachi line marchi, hem; mhojea mogavixim ritea kopollan ailem.
Konnank disonam toso chori chori chupke chupke mog korcho. Magir ganvkarank
nhoi mhunn ghorcheank khobor aschina. Punn? Choli khoinchea ganvchi faravop?
Oi. Durbarth!!! Fonddem vatarant aslolo mhojea avoycho ganv. Mhoynneantlean don
pavtti tori hanv mamachea ghora vetalom. Ani thoim vochpachem kharan
mhonllear, amchi xamaim. Ti mhoji khub apurbai kori ani toxem korunk karan
aslem. Ratchem jevonn jevlea uprant tika dumttechi vidi zai asli ani ti, nitoll
ponsachea panacher mast korun, tika ditalom. Hanvem toyar keloleo vidi, tika
don sumanam porian pavtaleo.
Tea vorsak Valentine dis, Aitar aslo. Durbath grannyxim vetam mhunn mhoje
avoyk Sunkrara ratim kollit kelem. Maddachem ghodd ghallun Grannychea gostachi,
topantli bakri mhojea avoyn toyar korun dovorli. Khorem mhonllear, hea pavtti
Durbathche tripik, veglem kharan aslem. Xamainchea ghora savn xembor metram
sumar, fulam aunty ani tigeli ektich dhuv ravtalim. Ghorkar tarvotti. Mamagher
ghelele pavtti chukoi nastona, hanv tangher bhett ditalom. Tika fulam aunty
mhonnchem kharan mhonllear, tichea ghora fuddlean ani fattlean fulanche vhodd
molle asle. Ti, fulancho dhondo kortali. Borim fulam ghorakodde koptat te
toren, tichim fulam Foddenche bazarak vhorunk lok upot ghaltalo. Hea dhonddean
tichi dhuv tika adar kortali. Avoychea porim dhuvui 'business minded' zaleli.
Konnakuch ek poiso unno korinasli.
Tiche dhuvek-fulam-bai, hea nanvan ganvcho lok vollkitalo. Sundor distalem.
Tangelea ghorakodde amchi bhett zata ten’na tem, mhojea dolleank dolle lavn
uloitalem. Avoyche toren takai fulanchem pixem asa mhunn kallzantlean
sangtalem. Sond mellta tedna, avoychea dolle add korun, mhojea hatak ghott
dorun "I like you" mhonntalem. Hanvem, tachi utram jikon ghevnk kednach tozvit
keli nam. Kiteak mhaka mogan poddchelem naslem. Ti mhoji ixttin ani ixttinuch
koxem ravchem. Zedna Padri baban mogavixim boroilo lekh Fr. Agnel CALL-acher
hanvem vachtoch, tem mhojem Valentine zaunchem, oxem mhaka dislem. Dekhun,
Valentine disachi sondhi ghevn mhozi ixttagott vaddovnchi, osi mhaka as zali.
Tea Son’vara ratri hea susegad Goykarak nidhuch lagona zali. Kedna kai
Aitarachi sokall udenvcho hea chintnanim bhormetalom. Dollo kedna laglo ti
khobor nam. Xamain, Misak vochunk uthailo. Misak ghelear Misacher mon lagonam
zalem. Misa uprant, sodam porim hanv tangelea ghorak bhett ditolom, punn, hea
pavtti bhettechem rup nichit vegllem. Sodam porim tannem mhonnchem "I like you"
Ani sonnsonnit hanvem zap dinvchi "I also like you. Be my Valentine."
Mis kedna somplem? Disa uzvaddan sopneteleak zanniv nam zali. Xamaim borobor
tichea ghora ghelom. Mhojea avoyn diloli topantlea bakre kuddke khai-it xamain
diloli kofi sompoili. Grannychi porvongi ghevn, fulam auntychea ghora vochunk
bhair sorlom. Porsan pavntanch, soglea gulabam modlo motto gulab thoddlo. To
ghevn ugtea aslolea darar avaz ghatlo. Fulam-bai darar ubem. Mhojea uzvea
hatant aslolo gulab taka divnk hat fuddem kaddun happy 'Valentine wish' korunk
vechea vellar, 'business minded' fulam-bayen apnnale avoyk mottea avazar
vicharlem
"Maim, poilea mollantlea, eka gulab-ache poixe kitle ghe?"
Mhojim utram mhojea jiber suklim. Varo nasun hanv fugar zata kai diso. Nigtoch
vo fresh hatant aslelea gulaban, lojen tokli bhagoile porim zalem. Filmachea
podd’dear dakoitat tea porim gulabacheo ek ek korun pakotteo zhoddtat toslo
dekhavo ubo zalo. Jivitantlo poiloch Valentine ixttagott zhoddunk ailolo
lip-choriam kaddlolea fulan, mottoch doko dilo.
"Dhedd rupia ge baye", bhitorlean avoychi zap aikunk aili.
Paddeli loz hanv boroboruch ghevn bhonvttam tea khatir lojek morchem nhi mhunn
mhojea avoyn dilele justuch bosiche tikettiche poixe atth anne-char anne, atth
anne-char anne, oxe mezit, tichea hatant chinchinit dhedd rupia ghatlo, ani
hanvem mhojea poilea Valentine disacho ugddas, semprak dovorlo.
Lino B. Dourado .
---------------------------------------------------------------------------
Protect Goa's natural beauty
Support Goa's first Tiger Reserve
Sign the petition at: http://www.goanet.org/petition/petition.php
---------------------------------------------------------------------------
