Budd’dd zai tor, mhojea koddlean fukea ghe Porchea disa, zaitea tempan mhagelo ek ixtt bhettlo ten’na, mhaka to sapuch bezaran dislo. Taka konn tori sotayta vo tras dita mhunn, tachem adlem hanstem mhukamollacher, datayen patovleli niraxi savlli kollit kortali. Taka hea poristithicher pollevn, mhojem tondd apo-ap ugtem zalem. “ Zalem kitem? Tum chintest distai. Ghorcho sogllo lok, boro asa mure?”, kuttumbantlo konn tori duent asot, hea huskean, hanvem taka vicharlem. “Toxem kaim na re. Ghorchim sogott asat bhorim.” “Zalear, tujea hanste chal-riticho bodoll koso zalo?”, hea mhojea vicharak zap divnchea adim, tannem azu-bazun nodor marli. Lagsorlo vo vollkicho konn nam ti khatri kortoch, tannnem mhaka sovkas avazar sanglem: Tin kuddachea flat-an, ek-ek kudd ghevn to, ani tagele don ghott ixtt ravtat. Mhojea ixttachea nanvar flat asa. Adim, tachem kuttumb tachea sagata aslem. Hangasor vo Kuwait-an bhurgeanchem xikop somplem ani fuddlem xikxonnank lagon, tannem aplea kuttumbak, Goyant pattoun dili. Eka mon’xak, itlea mhargeyechem flat-achem baddem bhorchem poddta mhunn, tannem dusrea don ixttam sangata flat-an ravpache vanttekar kele. Bhaddeache, bizleche ani udkache duddu zalear, randche kuddin vo kitchen-nant jevnna khannacho khorch zatolo, tegui vattun ghetat. Oxem korun, koloch vhoir-sokoll chukicho somoz zainastana, sogllem vevostithin tanchea modim atam meren cholta ani oxem choltana….. Punn, fattle kaim mhoynnem mhagelea ixttak dison ailam, tacheo kaim vostu, te dogui ixtt vapuddtat mhunn. Dispotim vapurcheo tageleo vostu toothpaste, shaving cream, disposable shaving razors, after shave lotion, boot polish, head shampoo, washing powder, sabu vo soaps, body spray ani tin char torecheo ‘creams’, toileti bhair ek lhanxi armar vo cabinet asta, tatunt to dovorta. Vikot haddleleo vostu, adim; taka don mhoynnem vhoir pavtaleo, punn halinchea tempar ek mhoynno sompta mhonllear, tachea vostuncho konn tori vapor korta mhunn, vostuncho unnava velean, taka onbhonvlun ailem. Bhaile armarin tacheo vostu dovorchea bodla, tagelea rumant sugur kiteak dovorcheo nhi? Hanvem vichar kelo ten’na, okosmat oxem kelear, chori kortelem boglant ani goir somoz zaun tagelea ixttank vaitt disot mhunn, to vhoir-sokoll zaunk laglo. Tagele dogui ixtt pezad pagar ghevpi. Mhaka kollit kelam tea pormonnem, imtte nhoi te. Toruipunn, osolim imtteaponna mhaka sapuch ruju zaina zalim. Hanvem mhojea ixttak budd’dd dili. Eksarkeo armarint dovortoleo vostu, lohu lohu korun tachea rumant bhitor vorcheo. Hea fuddem novi vost vikot haddta ti, tachea rumant dovorchi ani ritim zatelim butt-polis latam kivam kremichim bokxam ani her vostu armarin soddun dinvcho. Toothpastichea tuban funk marun tube fuloycho ani tatunt udok bhorun dovorchem. Jedna tache ixtt dant gasunk yetele, tendna toothpaste zagear udik bhair sortolem, ani tea velar tanchim monam ugtim zatelim ani loz zavn te zagear yetele. He gozalik sumar 35 dis zaun ghel’le. Poir tedus tannem mhaka fon kelo. Sodam porim mhojea bholayki ani ghorcheanchi khobor ghetlea uprant, mhoji budd’dd (advice) xembor tokeanni faideachi zali mhunn, tannem khos porgotayli.. Konnanche tori faideache zata toxem hanvem kelem. Mhojea kapostadechim fintam vhoir sorlim. Fon bond korchea adim, adlea porim tannem kensank ghalchelo shampoo, armarintlea zageavelo kaddun, nhanient vo bathroom-an kiteak dovorla tea vixim hanvem chovkoxi keli. “Mhateak kens aslear shampoo vapurtele mure te?”, tannem motto hanso kaddun mhaka mhonnlem. “Mhonnchem? Hanv somzunk nam?” “Mhojeo yer vostu unneo zait vocho, punn fokot head shampoo asa tosoch astalo. Mhagele dogui ixttanchea matheak ek porian kens nam. Dogui kodd’dde. Tankam shampuchi goroz nam.” Ho mhagelo ixtt mhojea budd’ddin, xano zalo mu?
Lino B. Dourado
