SON’VARACHIM SUNGTTAM: Hea Lekhantlean Kitem-i Borem Yet? -Jose Salvador Fernandes “Kalla promannem mathear kurponnem” oxi amche Konknnint mhonn’nni asa. He nodrentlean, ami tor desantlea tore-torechea masikancher nodor marlear, tantuntlea khubxea, kitleach kallachea masikamni aplem mullavem totv samballun, potrokariteche nodrentlean kalla prommanem sabar konnanmni (angles) novim angam ghetleant. Gõyantlim veg-vegllea bhasanchim masikam, va satollim va pondrallim asat tannim-i aplea vachpiank monanchi bori khavodd diun, az meren zata te bhaxen samballun-tigoun dovorpacho thokos gheun vavr kela, ani korit asat. Punn hea soglleam modem, Konknniche Romi lipientlean neman yevpi thoddea uzvaddavnniancher bariksannen nodor marlear, teo uzvaddavnnio uzvaddavnnechea poileach vorsantlim mannkulim bhurgim koxim dolleam mukhar ubim zatat. Konknnintlea kaim nemalleanche som’padok chovis-ponchvis vorsam adlench chintop tanchea uzvaddavnnianchea ogrlekhamni chab-chab-chabddaylolem disun yeta. Vachpianchea monancher uzvadd ghalche tantum noveponnache vicharuch vachunk mellonant. Ek som’padok ailole pavtti teach-teach vixoyancher ani teach-teach vicharanche ogrlekh boroyta tednam, khubxe prosn monant yetat – ho som’padok anink khoinchea-i vixoyacher ogrlekh borounk vell korinam kai? Va sodam poros vegllea vixoyancho obheas ani vichar korunk tachem mon unnem poddta? Va, dusrea vixoyancher aplem mon ugtaunk eka som’padokak asunk zai titlem taka vachop va zannvay nam? Ami Konknni bhaxechea itihasacher kal meren nodor marlear, he bhaxentle potrokariten Konknni chollvollik sumara bhailem yogdan diun, Konknni chollvollik hatbhar laylo, ani tantuntlean bhas mozbut korit tika fuddem haddli. He potrokariten bore-bore Konknni borovpi, ani tea borovpantlean vachpi-i toyar kele. Tem misanv, to doll ani to foll aichea kallavelea thoddea Konknni nemalleamni polleunk mellonam hi ekdom’ khontichi gozal. Az Konknniche Romi lipientlean jim pustokam uzvadda yetat tim uzvaddavpa sarkim asonant oxem Romi lipientlea thoddea Konknni som’padokanchem mot asa. Tantum vyakoronnacheo ani utram borouncheo-i chuki astat tacher-ui te chabuk martat. Mot mhonntanv tednam tem sarkem va vankddem-i asum yeta. Konknniche Romi lipientlean uzvadda haddpa sarkim naslolea pustokanche borovpi, hea som’padokanchea nemalleancher-ui borovpi astat. Zalear, hea borovpianchim borovpam hea som’padpianchea nemalleancher uzvaddaunk koxim purtim astat tor? Konknniche Romi lipientlea zaiteach borovpianchea borovpamni vyakoronnacheo ani utram borouncheo chuki astat hem sot! Punn, hea chukim khatir tea borovpiank guneanvachem bott dakoun, apli zababdari titlean sompli oxem chintun kuxik sorop, hem Konknniche udorgoti khatir vavurtolea konnakuch sobchem nam. Konknni bhaxentlea nemlleanchea-masikanchea som’padokachea kodelar bosloleak tor nhoich nhoi. Toxem polleunk gelem zalear, hea kaim som’padokanchea nemalleancher-ui teo chuki disun yetat. Kednam-kednam eka nemalleachea ogrlekhant vyakoronnacheo ani utram borovpant chuki distat teo teach nemalleantlea yer borovpianchea borovpamni sarkeo boroyloleo astat! Khorem mhollear, Konknniche Romi lipient bhaxeche nodrentlean ho ek boreach vorsancho husko korcho prosn asa. Punn Konknnintlea amchea thoddea som’padokank hi gozal khobor asun-ui te tacher mettam gheunk borech unne poddleat. Borpavollint asloleo chuki sudraun uzvadda haddlolim borovpam borovpiamni vachun apleo chuki sudarcheo oxem tea kaim som’padokank dista ani titleacheruch ho vixoy sompoytat. Choddxea Konknni borovpianchea hea prosnanchi khobor chodd korun Konknniche Romi lipientlean nemallim va masikam choloytolea soglleach som’padokank khobor asa. Hea veg-vegllea nemalleancher-ui borovpi tech astat. Hea vixoyacher kholayen vichar, bhasabhas korunk ani tea udexim goroz tim mettam ubarunk hea nemalleancher som’padok kiteak ekttaim yenant, ho anink ek vegllo, sod-vavracho vixoy! Amche Konknnintle kaim som’padok, aplea hatant nemallem va masik asa mhonn kitem-i boroun chhapop ho aplo mullavo hok’k mhonn somzotat ani toxe kortat-ui. Dusrem, konnem-i hea som’padokank tanche vixim koddu sot sangtoch, kaim som’padok tea mon’xacho rag kaddunk aplea hatant aslolem nemallem va masik aplem ‘defence mechanism’ hatiyar mhonn vaportat. Itlench nhoi, te hea hatiyarantlean, fokot som’padokache kodelir bosun dusreank, purannantlim xakek upkaronaslolea vaingianchi khobor sangun apunn yeram poros vegllo ani sav mhonn provar korunk sodtat. Oslea som’padokanche he vagnnukek lagon, aichea kallar Konknni potrokaritek ani Konknni chollvollik borench luksonn zalolem disun yeta! Konknni bhaxen Konknni potrokaritek adim khub tola-molachem yogdan dilam, ani hem girest yogdan ditanam Konknnintlean borovpi, vachpi ghoddoyt Konknni chollvoll fuddem vhelea. Tednanchea amchea Konknni som’padokank apunn Konknni chollvollicho mhotvacho bhag, ani aplea buzancher kitli vhodd zababdari asa ti spoxtt khobor asli. Dekunuch te ni-svarthiponan ani bhaxechea mogan khub thokos gheun itle vavurle ani bhas jivi dovorli. Punn tech Konknnintle aiche kaim som’padok, Konknni chollvollichi mhotvachi zababdari aplea buzancher asa hem sot visorloleachem chitr, svota tanninch aplea nemalleam-masikam udexim toyar korun dilolem polleunk mellta. Ek nemallem va masik kaddpa xivay apnnak Konknni chollvollint anink koslich ‘duty’ nam mhonn somzun, kaim som’padok pois thaun tech Konknni chollvollicher ogunnache fator xevttun ani vikh onkhun, Konknni chollvoll oskot korpacho proyotn kortanam spoxtt dista! Khub dukachi gozal! Konknniche Romi lipientlea som’padokanchi zababdari vhodd asa. Dekun tannim Konknnintle zunve zainam title bore. Zunve mhonn sthapit zaleat zalear tannim hea zunveam modim pul bandchi goroz asa. Konknniche Romi lipientlea som’padokamni ekvottan yeun, Konknni mollar-ui lokxayecho chovto khambo kitlo mozbut asa to dakouncho vell khub adim sorun gela. Torui, ‘better late than never’, mhonnit tannim… .
