"Tujea xirapan ghele vechnnukek Kongres piddiar zalea" Poir mhaka mhojea eka ixttan (porxim vollkona, net-avelean zal’li ixttagott), Xirap, khorench buztat kai? , ghelea vorsa Setembrachea 10ver uvvaddak ailolo mhozo ek lekh mhaka dhaddun vhoilo vichar korta. Eka vorsa upran, tannem ugddas korcho hem vichitruch dislem. Thodde vachpi konn kitem ani koxe boroita hem nond korun ghetat, hachi zanniv zali mhaka. Tachea vicharan khorench sot asa kai? XIRAP, khorench buztat kai? Kristi Povitr Pustoka pormonnem, Devan poilo xirap sorpacher ghatlolo. Sorpak mhonnlem:sogllea ghorchea ani ranvotti zonvaram modem tujer xirap poddum. Sogllea tujea jivitan tujea pottan tum choltoloi ani dhul khatoloi (Upoti 3:14) Pornea Korar-an, sabar xirap amkam vachunk melltat. Ani Novea Korar-an, Svami Jezu Krist aljiracha zhaddak xirap ghalta. Hea fuddem keddnanch tujem foll konnuch khaunk pavo naka (Mk. 11:14) Povitr Pustokantle dor ek xirap vachun ami niyallar, khorench hea bhuimer jiyetolea mon’xancher xirap fattik lagla kai dista. Jednam Adanvancho put Cain-an apleach bhav Abelacho khun khel’lo tednam, tacher xirap ghatlolo (Upoti 4:11) Cain ani Abel dogui Devak bolidan (offering) korun ailolea tea vellar, Devan Abelachem bolidan svikarlem ani apnnallem manun ghevnk nam mhunn, Cain-ak tiddok choddli ani tannem Abelacho jiv kaddlolo. Hangasor poili niddkukai suru zali. Ani aiz meren, niddukay amchea somazak vegoun asa. Lhan monis koxttamni vhoir sorlolo duddvankarak naka asta. Koxei toren cheppni vo vozon ghalun vhoir sortoleank chidd’dun dovorunk, vhodd monis dorya uspunk toyar zatat. Purvonzachem vhodd pap tangele sonsticher vo dha pillgamcher bosta mhunn, Dusre Somurtir vachunk mellta. Punn aicho monis hea ani dusrea gozalincher titlem lokx dinam. Zaite pavtti amchi koslich chuk vo amchea xegunni avoy-bapayn chuk kelina tori astana amchea jivitacher addkolinche addame ube zatat tednam ami, hea ani tea magnneachea zageancher danvpotti kiteak kaddtat? Devache soglle mandament palltolea atanchea ghorabeank, purvozanchem papak kiteak mhunn guneavnkari tharavop? Kaim monis bhavartan deunticher rozar-magnnim kortana, purvonzanchea patkanchi chuk asa mhunn, azo-ponzeancho itihas uspun ugddas kortat. Te morun xekdde somple. Tanche otme sonvsarant ajun jive astat gai? Devacher visvas dovorun purvonzanche chukichem bhogsonnem Deva thaim maglear, Dev tankam bhogsonnem dinvcho nam? Ek khori ghoxtt ami visrunk zainam, ani ti hi: Judevanche rajvottecher atam meren choltolea hinsacher (violence) bariksanin niyallar, Jezuchea inosent rogtacho xirap tancher poddla, hem sot dista. Jedna Svami Kristak, Pilataxim mornanchem formon marunk haddlo teddna, Jezu inosent mhunn, Pilatan porje hujir hat dhule. Punn akhe porjen bob marli. Tachem rogot amcher ani amcheam bhurgeam ballancher poddum (Mt. 27:25). Ani atam, amchea sorbhonvtonim aslolea desamni ami kitem polletat ani aikotat? Khorench Jezu-chea rogotacho xirap tankam bhuzta kai? Dor ek mon’xache vaitt kortubancher xirap ghatleat te mon divn ami vachlear, Kristi Povitr Pustok amchem jivit nitt dovorunk xikoita. Punn ami osokt pranni kitle mhunn Devache mandament palltat kai? Devache xikovnnecher ninda (blaspheme) kortoleank keast favo zata. (Lev. 24:15-16) ani tech porim iadnikancher vo govnlli babacher virudh uloitoleancho jiv kaddcho mhunn Dusri Somurt (Deut. 17:12) xiddkavnni dita. Hea jinxinn anikui bhirankull xirap asat. Konnui pelechea battam-besam xim-mer haloita tacher xirap asa, (Duet. 27:17) Punn ho xirap mat Gõychea rajkarnniank vo politisianank lagu zaina. Amche Amdar-Montri Gõychi zomin nagoun ani luttun khatat mhunn, sogott porja zannam. Punn choddan chodd porja tancher xirap soddchea bodla tankam axirvadd divn portean-portean nivddun haddtat. Eleisanvam vellar hozar rupianche nott, mollbavelean manna, hatar poddlea vori dista. Punn tem fokot nadd-buddichem ekuch disachem khann mhunn, duddvache axeche motdar visortat. Konnui ni-opraddi mon’xacho jiv ghevnk duddu ghetat (bribe)tancher xirap (Duet. 27:25). Amchea sorkari kamdarank porjechea duddvani postat. Punn tech kamdar lokachim kama fuddem vorunk lonch magtat. Rajkarnni ani sorkari odhikari bribe ghetlea xivay khoinchich file fuddem dukollnant. Oslea mon’xancher lok bottam moddun xirap ghaltat. Ani tanchea modem ravun hanvui ek atanchea challisui amdarancher xirap ghaltam. Tumi fuddle vorsachea eleisanvank nivddun yevunk pavo nakat. Punn ek visortam hanv. Konknnileant ek opar asa. Kavlleacho xirap ghorak lagta?
