Ontoskornnache Mhellsamnik Ajit Koslem?
Potant zatolea gasicher (vai) upai ghevunk, purvozanim chalu kelolim don torechem ajitam asat. Fuganv (chickenpox) kivam ururem (measles) ailoleank, char disam uprant pottant aslolo jiv morcha khatir, porpotachem ajit ditat; ani, jevnna-khanna velean zatolea gasik lagon badi-sopachem (fennel seeds) ajit ghetat. Ani ek ajit asa. Tem kadoint (bondkhonnint) mellta. Taka jellachem ajit mhonntat! Amchea xezarchea vaddeant ek ostori asli. Lok tika ajitkarnn mhonntale. Ti irrikadoran ajit (enema canister) dinasli. Ticho sobhav vegllech torecho aslo. Gorjeviret, dusreanchem nanv uboilolem, tika avodd naslem. Kharana viret, dusreacho abru-man ogddaitole luchot mon’xanchi, sonsonun tiddok tika martali. Aplea dolleant patti (lakud) astana dusreanchem dolleantle kisor kaddtole/kaddtolim mon’xam, ganvant hungot-hungot heddtolim sunnim, oxi ti somzotali. Ani toslea mon’xanchea ghora vochun dha zannam uzram tanchi vaitt sonvoim tonddar marchea marun, mori soltat te toren solun, izot kaddtali. Dekun, tika nanv dilolem. Ajitkarnn. Lokam samkara pad marop (farting) ek paddeli sonvoim. Punn thodde pavtti konn naslolea zagear pottantlogas vo vai varear soddun dili zalear, bhitor pottant zatolo kodoll uno zaunchem zaun, jivak borem dista. Ghannichi vai soddun ditolea mon’xa samkara ubem ravunk, ekdom kotthinn zata.Sulfur gas chodd ghann dita. Thodde zann, vas yena toslo varo soddtat. Tori astana, zomil’lea lokam vo sogleam samkara pad marop, ek mansuge bhaili gozal. Ani oxe toren bhurgeaponnar konnui eklean pad marun amchea ghorant ghann gaili tor, amchi avoy soroll mhontali, “konnanchea pottant kuslam. Ajit divnk zai”. Pad konnu-i marum, vasanuch laughing gas zalolea porim mhaka rokhddoch hanso yetalo ani amchi avoy sozmotali hanvenuch sulfur gas soddla. “Hanv nhoi, hanvem marunk nam,hanvem….?”, avoychea ajitak bhiyen, pad marpi mhoje bhav, negar vetale ani hanv hanstam mhunn, ajit mhaka poddtalem. Amche purvoz, choddxe ganvtti vokhddi (medicinal) zhadd-palleanchea vokhddanuch, vhodd marekar duensam curado (cured) kortale. Tortorechim sabar zhadd-palleanchim vokhddam, kuddik zatolea duensak eksarko ilaz ditat. Vhoddilamni onbhovlolo nixchit zhadd-palo vokhddancho porinam aiz meren upeogi zatat. Zaite ani torekvar duensacher ganvtti vokhddi gunn sodun, sabar duensam pois keleant, punn aiz meren ontoskornnan mhellsan nirmann zatoli ti limpar korpak, khoinchai voiza lagim koslench vokhodd sodun kaddunk zaunk nam. Hi ontoskornnachi mhellsan, her duensam vonn, chodduch ghannieari zaun asa. Lino B. Dourado
