Dabolim Zai, Mopa zai. Gõykar Konnank Naka. Tumchem kasgi mot khoim ani kitle meren asa tem hanv nokom. Punn mhaka zalear matui ek sozmona, eke barik gozalicher itlo vhodd bovall kiteak poi to. Utor Gõyantlea lokak Mopa novo vimatoll zai zalear, sorkaran tankam veginuch to toyar korun, Bardezkaranchi itsa puri korchi. Ani dokxinn lokak, Bharoti Navy-chea hatantlem Dabolim vimantoll sottasot kaddun, Saxttikaranchea hodd’dear dovorchem. Eka lhanxea Rajeant nivddun kaddlolea netachea axirvaddan, don vimantollam asop mhonnchem, tea Rajeak obimannachi gozal. Ani hea monant ghevn, amgele ixtt Lapittan Gõyant don vimattollam mellunk vo favo zaunk ek sompo ani konnank chimpto iena toslo upai sodun kaddla. Gele challis dis ani challis ratri ‘Prachit Kallan’, upas ani kuddichi dhonvon korchea bodla, hea pavtti Lapittan Gõychea boreponnam katir, apnnalo bezo chodduch ocupado dovorlolo ani Gõychea babod sorkaracho axirvadd aslear, xevottak vhoilo Dabolim ani Mopacho proxn thoddik haddun, donui partik; Saxttikarank ani Bardezkarank koslench kismisanv nastona khuxi korunk zata. Upai: Zauri pul Utor ani Dokxin Gõy ekthaim haddta vo zoddop(connects) korta. Zuari pul moddun udoilear Utor–Dokxin lokache som’bond tutunt poddtole. Sompeponnim, Saxtticho lok Utor Gõyant pavchona ani Bardezcho lok ek pavtti Mopa vimantoll chalu kelo mhonntoch, Dabolim vimantolla velean vimanan uddni korcho nam. Oxem pollunk ghelear, char vorsam bhitor (vo tea adim) Zuari pul moddun poddpachi poristithi nirmann zalea ti, heradari Montri Sudin Dhavlikaran halinch Gõyche Vidhan Sobhen ugddas korun dila. Novem Rajdani Xar: Zuari pulavelean heradarichi (transports) sovloti bond zatoch, vorixtt kama korunk Ponnje Rajdani xarant vochunk tras zatole. Kanakona ganvche itlea pois aslolea lokak eka dhaktea sorkari kama khatir, ak’kho dis ogddaicho poddtolo. Dekhun, lokache tras ani oddchoni unnem korpak ani kimticho vell samballchea pasot, Fonddem (Ponda) jem xar sogllea Gõykarank ek sarkem modlea zagear urta, ho vatthar novem Rajdani xar korchem. Ani rajdhani xar zalem mhonntoch, Porvorim aslolem Vidhan Sobhe Ghor Fonddem ubem zatolem. Orxim zalear, amche neta aplo faido chintat. Tankam Gõyche nhi mhunn Gõykaranchem poddunk nam. Divide and rule ho tancho hetu vo rajkarann bhens. Oxem tor, amchea bore ixtt Lapittan koslich malis nastana vhoir dilea ti suchnna niz Gõykaramni vevharan ghatlear, sorkarachea ‘alaxiro’ nastana Bardez-Saxttikaranchem natem odik somzikayechem zatolem, oxem tumkam disona? Mopa vimantollak lagon, amchi sosnikai kiteak piddear korop? Chintat….. Lino B. Dourado Jezuchea Punorjivontponnachi Porob Somestank Khuxallkayechi Zaum.
