Kazari Jivitant Ankvarponnachea Mogak Zago Kiteak Nam? Doriachim lharam halot-dolot thoddir yevn khoddpacher funtalim ani titleach vegan tanche mogache ubav kallzantleant bhair sorun jiber funtale. Dog premi doria kinarer vareachea modur dogar, chokchokit dhove renver bosun fuddaracheo gozali kori. Thoddea vellan somdirachea potant vochpi suria, nimnni uzvaddachim kirnam tancher fankartalo. Mogache umollxokin bhorlolim mogiam, apnnachim bhavnnam ekamekak visvasan ukttim kortalim. Somdirant budd martolea suriak bott dakoun, cheddean mhontlem: -Mhojean, tujea moga khatir sonvsarachea dusre vatten vochunk zata. -Hoi? Ponn tum thoinch ravtolo? Cheddvan vicharlem. -Suria, sonvsarachea dusre vatten vetana to thoinch ravona. Dusrea disa to porot uzvadd ghenv sonvsarak dita. Tech toren hanv tuzo suria zatalom ani mhojea lagim asa tem soglem tujem kortolom. Cheddean ummale uktaile. -Khoreaninch tum kitlo doyall ani mogall mhojea sovem? Vell kiteak ogddaita? Bank-achoaccount mhojea nanvar kor. Cheddvan mhontlem. -Duddu sukh dina punn ek bhorvonso dita. Duddu aslear oddchonim mekllo asta, hem sot. Punn duesant khoxttovtolo mon’xak, bholaiki vikot ghevnk mellona. Cheddean sanglem. -Ami kazar zatoch, tujea huskeant ani trasant hanv vanttekar zaun tujea velem vozon lohu kortelim. -Bhes borem chintop tujem. Punn mhaka koslech tras nhi mhunn chinta nam. Cheddean huskea meklleponn dakoll kelem. -Tras ani chinta asunk ajun amche kazar zaunk nam. Kazara uprant darvontear ubim zatolim tufana poisavunk, eke ostorichi chodd goroz. Ostori kazara uprant sukh-dukh-ant vanttekar zata mhonn cheddvan ugddas kelo. -Polle tim vhodd lharam. Vareachea forsar thoddir pavtta mhollear tanchem boll komi zait veta. Tech toren, eka mekachea visvasponnacher ani sozmonicher jivitant yetlim moddam poisavunk, dogaimchem ek mon, ek chinta ani sangatan teag kelear, darachea umbreavelem dukh amkam ken’nach chakunk mellchena. Mogache zoit eka mekachea visvasacher tevlolem asa mhonn cheddean kolit kelem. -Toxem tor, amcho vell atam kazar zavpacho. Cheddvan mhontlem. Ani tannim Kazaracho Povitr Sakrament zhoddlo. Thoddea tempan: Kazari jodi nodixim pasoyek ghelim. Nodiche dheger choltana ghorkarnnichi vann udkan poddli. Ani udkachea lotar dusre vatten vochun, eka jilkuttache boddek xirkovli. Ghorkarnnin, ghorkarak mhonnlem. -Hi poi. Mhoji vann boddek xirkovlea. Matxe vochun hadd. -Asum. Novi ghevnchi. Sarko penvunk noko aslolea ghorkaran mhontlem. -Ankvar astona sonvsarachea dusre vatten vochunk sodtalo tum. Tachich utram yad korun ghorkarnnin mhonllem ani fuddem uloili-Ugddas asa nhi tuka? Igorjent, mhojea hatak dorun bhas diloli ti? Sukhan dukhan… -Visortolom koso? Boxing suru zaunvche adim boxer-anchi ek rit, eka-mekak hat divnchi. Tanchem kestanv addavpak refri tori asta. -Atam tujean mhaka koxem addavunk zata tem polletam hanv. Ani tinnem soroll nhodint udki marli. Kitloch vell ti disli nam. Ghorkaracho jiv bhiratin gholleak tenklo. Konnui tori pavchem mhunn tannem boball keli. Lok ekthovlo. -Ghorkanin akasmat jiv divpachem kharan? Konn eklean vicharlem. -Tika natak korunk buddoun marpachi ikmot? Dusrean dubhav uktaylo. -Pulisek haddun, haka ott’tok kelear boro. Oso tisro odmas kortana, nodhiche dusre vatten ghorkarnn udkantli vhoir sorun, vann xirkovloli thoinsor ravun mottean aroddli. -Kazara adim, apnnacho jiv sonkotan ghalun mhaka salvar kortolo mhunn sangtalo. Atam kaposidad asa zalear mhaka vorunk yeo. Nam tor hanv haganch ravtam. -Bailek haddunk voch re. Konnem tori eka mostean mhontlem, ani taka duklun nhodint udoilo. Ken’nanch udkan pevunk naslolo monis apnnalo jiv salvar korunk, udkacher mellta toxe hat marit ghorkarnniche dixen vetalo. Vhoir aslolea lokacheo bobo, huyeli ani talioanche avazar tachea angant boll nirman zalem, ani tech netar to novoch penvunk xiktolo khellgoddi, bhangarachi medal poilo inam zhoddunk, penvpache sortin bhitor sorla kai diso. Buddta-urta, buddta-urta mhonnosor konnem tori khobrakarank vomedia-k fon kelo. Sotasot panch potrkarancheo gaddi nodixim ubeo zaleo ten’na, ordo jiv nasloli ghorkarachi kudd ghorkannichea kakeant podttanch, kamerache flash chalu zale. Nodichi polltodd 30 miterancha ontorachi asli. Dusrea disa potrancher mottea okxoramni boltich batmi vachunk mell’li. Udkant Buddtolea Ghorkarak Kallizdar Ghorkarnnin Mornantlo Vattailo. Lino B. Dourado .
